ព្រះសីហនុ ៖ តំណាងសហគមន៍អូរខ្សាច់ ដែលមានទំនាស់ដីធ្លីរ៉ាំរ៉ៃអូសបន្លាយពេលយូរឆ្នាំ មានទីតាំងស្រុកស្ទឹងហាវ ខេត្តព្រះសីហនុ រំពឹងថា នឹងទទួលបានយុត្តិធ៌មដីធ្លីក្នុងពេលឆាប់ៗនេះ ព្រោះសង្កេតឃើញថា ប៉ុន្មានឆ្នាំចុងក្រោយនេះ ថ្នាក់ដឹកនាំខេត្តព្រះសីហនុ និងប្រព័ន្ធតុលាការខេត្តនេះ មានសកម្មភាពការងារល្អ និងតែងផ្តល់យុត្តិធ៌មជូនប្រជាពលរដ្ឋក្រីក្រ ដែលត្រូវឈ្មួញមានទ្រព្យ និងមន្ត្រីមានអំណាចគំរាមធ្វើបាប។
លោកស្រី ឡុច ទូច តំណាងពលរដ្ឋមានទំនាស់ដីធ្លី នៅសហគមន៍អូរខ្សាច់ មានទីតាំងនៅឃុំអូរត្រេះ ស្រុកស្ទឹងហាវ ខេត្តព្រះសីហនុ ផ្តល់សម្ភាសន៍ឲ្យអ្នកយកព័ត៌មាន CEN.COM.KH ប្រចាំខេត្តព្រះសីហនុ ដឹងនៅថ្ងៃព្រហស្បតិ៍ ទី១៤ ខែធ្នូ ឆ្នាំ២០១៧ថា ការស្វែងរកយុត្តិធ៌មដីធ្លី របស់ពលរដ្ឋនៅសហគមន៍នេះ អូសបន្លាយពេលជាង ១០ឆ្នាំមកនេះ មិនទាន់ទទួលបានយុត្តិធ៌មទេ។
យ៉ាងនេះក្តី តំណាងរូបនេះ រំពឹងថា យុត្តិធ៌ម នឹងមានសម្រាប់ពលរដ្ឋក្រីក្រ របស់ពួកគាត់នៅសហគមន៍អូរខ្សាច់ក្នុងពេលឆាប់ៗ ព្រោះពលរដ្ឋរំពឹងទៅលើការដឹកនាំដ៏ល្អ របស់ លោក យន្ត មីន អភិបាលខេត្តព្រះសីហនុនៅពេលបានមកដឹកនាំខេត្តនេះ លោកបានចុះដល់មូលដ្ឋាន និងជួបសួរសុខទុក្ខប្រជាពលរដ្ឋ ដែលជួបកង្វល់ផ្សេងៗ ដើម្បីឈានទៅរកដំណោះស្រាយដោយសន្តិវិធី និងឲ្យតាមច្បាប់ ដោយឈរលើគោលនយោបាយឈ្នះៗទាំងអស់គ្នា។
ក្តីរំពឹង របស់ លោកស្រី ឡុច ទូច តំណាងសហគមន៍អូរខ្សាច់បែបនេះ គឺបានកើតមានជាថ្មីទៀត បន្ទាប់ពីមន្ត្រីសាលាដំបូងខេត្តព្រះសីហនុ និងមន្ត្រីមន្ទីររៀបចំដែនដីនគរ រូបនីយកម្ម សំណង់ និងសុរិយោដី ខេត្ត ព្រមទាំងមន្ត្រីស្ថាប័នជំនាញជាច្រើនទៀត នៃរដ្ឋបាលខេត្តព្រះសីហនុ បានចុះទៅវាស់វែងព្រំ ឬកំណត់ក្បាលដីមានទំនាស់ រវាងភាគីប្រជាពលរដ្ឋសហគមន៍អូរខ្សាច់ ជាមួយភាគី លោក ប៉ុន សារឿន និងលោក សុខ ងួន ជាដើម មានទំហំផ្ទៃដីសរុបចំនួន ២៧ហិកតារ កាលពីព្រឹកថ្ងៃព្រហស្បតិ៍ ទី១៤ ខែធ្នូ ឆ្នាំ២០១៧។
បន្ថែមលើនេះ លោកស្រី ឡុច ទូច តំណាងពលរដ្ឋសហគមន៍អូរខ្សាច់ ក៏បានកោតសរសើរការធ្វើកំណែទម្រង់ប្រព័ន្ធតុលាការ នៅកម្ពុជា ពិសេសសកម្មភាពការងារជាវិជ្ជមាន របស់ ថ្នាក់ដឹកនាំ និងមន្ត្រីសាលាដំបូងខេត្តព្រះសីហនុ ដែលបានបំពេញតួនាទីការងារ ទៅលើសំណុំរឿងផ្សេងៗ ពិសេសសំណុំរឿងទាក់ទងទំនាស់ដីធ្លី នៅតាមសហគមន៍ពលរដ្ឋក្រីក្រជាបន្តបន្ទាប់មកនេះ មានភាពត្រឹមត្រូវគួរឲ្យកត់សម្គាល់។
លោកស្រី ឡុច ទូច បន្តទៀតថា វិវាទដីធ្លីនេះកន្លងមកពលរដ្ឋសហកមន៍អូរខ្សាច់ ក៏ធ្លាប់បានស្វែងរកកិច្ចអន្តរាគមន៍ពីស្ថាប័នពាក់ព័ន្ធផ្សេងៗ រួមមាន៖ ខុទ្ទការល័យសម្តេចនាយករដ្ឋមន្ត្រី ហ៊ុន សែន ទីស្តីការគណៈរដ្ឋមន្ត្រី រដ្ឋសភា និងព្រឹទ្ធសភាជាដើម ឲ្យជួយអន្តរាគមន៍ និងផ្តល់យុត្តិធ៌មជូនពលរដ្ឋ ប៉ុន្តែមិនទាន់ទទួលបានជោគជ័យនោះទេ។
វិវាទនេះ លោកស្រី ឡុច ទូច បន្តថា សម្តេច ហេង សំរិន ប្រធានរដ្ឋសភា ក៏ធ្លាប់បានចេញលិខិតជួយអន្តរាគមន៍ ទៅកាន់ លោក យន្ត មីន អភិបាលខេត្តព្រះសីហនុ ឲ្យបន្តជួយដោះស្រាយវិវាទដីធ្លីជូនពលរដ្ឋនៅឃុំអូរត្រេះ ស្រុកស្ទឹងហាវនេះ ជាបន្តបន្ទាប់រួចមកហើយដែរ។
លិខិតអន្តរាគមន៍របស់ សម្តេច ហេង សំរិន ប្រធានរដ្ឋសភា ដាក់ជូន លោក យន្ត មីន ជួយពិនិត្យសម្របសម្រួលដំណោះស្រាយទំនាស់ដីធ្លីជូនពលរដ្ឋ នៅសហគមន៍អូរខ្សាច់ គឺរហូតមកដល់ពេលនេះ មិនទាន់ទទួលបានលទ្ធផលជាវិជ្ជច្រើននោះទេ ប៉ុន្តែកំពុងវិវត្តន៍ទៅរកភាពជោគជ័យគួរឲ្យកត់សម្គាល់។
ផ្តើមពីបញ្ហានេះ លោកស្រី ឡុច ទូច សំណូមពរដល់ អភិបាលខេត្តព្រះសីហនុ លោក យន្ត មីន និង លោក ម៉ុង មុន្នីចរិយា ប្រធានសាលាដំបូងខេត្តព្រះសីហនុ ពិសេស សម្តេចនាយករដ្ឋមន្ត្រី ហ៊ុន សែន ឲ្យជួយដោះស្រាយបញ្ចប់សំណុំរឿងលើវិវាទដីធ្លីរ៉ាំរ៉ៃ ជូនពលរដ្ឋនៅសហគមន៍អូរខ្សាច់ ចប់ឲ្យបានឆាប់ ដើម្បីឲ្យប្រជាពលរដ្ឋទទួលបានយុត្តិធ៌ម និងអាចប្រើប្រាស់ដីធ្លី ឲ្យមានសុវត្ថិភាពដូចដើមវិញ។
លោកស្រី ឡុច ទូច ដែលធ្លាប់ត្រូវបានតុលាការ និងសមត្ថកិច្ចចម្រុះ ចាប់ដាក់គុក និងដាក់ខ្នោះដៃជើង ផងនោះ បានឲ្យដឹងថា ពលរដ្ឋរស់នៅសហគមន៍អូរខ្សាច់ ដែលមានទំនាស់ដីធ្លីនេះ គឺមានវិវាទជាមួយ លោក ប៉ុន សារឿន អតីតចៅសង្កាត់រងសង្កាត់លេខ១ និងក្រោយមកមានគេប្រាប់ថា បុគ្គលរូបនេះ បានឡើងតួនាទីជាអនុរដ្ឋលេខាធិការក្រសួងបរិស្ថាន ប៉ុន្តែបច្ចុប្បន្ននេះ លោកស្រីមិនដឹងច្បាស់ថា លោក ប៉ុន សារឿន បន្តមានតួនាទីដដែល ឬក៏ត្រូវរាជរដ្ឋាភិបាល បានដកហូតតួនាទីចេញ បែបណានោះទេ?។
ទំនាស់នេះ លោកស្រី ឡុច ទូច ឲ្យដឹងថា ពលរដ្ឋពួកគាត់ ក៏ធ្លាប់បានដាក់ពាក្យបណ្ដឹងរដ្ឋប្បវេណីទៅសាលាដំបូងខេត្តព្រះសីហនុ កាលពីឆ្នាំ២០១៤ ស្នើសុំមោឃៈ និងរំលាយប័ណ្ណកម្មសិទ្ធិដីធ្លីដែលត្រូវភាគីទំនាស់ លោក ប៉ុន សារឿន និងលោក សុខ ងួន បានឃុបឃិតលួចធ្វើប្លង់រំលោភដីពលរដ្ឋមានផ្ទៃដីសរុបចំនួន ២៧ហិកតារ។
តំណាងរូបនេះចោទ លោក ប៉ុន សារឿន ថា បានឃុបឃិតជាមួយមន្ត្រីខ្លះនៅមន្ទីររៀបចំដែនដីខេត្តព្រះសីហនុ និងមន្ត្រីពាក់ព័ន្ធដទៃទៀត កាលពីអាណត្តិកន្លងទៅ លួចធ្វើប្លង់កម្មសិទ្ធិរំលោភយកដីពលរដ្ឋ មានទីតាំងនៅភូមិ៤ ឃុំអូរត្រេះ ស្រុកស្ទឹងហាវ ទាំងពលរដ្ឋបានមិនបានដឹងខ្លួន។
លោកស្រីបន្តថា ពលរដ្ឋសហគមន៍អូរខ្សាច់ ដែលរងគ្រោះដីធ្លីទាំងអស់ ធ្លាប់បានប្រមូលផ្តុំគ្នាតវ៉ា និងទាមទាររកយុត្តិធម៌ពីស្ថាប័នពាក់ព័ន្ធ មានរដ្ឋបាលខេត្តព្រះសីហនុ សាលាដំបូងខេត្តនេះ រហូតដល់ស្ថាប័នកំពូលៗថ្នាក់ជាតិ ឲ្យជួយដោះស្រាយជម្លោះនេះ ប៉ុន្តែមិនទាន់មានលទ្ធផលវិជ្ជមានទេ គិតត្រឹមថ្ងៃព្រហស្បត្តិ៍ ទី១៤ ខែធ្នូ ឆ្នាំ២០១៧។
ទោះជាបែបនេះក្តី លោកស្រី ឡុច ទូច មានជំនឿមុតមាំថា តាមរយៈ លោក យន្ត មីន ដែលបានមកដឹកនាំ ជាអភិបាលខេត្តព្រះសីហនុ ពិសេសថ្នាក់ដឹកនាំ និងមន្ត្រីតុលាការសាលាដំបូងខេត្តព្រះសីហនុអាណត្តិនេះ នឹងអាចជួយផ្តល់យុត្តិធ៌មដីធ្លីពិតប្រាកដ ជូនពលរដ្ឋនៅសហគមន៍អូរខ្សាច់ និងសហគមន៍រងគ្រោះដីធ្លីផ្សេងៗទៀត ឲ្យទទួលបានជោគជ័យ ឬទទួលបានយុត្តិធ៌មក្នុងពេលឆាប់ៗនេះ ជាមិនខាន។
ទាក់ទិនបញ្ហានេះ មន្ត្រីឃ្លាំមើលផែនការអភិវឌ្ឍសង្គម ប្រចាំខេត្តព្រះសីហនុ ក៏បានស្នើដល់ រដ្ឋបាលខេត្តនេះ ពិសេស សម្តេចអគ្គមហាសេនាបតីតេជោ ហ៊ុន សែន ជួយចាត់មន្ត្រីឯករាជ្យចុះអង្កេតដោះស្រាយវិវាទដីធ្លីរ៉ាំរ៉ៃនេះចប់ឲ្យបានឆាប់។
វិវាទនេះដែរ មន្ត្រីអង្កការក្រៅរដ្ឋាភិបាល បានកត់សម្គាល់ថា ដើមហេតុទំនាស់នៅសហគមន៍អូរខ្សាច់ ស្ថិតក្នុងឃុំអូរត្រេះ ស្រុកស្ទឹងហាវនេះ ទំនងជាអាចមានជាប់ពាក់ព័ន្ធការឃុបឃិតគ្នាជាលក្ខណៈប្រព័ន្ធ រវាងឈ្មួញដី ជាមួយបុគ្គលបំរើការងារ នៅតាមស្ថាប័នជំនាញខ្លះ នៃរដ្ឋបាលខេត្តព្រះសីហនុ អាណត្តិមុនៗ ដើម្បីប្លន់យកដីប្រជាពលរដ្ឋក្រីក្រ ដោយប្រើប្រព័ន្ធតុលាការ និងកងកម្លាំងប្រដាប់អាវុធ សម្រាប់សម្លុតគំរាម និងចាប់ពលរដ្ឋ ដែលហ៊ានចេញមុខតវ៉ាដាក់គុកច្រវ៉ាក់ជាដើម។
លោកស្រី ជៀប សុធារី អ្នកសម្របសម្រួលសមាគមអាដហុក (ADHOC) ប្រចាំខេត្តព្រះសីហនុ ដែលចុះពិនិត្យផ្ទាល់ដល់ទីតាំងដីទំនាស់ជាក់ស្ដែង នៅសហគមន៍អូរខ្សាច់ ឃុំអូរត្រេះ ស្រុកស្ទឹងហាវ កាលពីព្រឹកថ្ងៃព្រហស្បតិ៍ ទី១៤ ខែធ្នូ ឆ្នាំ២០១៧។ លោកស្រីបានទទូចដល់ថ្នាក់ដឹកនាំស្ថាប័នពាក់ព័ន្ធ ពិសេស អភិបាលខេត្តព្រះសីហនុ ឲ្យជួយសម្របសម្រួលដោះស្រាយទំនាស់ដីធ្លីជូនប្រជាពលរដ្ឋ រស់នៅសហគមន៍នេះ ចប់ឲ្យបានឆាប់ និងមានលទ្ធផលវិជ្ជមានទាំងគ្រប់ភាគីទំនាស់អាចទទួលយកបានទាំងអស់គ្នា។
អ្នកឃ្លាំមើលសង្គមរូបនេះ ក៏ស្នើដល់មន្ត្រីជំនាញនៅតាមមន្ទីរ ឬស្ថាប័នរដ្ឋនីមួយៗ ពិសេសសាលាដំបូងខេត្តព្រះសីហនុ មុននឹងចេញប្លង់កម្មសិទ្ធិដីធ្លីជូនបុគ្គល ឬកាត់ក្តីទៅលើសំណុំរឿងដីធ្លី ត្រូវចុះស៊ើបអង្កេតដល់ទីតាំងកើតមានទំនាស់ជាក់ស្ដែងឲ្យបានត្រឹមត្រូវជាមុនសិន។
ត្រង់ចំណុចនេះ លោកស្រី ជៀប សុធារី សង្ស័យថា ទំនាស់ដីធ្លីដែលកើតមានវិវាទជាង ២០សហគមន៍នាខេត្តព្រះសីហនុនាពេលកន្លងទៅ អាចផ្ដើមពីការឃុបឃិតគ្នាពីសំណាក់អាជ្ញាធរចាប់ពីថ្នាក់មូលដ្ឋានខ្លះ រហូតដល់មន្ត្រីជំនាញពាក់ព័ន្ធ មានមន្ទីររៀបចំដែនដី និងមន្ត្រីខ្លះនៃរដ្ឋបាលខេត្តព្រះសីហនុ ជាដើម ជាថ្នូរទទួលបានផលប្រយោជន៍ឲ្យគ្នាទៅវិញទៅមក។
ចំណែក មន្ត្រីអង្កេតអង្គការលីកាដូ (Licadho) ប្រចាំខេត្តព្រះសីហនុ លោក ស្រេង វ៉ាន់លី បង្ហាញមន្ទឹលថា ទំនាស់ដីធ្លីដែលកើតមានរ៉ាំរ៉ៃ នៅតាមសហគមន៍មួយចំនួននាមូលដ្ឋាននេះកន្លងមក ទំនងជាអាចផ្ដើមចេញពីការឃុបឃិតចែកផលប្រយោជន៍គ្នាទៅវិញទៅមក រវាងមន្ត្រី ឬបុគ្គលខ្លះ បំរើការងារនៅតាមស្ថាប័នពាក់ព័ន្ធ ក្រោមឱវាទរដ្ឋបាលខេត្តព្រះសីហនុ។ ក្នុងនោះ លោក វ៉ាន់លី ក៏បានរិះគន់ប្រព័ន្ធតុលាការថា មិនឯករាជ្យ ជាពិសេសរាល់ការកាត់ក្ដីទៅលើសំណុំរឿងដីធ្លី ភាគច្រើន គឺមិនបានចុះពិនិត្យផ្ទាល់ដល់ទីតាំងកើតមានទំនាស់ជាក់ស្ដែងនោះទេ។
យ៉ាងនេះក្តី នៅក្នុងលិខិតដាក់ជូន សម្តេច ហេង សំរិន ប្រធានរដ្ឋសភា លោកស្រី ឡុច ទូច បានឲ្យដឹងថា ប្រជាពលរដ្ឋ នៅសហគមន៍អូរខ្សាច់ភាគច្រើន បានមកកាន់កាប់ដីធ្លី នៅឃុំអូរត្រេះ ស្រុកស្ទឹងហាវ ខេត្តព្រះសីហនុនេះ ចាប់តាំងពីឆ្នាំ១៩៨៩ ឬឆ្នាំ១៩៩០ ដោយទទួលស្គាល់ពីអាជ្ញាធរមូលដ្ឋាន និងបានដាំដំណាំកសិកម្មនៅលើដីនោះជាក់ស្តែងថែមទៀត។ ប៉ុន្តែជាបន្តបន្ទាប់មក បែរជាត្រូវ ឈ្មោះ កើត រី គឹម ចាន់នី ប៉ុន សារឿន វង្ស សោភា និងឈ្មោះ សុខ ងួនជាដើម បានឃុបឃិតគ្នាក្លែងស្នាមមេដៃឈ្មោះ ឡុញ តាយ ក្នុងកិច្ចសន្យាទិញលក់ដី ហើយបានលួចធ្វើប័ណ្ណកម្មសិទ្ធិ ដែលឈ្មោះ ឡុញ តាយ បានស្លាប់តាំងពីថ្ងៃទី២១ ខែមីនា ឆ្នាំ១៩៩៤។ ប៉ុន្តែបែរជាកាលបរិច្ឆេទចុះថ្ងៃខែក្នុងកិច្ចសន្យាទិញលក់ដីទំនាស់នេះ បានកើតឡើងក្រោយពេលឈ្មោះ ឡុញ តាយ បានចែកឋានទៅវិញ។
ករណីនេះ លោកស្រី ឡុច ទូច បានរៀបរាប់ថា ពលរដ្ឋពួកគាត់ក៏ធ្លាប់ដាក់ពាក្យប្ដឹងភាគីទំនាស់ទៅកាន់តុលាការអស់រយៈពេលយូរឆ្នាំមកហើយ ប៉ុន្តែមិនទាន់មានដំណោះស្រាយទេ។ លោកស្រីបន្តថា នៅគ្រាវិវាទដីធ្លីនេះមិនទាន់បានដំណោះស្រាយផង ស្រាប់តែកាលពីខែវិច្ឆិកា ឆ្នាំ២០១៦ បែរជាមានឈ្មោះ ហេង សុខា បាននាំមនុស្សមួយក្រុមទៅរុះរើផ្ទះសមាជិកសហគមន៍ ដែលសង់លើទីតាំងដី ២៧ហិកតារ របស់ពួកគាត់ថែមទៀត។
យ៉ាងណាក៏ដោយចុះ លោក យន្ត មីន អភិបាលខេត្តព្រះសីហនុ ធ្លាប់មានប្រសាសន៍ថា នឹងអញ្ជើញភាគីវិវាទពាក់ព័ន្ធខាងតំណាងប្រជាពលរដ្ឋមានទំនាស់ដីធ្លីនៅសហគមន៍អូរខ្សាច់ និងភាគីទំនាស់ លោក ប៉ុន សារឿន និងអ្នកជាប់ពាក់ព័ន្ធដទៃទៀត មកជួបពិភាក្សាគ្នាមុននឹងឈានទៅសម្របសម្រួលឲ្យស្របតាមសំណើរបស់ប្រធានរដ្ឋសភា ដែលបានដាក់ផ្ទាល់មករូបលោកឲ្យជួយពិនិត្យអន្តរាគមន៍។
អ្នកយកព័ត៌មាន CEN.COM.KH ប្រចាំខេត្តព្រះសីហនុ មិនទាន់អាចទាក់ទងភាគី លោក ប៉ុន សារឿន ដើម្បីបំភ្លឺលើវិវាទដីធ្លីនៅសហគមន៍អូរខ្សាច់នេះបាននៅឡើយទេ នៅរសៀលថ្ងៃព្រហស្បតតិ៍ ទី១៤ ខែធ្នូ ឆ្នាំ២០១៧។ ប៉ុន្តែទំនាស់នេះ បើយោងតាមឯកសារច្បាប់មួយចំនួនបង្ហាញថា ភាគីលោក ប៉ុន សារឿន បានឈ្នះក្ដីជាបន្តបន្ទាប់ទៅលើវិវាទដីធ្លីជាមួយពលរដ្ឋនៅសហគមន៍អូរខ្សាច់ ដែលកាលណោះមានពលរដ្ឋចំនួន ៣២គ្រួសារ ស្ថិតក្នុងឃុំអូរត្រេះ ស្រុកស្ទឹងហាវ គឺចាប់ពីសាលាដំបូងខេត្តព្រះសីហនុ រហូតទៅ។ ទំនាស់នេះ លោក ប៉ុន សារឿន ក៏ធ្លាប់ដាក់ពាក្យប្ដឹងតំណាងពលរដ្ឋចំនួន ៤នាក់ ទៅកាន់សាលាដំបូងខេត្តព្រះសីហនុ ដោយចោទពីបទប្រើអំពើហិង្សាដោយទុច្ចរិតទៅលើអ្នកកាន់កាប់អចលនវត្ថុ ប្រព្រឹត្តនៅភូមិ៤ ឃុំអូរត្រេះ ស្រុកស្ទឹងហាវ ខេត្តព្រះសីហនុ កាលពីឆ្នាំ២០០៨។
តំណាងពលរដ្ឋទាំង ៤នាក់ ដែលលោក ប៉ុន សារឿន ប្ដឹងមាន ឈ្មោះ ឡុច ទូច ឃឹម មុំ អេង វ៉ាន់ និង កៅ ហួរ។ ពួកគាត់ភាគច្រើនជាស្ត្រីមេម៉ាយ មានវ័យចំណាស់ និងមានជំងឺប្រចាំកាយថែមទៀត គិតមកដល់ថ្ងៃទី១៤ ខែធ្នូ ឆ្នាំ២០១៧។
ទោះជាយ៉ាងណា តំណាងពលរដ្ឋសហគមន៍អូរខ្សាច់ លោកស្រី ឡុច ទូច បានចោទភាគី លោក ប៉ុន សារឿន អតីតចៅសង្កាត់រងសង្កាត់លេខ១ ហើយក្រោយមកមានតួនាទីជាអនុរដ្ឋលេខាធិការក្រសួងបរិស្ថាន ថាពិតជាបានឃុបឃិតជាមួយមន្ត្រីមន្ទីរស្ថាប័នពាក់ព័ន្ធ និងអាជ្ញាធរមូលដ្ឋានមួយចំនួននាខេត្តព្រះសីហនុ លួចធ្វើប្លង់កម្មសិទ្ធិដីធ្លី ទៅលើដីលំនៅឋាន និងដីចម្ការដំណាំកសិកម្ម ទាំងពួកគាត់មិនបានដឹងខ្លួនពិតប្រាកដមែន៕ ដោយ៖ ដែន សីមា