ភ្នំពេញ៖ នាពេលថ្មីៗកន្លងទៅនេះ សមាគមន៍ស្វាយចន្ទីវៀតណាម បានមកជួបពិភាក្សាជាមួយលោករដ្ឋមន្ត្រីក្រសួងកសិកម្ម ដើម្បីសិក្សាពីលទ្ធភាពក្នុងការវិនិយោគដាំ និងចុះកិច្ចសន្យាប្រមូលទិញផលិតផលស្វាយចន្ទី ពីកម្ពុជា រួចនាំចេញទៅប្រទេសវៀតណាម ជាលក្ខណៈផលិតផលសម្រេច ឬជាវត្ថុធាតុដើមឲ្យបាន ១ លានតោនក្នុង១ឆ្នាំ នាពេលអនាគត។
ក្នុងជំនួបជាមួយលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទកាលពីពេលថ្មីៗនេះ លោក ឧកញ៉ា ឡេង ឬទ្ធី ប្រធានសម្ព័ន្ធកៅស៊ូវៀតណាមប្រចាំព្រះរាជាណាចក្រកម្ពុជា បានមានប្រសាសន៍ តាមអ្វីដែលអគ្គលេខានៃស្ថានទូតវៀតណាម ប្រចាំព្រះរាជាណាចក្រកម្ពុជា ទទួលបន្ទុកការងារពាណិជ្ជកម្ម បានជម្រាបជូនលោករដ្ឋមន្ត្រីជ្រាបថា ក្នុង១ឆ្នាំៗវៀតណាមបាននាំចូលគ្រាប់ស្វាយចន្ទីពីកម្ពុជាប្រមាណជាង ១០០ពាន់តោន ក្នុងនោះកម្ពុជាផលិតបាន១០៤ពាន់តោនក្នុងឆ្នាំ២០១៦។
លោកវេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទ បានអនុញ្ញាឲ្យលោក ឧកញ៉ា ឡេង ឬទ្ធី ប្រធានសម្ព័ន្ធកៅស៊ូវៀតណាមប្រចាំព្រះរាជាណាចក្រកម្ពុជា និងសហការីចូលជួបសម្តែងការគួរសម ពិភាក្សាការងារ និងរាយការណ៍ជូនជ្រាបពីដំណើរការនៃការរៀបចំឯកសារ ពាក់ព័ន្ធសំខាន់ៗ ដូចជាឯកសារចុះអនុស្សរណៈយោគយល់គ្នា ឯកសារសម្របសម្រួលនៃការធ្វើកសិកម្មតាមកិច្ចសន្យារវាងភាគីទាំងពីរ ដើម្បីឈានទៅធ្វើការប្រមូលទិញស្វាយចន្ទីពីប្រទេសកម្ពុជារួចនាំចេញទៅប្រទេសវៀតណាម។
ក្នុងឱកាសមកទស្សនកិច្ចនៅកម្ពុជានេះសមាគមន៍ស្វាយចន្ទីវៀតណាមបានសន្យាថានឹងផ្តល់ជូនពូជស្វាយចន្ទីចំនួន១លានកូន ដល់ភាគីកម្ពុជានិងបានសន្យាថានឹងបញ្ជូនអ្នកជំនាញមកសិក្សានិងវាយតម្លៃលើស្ថានភាពដី និងសក្តានុពលលើការដាំដុះស្វាយចន្ទីនេះនៅតាមបណ្តាខេត្តមួយចំនួន។
ទាក់ទងនិងប្រធានបទនេះលោករដ្ឋមន្ត្រី បានជម្រាបជូនសមាគមន៍វៀតណាមតាមរយៈលោកឧកញ៉ាថា ក្រសួងកសិកម្ម រុក្ខាប្រមាញ់និងនេសាទ រង់ចាំស្វាគមន៍ និងសហការចំពោះគម្រោងប្រមូលទិញផលិតផលស្វាយចន្ទីដើម្បីនាំចេញទៅកាន់ប្រទេសវៀតណាម ពីព្រោះគម្រោងនេះគឺជួយនាំយកផលិតផលនេះទៅកាន់ទីផ្សារ កាលណាកសិផលមានទីផ្សារកសិករនឹងបន្តធ្វើការដាំដុះដោយឈរលើគោលការណ៍នៃការអនុវត្តកសិកម្មតាមកិច្ចសន្យា វិធីនេះអាចនឹងជួយកសិករឬម្ចាស់ចំការធ្វើការបង្កើនទិន្នផលតាមរយៈការអនុវត្តបច្ចេកទេសទំនើប (ពូជ ជី ថ្នាំ) ជាពិសេសបច្ចេកវិទ្យាក្រោយពេលប្រមូលផលសំដៅដល់ការកាត់បន្ថយកំហាតបង់ទុនផលិត និងបង្កើនចំណូល។ ម្យ៉ាងវិញទៀតឯកឧត្តមរដ្ឋមន្ត្រីក៏បានសង្កត់ធ្ងន់ថាប្រសិនបើគម្រោងនេះដំណើរទៅដោយរលូន នោះគឺឆ្លើយតបបានយ៉ាងពេញទំហឹងទៅនិងគោលនយោបាយរបស់រាជរដ្ឋាភិបាលស្តីពីការបង្កើននិងជំរុញការនាំចេញផលិតផលកសិកម្ម ក្នុងចេតនាប្រែក្លាយប្រទេសមួយនេះពីប្រទេសដែលមានចំណូលមធ្យមកំរិតទាបទៅជាប្រទេសដែលមានចំណូលមធ្យមកំរិតខ្ពស់នាឆ្នាំ២០៣០។ ទន្ទឹមនឹងនេះឯកឧត្តមរដ្ឋមន្ត្រី បានស្នើឲ្យភាគីទាំងពីររៀបចំសមាសភាពក្រុមការងារជំនាញពាក់ព័ន្ធ ដើម្បីរៀបចំឯកសារចុះអនុស្សារណៈយោគយល់គ្នា ឯកសារសម្របសម្រួលនៃការធ្វើកសិកម្មតាមកិច្ចសន្យារ ធ្វើយ៉ាងណាឲ្យសមាគមន៍អាចចុះប្រមូលទិញគ្រាប់ស្វាយចន្ទីទាន់រដូវប្រមូលផលនាខែមិនា និងមេសាខាងមុខ៕ ដោយ៖បញ្ញាស័ក្តិ
