ខេត្តក្រចេះ ៖ កម្លាំងជំនាញអធិការដ្ឋាននគរបាលស្រុកស្នួល សហការជាមួយកំលាំងប៉ុស្តិ៍នគរបាលរដ្ឋបាលឃុំគ្រញូងសែនជ័យ បានធ្វើការចុះបង្ក្រាបករណីប្រើប្រាស់ដោយខុសច្បាប់នូវសារធាតុញៀន នៅចំណុច ភូមិគ្រញូងសែនជ័យ ឃុំគ្រញូងសែនជ័យ ស្រុកស្នួល ខេត្តក្រចេះ កាលពីយប់ថ្ងៃទី៣០ ខែមេសា ឆ្នាំ២០១៩នេះ។
ជនប្រុសស្រី៤នាក់ ក្នុងមានស្រី២នាក់ សុទ្ឋសឹងជាមុខសញ្ញា ជួញដូរគ្រឿងញៀន ត្រូវបាននគរបាលស្រុកស្នួល កំណត់មុខសញ្ញា និងធ្វើការចាប់ឃាត់ខ្លួន រួម មាន ១.ឈ្មោះ ធឿន ប៊ុនថេត ភេទប្រុស អាយុ៣៩ឆ្នាំ ទី២.ឈ្មោះ ចិន ចាន់ណា ភេទប្រុស អាយុ៣៤ឆ្នាំ ទី៣.ឈ្មោះ អូន កាន់និកា ភេទស្រី អាយុ១៨ឆ្នាំ និង៤.ឈ្មោះ ស្រេង វី ភេទស្រី អាយុ៣៥ឆ្នាំ។ ពួកគេរស់នៅឃុំគ្រញូងសែនជ័យ ស្រុកស្នួល។ ជាមួយនិងការឃាត់ខ្លួនជនទាំងនេះ នគរបាលក៏បានរកឃើញនិងដកហូតបាន ម្ស៉ៅក្រាមពណ៌សសង្ស័យ ជាគ្រឿងញៀនមេតំហ្វាតាមីន ចំនួន២០កញ្ចប់(០១កញ្ចប់ធំ, ១៩កញ្ចប់តូច) និងថ្នាំគ្រាប់ពណ៌ក្រហមចំនួន០៧គ្រាប់។ ព្រមទាំងឧបករណ៍ សម្រាប់បម្រើឲ្យបទល្មើសគ្រឿងញៀនមួយចំនួនទៀត។
បច្ចុប្បន្ន ជនសង្ស័យទាំង ៤នាក់ រួមទាំងវត្ដុតាងត្រូវ បានឃាត់ខ្លួននៅ អធិការដ្ឋាននគរបាលស្រុកស្នួល នឹងកំពុងកសាងសំណុំរឿង បញ្ជូនទៅកាន់ការិយាល័យជំនាញខេត្ត នៅរសៀលថ្ងៃទី១ ខែឧសភា ឆ្នាំ២០១៩ ដើម្បីចាត់ការបន្តតាមនីតិវិធី៕ ដោយ ៖ កូឡាប
