ស្ទឹងត្រែង ៖ កម្លាំងការិយាល័យប្រឆាំងបទល្មើសសេដ្ឋកិច្ចខេត្តស្ទឹងត្រែង បានចុះបង្ក្រាបរថយន្តដឹកឈើកែច្នៃខុសច្បាប់(ទ្វារបង្អួច)ដឹកចេញពីទំនប់វារីអគ្គិសនីសេសានក្រោម 2(បាតអាង) លើកំណាត់ផ្លូវជាតិលេខ 78Aស្ថិតក្នុងភូមិស្រែស្រណុក ឃុំក្បាលរមាស ស្រុកសេសាន ខេត្តស្ទឹងត្រែង កាលពីរំលងអធ្រាត្រឈានចូលថ្ងៃទី២ខែមករាឆ្នាំ២០១៩។
សមត្ថកិច្ចបានឲ្យដឹងថា ឈើដែលសមត្ថកិច្ចបង្ក្រាបនេះនៅតែបន្តដឹកចេញ ពីភូមិស្រែគរថ្មីឆ្លងកាត់ប៉ុស្តិ៍ត្រួតពិនិត្យជាច្រើនកន្លែងនិងកាត់ទំនប់វារីអគ្គិសនីសេសានក្រោម 2 ជារៀងរាល់យប់ តាមរថយន្តសាំយ៉ុងមួយយប់ប្រមាណជិត10 គ្រឿង ដែលមាន ម្ចាស់រថយន្តឈ្មោះហុង និងឈ្មោះវិន រួមជាមួយមេឈ្មួញឈ្មោះចែពុយ និងចែពៅ ជាអ្នករត់ការចេញពីទំនប់វារីអគ្គិសនីសេសានក្រោម 2 ដែលបានឃុបឃិតគ្នាជាមួយប៉ុស្តិ៍ត្រួតពិនិត្យតាមផ្លូវចេញពីបាតអាង។
សមត្ថកិច្ចបានបន្តទៀតថា បន្ទាប់ពីរថយន្តប្រមាណជា 4 ទៅ 5គ្រឿង ចេញពីទំនប់វារីអគ្គិសនីសេសានក្រោម 2 ត្រូវបានភ្នាក់ងារសមត្ថកិច្ចរាយការណ៍ថា មានរថយន្ត៥គ្រឿង រត់ឆ្លងកាត់តាមផ្លូវជាតិ លេខ78 កាត់ភូមិច្រប់ តម្រង់ទៅកាន់តាមឡូ 4 កាត់តាមក្រុមហ៊ុន ចេញទៅតាមចំការកៅស៊ូ ក្រុមហ៊ុនដុងណាយដុងហ្វូច្រកភ្នំខៀវ និងបន្តឆ្ពោះទៅកាន់ខេត្តក្រចេះ។
ទោះជាយ៉ាងណា ទីតាំងសិប្បកម្មកែច្នៃឈើខុសច្បាប់ នៅក្នុងភូមិស្រែគរថ្មី ក្នុងទំនប់វារីអគ្គិសនីសេសានក្រោម ពីរនៅតែបន្តធ្វើសកម្មភាពខុសច្បាប់ ក្នុងការកាប់បំផ្លាញព្រៃឈើ យកមកកែច្នៃក្រោមការត្រូរូវគ្នា ជាមួយអាជ្ញាធរមូលដ្ឋាន និងសមត្ថកិច្ចពាក់ព័ន្ធមួយចំនួន ៕ ដោយ ៖ រចនា
