ភ្នំពេញ ៖ ស្របពេលដែលប្រទេសកម្ពុជាកំពុងតែឡើងកម្ដៅយ៉ាងកំហុកហើយធ្វើឲ្យប្រជាពលរដ្ឋមួយចំនួនរអ៊ូររទាំនោះ លោក ទិត្យ សុធា អ្នកនាំពាក្យទីស្តីការគណៈរដ្ឋមន្ត្រី បានចូលខ្លួនមកបរិយាយថា សម័យប៉ុលពតមេឃក្ដៅហែង គេម្ដេចក៏រស់បាន ចុះឥឡូវម៉េចថ្ងូ ។ ជាមួយនឹងការលើកឡើងខាងលើនេះលោកវីល្លាមដែលជាសមាជិកឧត្តមក្រុមប្រឹក្សាពិគ្រោះនិងផ្ដល់យោបល់និងជាប្រធានគណបក្សខ្មែរក្រោក បានឆ្លើយតបតាមរយៈសារនេះថាលោកកុំប្រៀបធៀបសមយឥឡូវទៅនឹងសម័យអតីតកាល។
នៅលើបណ្ដាញសង្គមហ្វេសប៊ុកផ្លូវការ លោកវីល្លាមនៅថ្ងៃទី 26 ខែមេសានេះ បានបញ្ជាក់ថា សម្រាប់ខ្ញុំអាកាសធាតុហួតហែងក៏មិនក្ដៅប៉ុន្មានដែរ តែឮលោកនិយាយអញ្ចឹងក្ដៅចិត្តតែម្ដង ដែលលោកចេះតែយកបច្ចុប្បន្នទៅធៀបនឹងអតីតកាល ។
លោកបានបន្ថែមថា សម័យនេះសម័យអីហើយ ? គឺសម័យក្រោមការដឹកនាំរបស់សម្ដេចតេជោ មិនមែនកម្ពុជាក្រោមការដឹកនាំរបស់ សាឡុត ស នោះទេ , បច្ចុប្បន្ននេះ សាំង និង អគ្គីសនីត្រូវបានចាត់ទុកជា ច្រវ៉ាក់នៃសេដ្ឋកិច្ច កាលណាច្រវ៉ាក់ដាច់ កង់មិនអាចវិលទៅមុខបានទេ , ពេលដាច់អគ្គីសនី សេវាទូរស័ព្ទ សេវាអ៊ិនធើណេត គឺរអាក់រអួល , សង្វាក់ផលិតកម្ម សិប្បកម្ម ឧស្សាហកម្ម គឺរអាក់រអួល នាំអោយសេដ្ឋកិច្ចមានភាពរាំងស្ទះបន្តិចដែរ តែធ្វេីយ៉ាងម៉េចបេីបញ្ហានេះជាកត្តាធម្មជាតិ ភាពខ្វះខាតប្រាកដជាមាន តែបញ្ហានេះពលរដ្ឋគាត់យល់បានថា មកពីបាតុភូត El Lino ដែលបង្ករភាពក្ដៅមកលេីផែនដី ដែលធ្វេីអោយទឹករីងហួតនាំអោយទំនប់វារីអគ្គីសនីមិនអាចបំពេញនូវតម្រូវការអគ្គីសនីទាន់ពេលវេលា , លោកឯងចេះតែយកសម័យបច្ចុប្បន្នដែលមានសព្វបែបយ៉ាង និងមានតម្រូវការ ទៅធៀបនិងសម័យស្អីក៏គ្មាន លោកចង់យ៉ាងម៉េចវិញ ? ខ្ញុំបានឆែកហើយ ក្នុងអំឡុងឆ្នាំ ១៩៧៥ ដល់ ១៩៧៩ ស្ថេរភាពនៃកំរិតបរិស្ថាន គឺមិនក្ដៅដូចពេលនេះទេ ព្រោះអំឡុងគ្រានោះគ្មាន បាតុភូត El Lino ទេ ។
តែបេីមេឃវាក្ដៅខ្លាំងពលរដ្ឋគាត់មានសិទ្ធរអ៊ូខ្លះហេីយ មានទៅខុសស្អីគ្រាន់តែរអ៊ូសោះ លោកឯងប្រុងបិទមាត់គេ ?
សូមបញ្ជាក់ថា លោក ទិត សុធា អ្នកនាំពាក្យទីស្តីការគណៈរដ្ឋមន្ត្រី បានសរសេរលើហ្វេសប៊ុកកាលពីល្ងាច ថ្ងៃទី២៥ ខែមេសា ថា សម័យប៉ុល ពត នៅពេលគេបង្ខំឱ្យធ្វើការទាំងថ្ងៃក្តៅហែង យប់គ្មានពេលសម្រាក រស់នៅមិនបានជុំគ្រួសារ គ្មានម៉ាស៊ីនត្រជាក់ គ្មានកង្ហារ គ្មានភ្លើងប្រើប្រាស់ គ្មានចំណីអាហារគ្រប់គ្រាន់ ម៉េចក៏ចេះតស៊ូរស់បាន ចុះពេលនេះ គ្រាន់តែខកខានប្រើប្រាស់ភ្លើងមួយរយៈ ហេតុអ្វីក៏ស្រែកថ្ងូរយ៉ាងនេះ? អាចមកពីធ្លាប់បានរស់នៅសុខស្រួល ទើបពិបាកទ្រាំនឹងការលំបាក។
បើតាមលោកទិត សុធា ទោះយ៉ាងណា រាជរដ្ឋាភិបាលបាន និងកំពុងប្រឹងប្រែងដោះស្រាយបញ្ហាភ្លើងអគ្គីសនីដែលនាំឱ្យពលរដ្ឋប្រឈមនឹងការលំបាកខ្លះៗនេះ និងបានសូមការយោគយល់ អភ័យទោសចំពោះបញ្ហាដែលបានកើតឡើង និងសូមបងប្អូនប្រជាពលរដ្ឋអត់ធ្មត់។ បញ្ហាខ្វះខាតភ្លើងនឹងត្រូវបានដោះស្រាយក្នុងពេលឆាប់ៗ។
ជាការពិតដាច់ភ្លើងដូចតែគ្នា មិនថា ផ្ទះប្រជាពលរដ្ឋ ឬរដ្ឋមន្ត្រី ឬក៏ថ្នាក់ដឹកនាំរូបណាទេ ផ្ទះខ្ញុំក៏ដាច់ភ្លើងដែរពេលនេះ!!!៕ ដោយ៖កូឡាប
