ភ្នំពេញ៖ លោកនាយឧត្តមសេនីយ៍ សៅ សុខា ប្រធានសហព័ន្ធកីឡាបាល់ទាត់កម្ពុជា មានប្រសាសន៍សំណេះសំណាលជាមួយក្រុមកីឡាករកម្ពុជាអាយុក្រោម១៩ឆ្នាំ ក្រោយបញ្ចប់ការប្រកួតរបស់ក្រុមយុវជនកម្ពុជា ដែលបានយកឈ្នះក្រុមយុវជនថៃ ដោយលទ្ធផលបច្ចេកទេស ២ទល់១ នាល្ងាចថ្ងៃទី៨ ខែវិច្ឆិកា ឆ្នាំ២០១៩ នៅពហុកីឡដ្ឋានជាតិអូឡាំពិក នៃការទទួលធ្វើម្ចាស់ផ្ទះវគ្គជម្រុះក្នុងពូល G ព្រឹត្តិការណ៍ AFC U-19 Championship 2020។
ប្រសាសន៍ទាំង ៣ចំណុចសំខាន់ៗរបស់លោកមប្រធានសហព័ន្ធកីឡាបាល់ទាត់កម្ពុជា រួមមាន៖ ទី១-ពេលដែលយើងលេង ត្រូវរក្សាមិត្តភាព ទុកចិត្តគ្នា ដោយបាល់ទាត់លេងម្នាក់ឯងមិនកើតទេ គឺត្រូវលេងរួមគ្នាជាក្រុម ត្រូវជួយគ្នា ហើយអ្នកដែលមិនទទួលការបន្ទោសនោះ ក៏ត្រូវដឹងថាខ្លួនឯងត្រូវធ្វើអ្វីឲ្យល្អទៅមុខទៀត។ ទី២-គឺបច្ចេកទេសបូកជាមួយកម្លាំង ប្រសិនបើគ្មានកម្លាំង ក៏ប្រើបច្ចេកទេសមិនកើតដែរ និងចំណុចសំខាន់ទី៣ គឺដាច់ខាតកុំមើលស្រាលគូប្រកួត ជាក់ស្តែងដូចការប្រកួតជាមួយក្រុមយុវជនថៃថ្ងៃនេះ គឺខាងថៃគេសំឡឹងមកយើងថាអាចយកឈ្នះយើង ប៉ុន្តែលទ្ធផលចុងក្រោយផ្ទុយពីការរំពឹងទុករបស់គេ។
លោកផ្តល់អនុសាសន៍ដល់ក្រុមកីឡាករបាល់ទាត់ទាំងអស់ថា ទោះបីជាការប្រកួតត្រូវប៉ះជាមួយក្រុមខ្លាំងក៏ដោយ ខ្សោយក៏ដោយ សំខាន់បំផុតគឺត្រូវខិតខំឲ្យអស់ពីសមត្ថភាព ហើយសម្រាប់ការប្រកួតចុងក្រោយនៃវគ្គសន្សំពិន្ទុ ពូល G នេះ ត្រូវប្រឹងប្រែង និងដណ្តើមឲ្យបាននូវជ័យជម្នះគ្រាប់ច្រើនទៀត គឺរិតតែល្អ។ លោកប្រធានសហព័ន្ធបាល់ទាត់កម្ពុជា សម្តែងការស្តោកស្តាយ ដែលចាញ់ក្រុមម៉ាឡេស៊ី នៅថ្ងៃបើកឆាក ហើយប្រសិនប្រកួតនោះយើងយកបាន១ពិន្ទុស្មើ គឺជារឿងល្អ ប៉ុន្តែទោះយ៉ាងនេះក្តី ឯកឧត្តមបានលើកទឹកចិត្តដល់កីឡាករជម្រើសជាតិកម្ពុជាត្រូវខិតខំប្រឹងប្រែងបន្តទៀត ដោយនិយាយពីរឿងឈ្នះសិន នាប្រកួតចុងក្រោយជាមួយក្រុមប្រ៊ុយណេ៕ដោយ៖កូឡាប
