តាម Washington Post ចារកិច្ចអាមេរិក ធ្លាប់បានរកឃើញនាវាផ្ទុកទំនិញមួយគ្រឿងមានផ្ទុកគ្រាប់ប្រឆាំរថក្រោះរាប់ម៉ឺនគ្រាប់របស់កូរ៉េខាងជើង ដែលបញ្ជូនទៅដល់អេហ្ស៊ីប កាលពីខែសីហា ប៉ុន្តែនៅពុំទាន់ដឹងច្បាស់ពីអ្នកស្និទពីក្រោយការកុម្មង់ទិញអាវុធនេះជានរណា?
ហេតុការណ៍នេះបានកើតឡើង កាលពីខែសីហា ឆ្នាំ២០១៧ ក្រោយពេលចារកិច្ចអាមេរិកពិនិត្យឃើញនាវាដឹកទំនិញ Jie Shun របស់កូរ៉េខាងជើង ឆ្លងកាត់ព្រែកជីក Suez តែគេតុបតែងវាមើលពីក្រៅដូចជានាវារបស់កម្ពុជា ។
ក្រុងវ៉ាស៊ីនតោនបានប្រកាសប្រាប់ភ្លាមៗដល់ក្រុង Cairo ហើយការឆែកឆេរបានប្រព្រឹត្តទៅនៅសមុទ្រអេហ្ស៊ីព ។ លទ្ធផលគឺគ្រាប់កាំភ្លើងប្រឆាំងរថក្រោះជាង ៣០.០០០គ្រាប់ ត្រូវបានឃើញក្នុងធុងផ្ទុករ៉ែដែក ។
យោធភ័ណ្ឌត្រូវចាប់ឃាត់នៅអេហ្ស៊ីប មានតម្លៃប្រមាណ ២៣លានដុល្លារ
ជាក់ស្តែងមុននោះអាមេរិកបានសង្ស័យថា កូរ៉េខាងជើងនាំចេញអាវុធមកកាន់អេហ្ស៊ីបច្រើនលើក ហើយតាំងពីយូរមកហើយ ។ ហេតុនេះឯងទើបរដ្ឋការ Trump បានពន្យារពេលជាច្រើនលើកច្រើនសារក្នុងការផ្តល់ជំនួយយោធា តម្លៃ ៣០០លានដុល្លារ ឲ្យប្រទេសនេះ ។
ម្យ៉ាងទៀតទោះបីស្ថានទូតអេហ្ស៊ីបប្រចាំវ៉ាស៊ីនតោន ប្រកាសថា នឹងសហការក្នុងការទប់ស្កាត់ រុករកអាវុធដែលកូរ៉េខាងជើងនាំចេញក្តី ក៏អាមេរិកដឹងថា ប្រទេសនេះ តែងស្វែងរកវិធីដើម្បីបិទបាំង ជំនួញអាវុធរបស់កូរ៉េខាងជើងដែរ ។ ដូច្នេះឯងទើបដល់ពេលអាមេរិកចង្អុលចំៗនោះទើបសមត្ថកិច្ចអេហ្ស៊ីពអនុវត្តការឆែកឆេរ និងរកឃើញយុទ្ធភ័ណ្ឌខាងលើ ។
គួររំលឹកថា ក្រៅពីជំនួញអាវុធ អង្គការសហប្រជាជាតិនៅបានដាក់ទណ្ឌកម្មផ្សេងៗទៀត លើទង្វើសាកល្បងកាំជ្រួច និងនុយក្លេអ៊ែររបស់ក្រុងព្យុងយ៉ាង ៕