ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រី បានថ្លែងថា ដើម្បីដោះស្រាយនូវការលំបាក និងជួយលើកកំពស់ជីវភាប្រជាជន ពិសេសសម្រួលដល់ការធ្វើដំណើរ ទៅមករបស់ប្រជាពលរដ្ឋ ចាប់ពីម៉ោង ០០:០០ នាទី ថ្ងៃទី ១៥ ខែ តុលា ឆ្នាំ ២០១៧ នេះតទៅ ស្ពាន និងផ្លូវតភ្ជាប់ពីផ្លូវជាតិលេខ ៦ A ទៅផ្លូវជាតិលេខ ៥ ( ស្ពាន និងផ្លូវ លី យ៉ុងផាត់ ព្រែកព្នៅ ) នឹងត្រូវធ្វើដំណើរដោយមិនបាច់បង់ថ្លៃឆ្លងកាត់ទៀតទេ រាជរដ្ឋាភិបាលនឹងទិញយកមកគ្រប់គ្រងវិញ ។ សម្តេចតេជោ លើកឡើងបែបនេះ ក្នុងផេកហ្វេសប៊ុកផ្លូវការ នៅថ្ងៃទី៥ខែតុលាឆ្នាំ២០១៧។
សម្តេចតេជោ បានមានប្រសាសន៍ថា ក្រសួងសេដ្ឋកិច្ច និងហិរញ្ញវត្ថុ ក្រសួងសាធារណការ និងដឹកជញ្ជូន សាលារាជធានីភ្នំពេញនិងស្ថាប័នពាក់ព័ន្ធត្រូវពិភាក្សាជាមួយក្រុមហ៊ុនដើម្បីពិនិត្យដោះស្រាយបញ្ហាមួយចំនួនដែលនៅសេសសល់ ។
សង្ឃឹមថាប្រជាពលរដ្ឋ យើងនឹងទទួលបានផលប្រយោជន៍ពីការសម្រេចនេះ។
ស្ពានព្រែកព្នៅនេះជាការវិនិយោគរបស់ក្រុមហ៊ុន L.Y. P. Group របស់លោកឧកញ៉ា លី យ៉ុងផាត់ ដែលមានប្រវែង ៩៩៦,២ ម៉ែត្រ និង ទទឹងប្រវែង ១៤ ម៉ែត្រ ចំណាយថវិកាអស់ចំនួន ៤៣.៥៥០.០០០ ដុល្លារ ។ ស្ពាននេះចាប់ផ្តើមបើកការដ្ឋានស្ថាបនានៅថ្ងៃទី ១៥ ខែមិថុនា ឆ្នាំ ២០០៨ ហើយត្រូវបានសម្ពោធដាក់ឱ្យប្រើប្រាស់នៅថ្ងៃទី ២០ ខែកញ្ញា ឆ្នាំ ២០១០ ក្រោមអធិបតីភាពសម្តេចនាយករដ្ឋមន្ត្រី ហ៊ុន សែន ៕ ដោយ៖ជាលី
