បន្ទាយមានជ័យ ៖ ក្មេងឈាមរាវ២នាក់ ដែលទំនងជាបើកបរទាំងស្រវឹងខ្លាំងបានអោយម៉ូតូ MSX របស់ពួកគេទៅបុកគោយន្តពីក្រោយបណ្តាលឲ្យរងរបួសធ្ងន់ទាំង២នាក់ កាលពី ម៉ោង៨យប់ថ្ងៃទី៨ ខែមករាឆ្នាំ២០១៨ នៅចំនុចតាមបណ្តោយផ្លូវជាតិលេខ៥៦ នៅមុខគ្រឹះស្ថានមីក្រូហិរញ្ញវត្ថុស្ថាបនា ភូមិរលួស ឃុំរលួស ស្រុកស្វាយចេក ខេត្តបន្ទាយមានជ័យ។
លោកវរសេនីយ៍ ជ័យសុកា មេបញ្ជាការមូលដ្ឋានកងរាជអាវុធហត្ថស្រុកស្វាយចេកបានឲ្យដឹងថា ៖ ស្ទាវទាំង២នាក់ ១.ឈ្មោះ សាន មឿត ភេទប្រុសអាយុ១៩ឆ្នាំ រស់នៅ ភូមិតាអុង ឃុំស្វាយចេក ស្រុកស្វាយចេក ខេត្តបន្ទាយមានជ័យ ជាអ្នកបើករបួសបាក់ភ្លៅស្តាំនិងបែកក្បាល។ ២.ឈ្មោះ ភាព រតនា ភេទប្រុស អាយុ១៧ឆ្នាំ រស់នៅភូមិឃុំជាមួយគ្នា របួសបែកក្បាលធ្ងន់។
នៅមុនពេលកើតហេតុនោះមានយុវជន២នាក់បានជិះម៉ូតូម៉ាក MSX ពណ៌ខ្មៅ សេរី២០១៥ ពាក់ស្លាកលេខបន្ទាយមានជ័យ1O 8036 បើកក្នុងសភាពស្រវឹងខ្លាំង ដោយគ្មានពាក់មួកសុវត្ថិភាព ហើយល្បឿនលឿន ក៏ទៅបុកគោយន្តកន្ត្រៃ ចតចោលនៅចិញ្ចើមផ្លូវ។ ជនទាំង២នាក់ រងរបួសធ្ងន់ទាំង២នាក់៕ ដោយ ៖ បន្ទាយ
