ភ្នំពេញ៖ លោកស្រីគឹម សេដ្ឋានី រដ្ឋលេខាធិការក្រសួងអប់រំ យុវជន និងកីឡា បានចេញសេចក្តីជូនដំណឹង ដោយបានអំពាវនាវដល់សាធារណជន ជាពិសេស សិស្ស និងនិស្សិត ឲ្យអញ្ជើញចូលរួមទស្សនា ការតាំងពិព័រណ៍វត្ថុសិល្បៈធ្វើអំពីមាស និងប្រាក់របស់ខ្មែរបុរាណ នៅសារមន្ទីរជាតិរាជធានីភ្នំពេញ ដែលមានរយៈពេល១ខែ ចាប់ពីថ្ងៃទី៥ ខែមករា ដល់ថ្ងៃទី៥ ខែកុម្ភៈ ឆ្នាំ២០១៨។
បើតាមការបញ្ជាក់របស់លោកស្រីគឹម សេដ្ឋានី ក្រសួងវប្បធម៌និងវិចិត្រសិល្បៈ បានរៀបចំតាំងពិព័រណ៍ ដើម្បីដាក់បង្ហាញនូវវត្ថុសិល្បៈធ្វើអំពីមាស និងប្រាក់របស់ខ្មែរបុរាណជាពិសេសគឺរំលឹកនូវគ្រឿងអលង្ការអំពីមាស នាសម័យអង្គរ ជាសម្បត្តិបេតិកភណ្ឌ ជូនសាធារណជនចូលទស្សនានៅសារមន្ទីរជាតិ រាជធានីភ្នំពេញ។
ជាមួយគ្នានោះដែរ ពិធីសំពះគ្រូ និងការតាំងពិព័រណ៍គ្រឿងអលង្ការខ្មែរបុរាណ រយៈពេល១ខែ ពិព័រណ៍នេះ តាំងបង្ហាញ គ្រឿងអលង្ការ មាសសម្រាប់បំពាក់ ព្រះបដិមាសម័យអង្គរ ដែលព្រះរាជាណាចក្រកម្ពុជាទើបធ្វើមាតុភូមិនិវត្តន៍ពីទីក្រុងឡុងដ៍ ចក្រភពអង់គ្លេស កាលពីថ្ងៃទី២ ធ្នូ ឆ្នាំ២០១៧នេះ ត្រូវបានធ្វើឡើងកាលពីថ្ងៃទី៤ខែមករាឆ្នាំ២០១៨ ដែលមានលោកស្រី ម៉ែន សំអន ឧបនាយករដ្ឋមន្ដ្រី រដ្ឋមន្ដ្រីក្រសួងទំនាក់ទំនងជាមួយ រដ្ឋសភា ព្រឹទ្ធសភា និងអធិការកិច្ច ជាអធិបតី ។
លោកស្រី ម៉ែន សំអន បានបញ្ជាក់ថា៖ ពិព័រណ៍នេះ បានបង្ហាញឲ្យឃើញនូវវត្ថុពិចិត្រៗ ជាគ្រឿងអលង្ការ និងគ្រឿងលំអ ធ្វើពីមាស និងប្រាក់ ដែលជាស្នាដៃសិល្បៈខ្មែរ បុរាណដ៏វិចិត្រ និងគំនិតឆ្នៃប្រឌិតនៃគ្រូ និង សិល្បករខ្មែរពីជំនាន់មួយទៅជំនាន់មួយ។
លោកស្រី ភឿង សកុណា រដ្ឋមន្ដ្រីក្រសួងវប្បធម៌និងវិចិត្រសិល្បៈ បានបញ្ជាក់ថា៖ ពិព័រណ៍នេះ គឺមានគោលបំណងដ៏ធំមួយដែល ក្រសួងវប្បធម៌ និងវិចិត្រសិល្បៈ មានមោទនភាព បានវត្ថុដែលមានតម្លៃមិនអាចកាត់ផ្លៃ របស់ខ្មែរ ពីបរទេស មកដាក់តាំង ឲ្យបងប្អូនប្រជាពលរដ្ឋ បានទស្សនា នៅពេលនេះ ដូចជាគ្រឿង អលង្ការដ៏កម្រ និងប្រណិតធ្វើអំពីមាស ដែលដូនតាខ្មែរ បានរចនា ដើម្បីពាក់លំអដល់ព្រះបដិមាព្រហ្មញ្ញសាសនា និងពុទ្ធសាសនា។ វត្ថុបុរាណទាំងនេះពិតជាគូសបញ្ជាក់ពីអរិយធម៌ដ៏រុងរឿង និងយូរអង្វែងរបស់កម្ពុជា ដែលធ្លាប់ជាអតីតអធិរាជាណាចក្រមួយនៅអាស៊ី។ នេះជាលើកទី១ហើយ ដែលកម្ពុជា មានមោទនភាព ទទួល វត្ថុដែលមានតម្លៃមិនអាចកាត់ផ្លៃបានពីបរទេស ហើយបានមកដាក់តាំងបង្ហាញឲ្យបងប្អូនប្រជាពលរដ្ឋកម្ពុជាបានយល់ដឹង និងស្វែងយល់កាន់តែច្បាស់ ពីតម្លៃវប្បធម៏របស់ខ្មែរនាសម័យបុរាណ។
លោកស្រីក៏បានស្នើដល់អាជ្ញាធរពាក់ព័ន្ធទាំងអស់ សូមមេត្តាចូលរួមថែ រក្សា និងការពារវត្ថុបុរាណដ៏មានតម្លៃដែលតាំងនៅទីនេះ ក៏ដូចជាវត្ថុបុរាណជាតិ ទាំងអស់ឱ្យបានគង់វង្ស ព្រោះវត្ថុទាំងនេះ សុទ្ធតែមានប្រវត្តិដ៏យូរលង់ និងមានបារមីសក្តិសិទ្ធជួយប្រោះព្រំព្រះរាជាណាចក្រកម្ពុជាយើង ឱ្យបាន សុខក្សេមក្សាន្ត ត្រជាក់ត្រជុំ និងមានការអភិវឌន្ឍន៍តរៀងទៅ៕ ដោយ ៖ កូឡាប
