ខេត្តតាកែវ ៖ ជនរងគ្រោះម្នាក់បានរងរបួសយ៉ាងដំណំខណៈកំពុងបើកបរម៉ូតូសុខៗ ត្រូវរថយន្តសាំយ៉ុងបើកប៉ះបណ្តាលឲ្យដួលបោកក្បាលត្រូវនិងថ្នល់ហូរឈាមស្រោចមុខ។
ហេតុការណ៍គ្រោះថ្នាក់ចរាចរនេះបានកើតឡើងនៅព្រឹកថ្ងៃទី០៨ ខែមករា ឆ្នាំ២០១៩ វេលាម៉ោង០៨និង៣០នាទី នៅលើផ្លូវជាតិលេខ២ ចន្លោះគីឡូម៉ែត្រលេខ៦២-៦២ ស្ថិតនៅភូមិឈូកសខាងត្បូង ឃុំសិង្ហ ស្រុកសំរោង ខេត្តតាកែវ។ ករណីនេះដែរប៉ូលីសស្រុកសំរោងបានប្រាប់ថា ជនរងគ្រោះមានឈ្មោះ អ៊ួង សេង ភេទស្រី អាយុ៤៨ឆ្នាំ មុខរបរធ្វើស្រែ រស់នៅភូមិឈូកសខាងជើង ឃុំសិង្ហ ស្រុកសំរោង។ ម៉ូតូជនរងគ្រោះបើកបរម៉ាកគុបជ្រុងសេ៧០ គ្មានស្លាក់លេខ ចំណែករថយន្តបង្កម៉ាកសាំយ៉ុង ពណ៌លឿង ពាក់ស្លាកលេខភ្នំពេញ 2Z 3893 អ្នកបើកបរមិនត្រូវបានស្គាល់អត្តសញ្ញាណនោះទេព្រោះរត់គេចខ្លួនបាត់។
ក្រោយកើតហេតុសមត្ថកិច្ចចរាចរស្រុកសំរោងបានចុះដល់ធ្វើកំណត់ហេតុនិងបានហៅរថយន្តសាមុយដឹកជនរងគ្រោះទៅព្យាបាលនៅមន្ទីរពេទ្យបង្អែកខេត្តតាកែវ ចំណែកមធ្យោបាយទាំងពីរគ្រឿង ត្រូវបានយកទៅរក្សាទុកនៅអធិការដ្ឋាននគរបាលស្រុកសំរោងដើម្បីរង់ចាំដោះស្រាយគ្នានៅពេលក្រោយតាមនីតិវិធី៕ ដោយ ៖ តាកែវ
