កំពង់ធំ ៖ លោកឧត្តមសេនីយ៍ទោ ស្នងការនគរបាលខេត្តកំពង់ធំ បានក្រើនរំលឹក ដល់កងកម្លាំងថ្នាក់មូលដ្ឋានបន្តយកចិត្តទុកដាក់ការងារសំខាន់ៗតាមមូលដ្ឋានទូទាំងខេត្តកំពង់ធំ ។
បន្ទាប់ពីលោកឧត្តមសេនីយ៍ទោ អ៊ុក កុសល ស្នងការនគរបាលខេត្តកំពង់ធំ បានអញ្ជើញចូលរួម កិច្ចប្រជុំ ស្ដីពី ការត្រៀមរៀបចំ ពិធីអបអរសាទរខួបលើកទី១៥៦ ទិវាពិភពលោកកាកបាទក្រហម អឌ្ឍចន្ទក្រហម ៨ ឧសភា ឆ្នាំ២០១៩ ក្រោមអធិបតីភាព លោកសុខ លូ ប្រធានគណៈកម្មាធិការសាខា កាកបាទក្រហមកម្ពុជាខេត្តកំពង់ធំ នៅសាលប្រជុំរដ្ឋបាលសាលាខេត្តកំពង់ធំ កាលពីព្រឹកថ្ងៃទី ២៣ ខែ មេសា ឆ្នាំ២០១៩ ។ លុះដល់វេលាម៉ោង ១៥ និង១០ នាទី ថ្ងៃ អង្គារ ៤រោច ខែ ចេត្រ ឆ្នាំ កុរ ឯកស័ក ព.ស២៥៦២ ត្រូវនិង ថ្ងៃទី ២៣ ខែ មេសា ឆ្នាំ២០១៩ លោកឧត្តមសេនីយ៍ទោ អ៊ុក កុសល ស្នងការនគរបាលខេត្តកំពង់ធំ បានដឹកនាំកិច្ចប្រជុំផ្សព្វផ្សាយការងារ ទ្រទ្រង់កាកបាទក្រហមកម្ពុជា គឺតម្រូវអោយបងប្អូនកងកម្លាំងនគរបាលទូទាំងខេត្តកំពង់ធំ បន្តចូលរួមគាំទ្រអោយអស់ពីកម្លាំងកាយនិងកម្លាំងចិត្ត ដែលជាការងារសំខាន់បំផុត ក្នុងសកម្មភាពសង្គម ។
ដែលជាបន្តបន្ទាប់ លោកសុខ លូ ប្រធានគណៈកម្មាធិការសាខា កាកបាទក្រហមកម្ពុជាខេត្តកំពង់ធំ បានដឹកនាំក្រុមការងារកាកបាទក្រហមកម្ពុជា សាខាខេត្តកំពង់ធំ ចុះដល់មូលដ្ឋានទូទាំងខេត្តកំពង់ធំ ដើម្បីសំណេះសំណាលសួរសុខទុក្ខ និងនាំយកអំណោយសំភារ:សប្បុរសធម៌ ឧបត្ថម្ភដល់បងប្អូនប្រជាពលរដ្ឋ លោកយាយ លោកតាចាស់ជរា ដែលមានជីវភាពទីទាល់ក្រលំបាកខ្វះមុខខ្វះក្រោយ ។
ឆ្លៀតក្នុងឱកាសនោះដែរ លោកឧត្តមសេនីយ៍ទោ អ៊ុក កុសល ស្នងការនគរបាលខេត្តកំពង់ធំ បន្តការណែនាំក្រើនរំលឹកដល់អស់លោកនាយការិយាល័យជំនាញ លោកអធិការនគរបាលស្រុក-ក្រុង បន្តធ្វើការត្រួតពិនិត្យមន្រី្តក្រោមឱវាទខ្លួន អោយបានគ្រប់ជ្រុងជ្រោយ ព្រមទាំងនៅ តាមបណ្ដាអធិការដ្ឋាននគរបាលស្រុក-ក្រុងត្រូវឧស្សាហ៍ពង្រឹងនិងត្រួតពិនិត្យកងអន្តរាគមន៍សម្រាប់ត្រៀមកិច្ចអន្តរាគមន៍ ថែរក្សាសន្តិសុខ សណ្តាប់ធ្នាប់សង្គម ក្នុងមូលដ្ឋានរបស់ខ្លួនគ្រគឺជាការបំរើសេចក្តីសុខ សេចក្តីចម្រើនដល់ប្រជាពលរដ្ឋ ដែលជាសេចក្ដីប្រាថ្នាចាំបាច់ របស់មនុស្សផងទាំងពួង ព្រមទាំងបន្តត្រៀមខ្លួនរួចជាស្រេចក្នុងកិច្ចអន្តរាគមន៍ ចុះជួយចែកស្អាតជូន ដល់ប្រជាពលរដ្ឋ ទូទាំងខេត្តកំពង់ធំ នៅពេលដែលប្រជាពលរដ្ឋ ខ្វះខាតទឹកស្អាតសម្រាប់ប្រើប្រាស់ និងបរិភោគជាប្រចាំថ្ងៃ ដោយរដូវនេះជារដូវប្រាំង អាកាសធាតុក្ដៅហួតហែង នៅ២០១៩ ព្រះរាជាណាចក្រកម្ពុជា ទទួលរងឥទ្ធិពលដោយប្រយោល នៃបាតុភូតអែលនីណូ (El Nino) ឥទ្ធិពលនេះបានបង្កអោយមានការប្រែប្រួលសីតុណ្ហភាព ក្ដៅហួតហែង ៕ ដោយ ៖ កូឡាប
