ភ្នំពេញ ៖ លោក ឱក ប៊ុង រដ្ឋលេខាធិការក្រសួងពាណិជ្ជកម្ម បានគូសបញ្ជាក់ថា វគ្គបណ្តុះបណ្តាលស្តីពីមជ្ឈត្តការពាណិជ្ជកម្ម នឹងរួមចំណែកលើកស្ទួយប្រព័ន្ធយុត្តិធម៌នៅកម្ពុជា តាមរយៈការផ្តល់នូវចំណេះដឹងថ្មីៗដល់សិក្ខាកាម ដើម្បីចូលរួមអនុវត្តន៍យន្តការដោះស្រាយវិវាទក្រៅប្រព័ន្ធតុលាការ ដែលអាចជួយសន្សំថវិកា និងពេលវេលាជូនវិស័យឯកជន និងទាក់ទាញទំនុកចិត្តកាន់តែខ្ពស់ពីវិនិយោគិនអន្តរជាតិ ជាពិសេសក្រុមហ៊ុនធំៗលំដាប់ពិភពលោក។
ការបញ្ជាក់របស់ លោករដ្ឋលេខាធិការ បានធ្វើឡើងនៅក្នុងពិធីបើកវគ្គបណ្តុះបណ្តាលស្តីពីមជ្ឈត្តការពាណិជ្ជកម្ម ដែលរៀបចំឡើងដោយវិទ្យាស្ថានបណ្តុះបណ្តាលពាណិជ្ជកម្ម និងស្រាវជ្រាវ នៃក្រសួងពាណិជ្ជកម្ម កាលពីព្រឹកថ្ងៃទី១៣ ខែកុម្ភៈ ឆ្នាំ២០១៩ ក្រោមវត្តមានចូលរួមពីសិក្ខាកាមចំនួន ៧០នាក់ ដែលសុទ្ធសឹងជាមន្ត្រីមកពីទីស្តីការក្រសួង និងមន្ទីរពាណិជ្ជកម្មរាជធានី-ខេត្ត។
នៅក្នុងឱកាសនោះលោក ឱក ប៊ុង បានលើកឡើងអំពីសារសំខាន់ និងអត្ថប្រយោជន៍នៃប្រព័ន្ធមជ្ឈត្តការ សម្រាប់បម្រើការអភិវឌ្ឍវិស័យពាណិជ្ជកម្ម និងកិច្ចប្រឹងប្រែងរបស់រាជរដ្ឋាភិបាល ក្នុងការពង្រឹងនីតិរដ្ឋ ព្រមទាំងអភិបាលកិច្ចល្អ តាមរយៈការបន្តអនុវត្តកំណែទម្រង់ប្រព័ន្ធច្បាប់ និងតុលាការ សំដៅឆ្លើយតបតម្រូវការរបស់ធុរជនជាតិ និងវិនិយោគិនអន្តរជាតិ ដែលកំពុងធ្វើប្រតិបត្តិការធុរកិច្ចនៅក្នុងប្រទេសកម្ពុជា។
លោករដ្ឋលេខាធិការ បានអំពាវនាវដល់សិក្ខាកាមទាំងអស់ ប្រឹងប្រែងយកចិត្តទុកដាក់ក្នុងការសិក្សា ជាពិសេសស្តាប់ការពន្យល់របស់វាគ្មិន ដើម្បីធ្វើឱ្យវគ្គបណ្តុះបណ្តាលដ៏មានសារសំខាន់នេះ ក្លាយទៅជាវេទិកាចែករំលែកចំណេះដឹង និងបទពិសោធន៍ល្អៗ អំពីយន្តការដោះស្រាយវិវាទតាមរយៈច្បាប់មជ្ឈត្តការកម្ពុជា សម្រាប់យកទៅអនុវត្តន៍ឱ្យកាន់តែមានប្រសិទ្ធភាពខ្ពស់។
“យន្តការដោះស្រាយវិវាទក្រៅប្រព័ន្ធតុលាការនេះ វាបានជួយសម្រួលបន្ទុកចំណាយ និងជួយពន្លឿនពេលវេលាក្នុងការដោះស្រាយជម្លោះសម្រាប់ធុរជន ពេលមានវិវាទកើតឡើង ហើយវាមិនមែនជាការប្រកួតប្រជែងជាមួយយន្តការប្រព័ន្ធតុលាការទេ ប៉ុន្តែវាជាការបំពេញបន្ថែមឱ្យប្រព័ន្ធយុត្តិធម៌”លោក ឱក ប៊ុង មានប្រសាសន៍បន្ថែម។
គួររំលឹកដែរថា ដើម្បីលើកកម្ពស់បរិយាកាសធុរកិច្ច និងវិនិយោគ រាជរដ្ឋាភិបាលកម្ពុជា ដែលមានក្រសួងពាណិជ្ជកម្ម ជាសេនាធិការ បានផ្ដួចផ្ដើមបង្កើតមជ្ឈមណ្ឌលជាតិ នៃមជ្ឈត្តការផ្នែកពាណិជ្ជកម្ម នៅក្នុងឆ្នាំ២០១៣។ បច្ចុប្បន្ន មជ្ឈមណ្ឌលជាតិនេះ បានកំពុងផ្តល់សេវាផ្លូវច្បាប់ជូនធុរជន និងវិនិយោគិនគ្រប់ជាតិសាសន៍ ដោយប្រើប្រាស់មជ្ឈត្តករម្នាក់ ឬច្រើន ដើម្បីដោះស្រាយរាល់វិវាទអាជីវកម្មក្រៅប្រព័ន្ធតុលាការ ដែលមានរយៈពេលយូរ និងច្រើនដំណាក់កាល ៕ ដោយ ៖ បញ្ញាស័ក្តិ
