តាមរយៈផេកហ្វេសប៊ុក នៅព្រឹកថ្ងៃទី២ខែមករា ឆ្នាំ២០១៩នេះ លោកស សុខា រដ្ឋលេខាធិការក្រសួងអប់រំយុវជននិងកីឡា បានបញ្ជាក់ថា គួរឱ្យស្ដាយ! ព្រឹកមិញនេះ នៅពេលធ្វើដំណើរ តាមផ្លូវមួយក្នុងសង្កាត់ទួលគោក២ ខណ្ឌទួលគោក បានជួបនឹងការដ្ឋាន ចាក់ស៊ីម៉ងត៍មួយកន្លែង (ដូចរូបភាព)។
លោកបានថ្លែងថា “អ្វីដែលខ្ញុំ និងភរិយា ចាប់អារម្មណ៍ត្រង់ថា ទឹក និងកាកស៊ីម៉ងត៍ ធ្លាក់រប៉ាត់រប៉ាយ លើផ្លូវដ៏ស្រស់ស្អាត ដោយមិនមានការសម្អាត។ តាមមើលទៅរថយន្តបាញ់បេតុងនេះ ជារបស់ក្រុមហ៊ុនបរទេស។ នៅប្រទេសខ្លួន មានច្បាប់គ្រប់គ្រងបញ្ហានេះ ចេះគោរពច្បាប់ និងអនុវត្ត។ នៅកម្ពុជា ក៏មានច្បាប់ទម្លាប់បែបនេះដែរ ចុះហេតុអ្វីមិនព្រមគោរពច្បាប់ផងទៅ? រឿងយកចិញ្ចើមផ្លូវ ទ្រូងផ្លូវ ចតឡានបាញ់បេតុង ប៉ះពាល់ចរាចរណ៍ សណ្ដាប់ធ្នាប់ សុវត្ថិភាពអ្នកធ្វើដំណើរជារឿងមួយ ទៅហើយ ខ្ញុំមិននិយាយទេ ព្រោះថា ធ្វើដូចម្ដេចការអភិវឌ្ឍន៍ តែងតែបែបនេះ តែសំខាន់គប្បីទទួលខុសត្រូវ ទាំងការធ្លាក់ស៊ីម៉ងត៍ ពាសពេញផ្លូវ និងសម្អាតផ្លូវឡើងវិញផង ក្រោយធ្វើរួច។
ទន្ទឹមនឹងនេះ ខ្ញុំក៏សូមអំពាវនាវ ដល់អាជ្ញាធរដែនដី រួមមាន សង្កាត់ និងខណ្ឌ មេត្តាពិនិត្យ រាល់ការដ្ឋានតាមចិញ្ចើមផ្លូវបែបនេះ ជាប្រចាំផង ក្នុងន័យបញ្ចៀសការស្ទះចរាចរណ៍ ការធ្វើដំណើររបស់អ្នកមូលដ្ឋាន សណ្ដាប់ធ្នាប់ សុវត្ថិភាព សោភ័ណភាព និងគុណភាពផ្លូវ ដែលបានចំណាយថវិកា រាប់លានដុល្លារសាងសង់នោះ”៕ ដោយ ៖ កូឡាប
