ភ្នំពេញ៖ តាមរយៈអនុស្សរណនៃយោគយល់គ្នារវាង ក្រសួងការងារកម្ពុជា ជាមួយខេត្តអិហ៊ិម៉ិរបស់ប្រទេសជប៉ុន គឺកម្ពុជាគ្រោងនឹងបញ្ជូនកម្មសិក្សាការីចំនួន១.០០០នាក់ទៅបម្រើការងារនៅប្រទេសជប៉ុនក្នុងឆ្នាំ២០១៨នេះ។
ពិធីចុះហត្ថលេខាលើអនុស្សរណៈនៃការយោគយល់គ្នាស្តីពី ការបញ្ជូនកម្មសិក្សាការីបច្ចេកទេសទៅធ្វើកម្មសិក្សា
និងធ្វើការនៅខេត្តអិហ៊ិម៉ិ នៃប្រទេសជប៉ុន រវាងអគ្គនាយកដ្ឋានការងារ នៃក្រសួងការងារ និងបណ្តុះបណ្តាលវិជ្ជាជីវៈ និងសមាគមសហជីពកម្មសិក្សាការីបរទេសខេត្តអិហ៊ិម៉ិ នៃប្រទេសជប៉ុន នៅសណ្ឋាគារភ្នំពេញថ្ងៃច័ន្ទ ទី១៥ ខែមករា ឆ្នាំ២០១៨។
លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ដែលអញ្ជើញជាអធិបតី មានប្រសាសន៍ថា ទន្ទឹមនឹងការទាក់ទាញវិនិយោគិនបរទេស និងការខិតខំបង្កើតការងារក្នុងស្រុក រាជរដ្ឋាភិបាលក៏បានខិតខំស្វែងរកទីផ្សារការងារនៅបរទេសជូនបងប្អូនប្រជាពលរដ្ឋផងដែរ ជាពិសេសឱកាសការងារនៅប្រទេសជប៉ុន។ លើសពីនេះ យើងសង្កេតឃើញថានាពេលបច្ចុប្បន្ន ទំនាក់ទំនងទ្វេភាគីរវាងព្រះរាជាណាចក្រកម្ពុជា និងប្រទេសជាមិត្តនានា កាន់តែមានភាពល្អប្រសើរជាលំដាប់។ ជាក់ស្តែង កាលពីថ្ងៃទី៩ ដល់ថ្ងៃទី១១ ខែកក្កដា ឆ្នាំ២០១៧ កន្លងទៅនេះ។
លោករដ្ឋមន្ត្រីបានដឹកនាំគណៈប្រតិភូក្រសួងការងារ និងបណ្តុះបណ្តាលវិជ្ជាជីវៈទៅធ្វើទស្សនកិច្ចសិក្សានៅប្រទេសជប៉ុន ដើម្បីស្វែងយល់បន្ថែមនូវលក្ខខណ្ឌការងារ ច្បាប់ និងបទបញ្ញត្តិផ្សេងៗ សំដៅធ្វើយ៉ាងណាដើម្បីធានាថាកម្មសិក្សាការីខ្មែរអាចទទួលបាននូវលក្ខខណ្ឌការងារ និងការការពារសិទ្ធិរបស់ពួកគាត់ឱ្យបានល្អប្រសើរនៅទីនោះ។ នៅក្នុងដំណើរទស្សនកិច្ចនេះ ក្រសួងការងារ និងបណ្តុះបណ្តាលវិជ្ជាជីវៈ ក៏បានចុះអនុស្សរណៈនៃកិច្ចសហប្រតិបត្តិការលើកម្មវិធីបណ្តុះបណ្តាលកម្មសិក្សាការីជំនាញបច្ចេកទេស ជាមួយក្រសួងយុត្តិធម៌ ក្រសួងការបរទេស និងក្រសួងសុខាភិបាល ការងារ និងសុខមាលភាពនៃប្រទេសជប៉ុន ដើម្បីផ្ទេរជំនាញបច្ចេកទេស ចំណេះដឹង និងរួមចំណែកអភិវឌ្ឍធនធានមនុស្ស ដែលជាកត្តាសំខាន់ក្នុងការអភិវឌ្ឍសេដ្ឋកិច្ចរបស់ប្រទេសកម្ពុជា និងបង្កើនកិច្ចសហប្រតិបត្តិការរវាងប្រទេសទាំងពីរ។
សូមបញ្ជាក់ផងដែរថា ប្រទេសកម្ពុជាបានចាប់ផ្តើមបញ្ជូនកម្មសិក្សាការីខ្មែរទៅធ្វើកម្មសិក្សា និងធ្វើការនៅប្រទេសជប៉ុនចាប់តាំងពីឆ្នាំ២០០៧ រហូតមកដល់ដំណាច់ឆ្នាំ២០១៧នេះ កម្មសិក្សាការីកម្ពុជាដែលបានទៅធ្វើកម្មសិក្សា និងធ្វើការនៅប្រទេសជប៉ុនមានសរុបប្រមាណ ៦.១៧៧ នាក់ ក្នុងនោះមានកម្មសិក្សាការីជាស្ត្រីចំនួន ៣.៥៧២ នាក់ និងស្ថិតក្នុងលំដាប់ទី៦ ក្នុងចំនោមប្រទេសទាំង១៥ ដែលបានបញ្ជូនកម្មសិក្សាការីទៅធ្វើការនៅប្រទេសជប៉ុន។ លើសពីនេះ ជារៀងរាល់ឆ្នាំ ចំនួនកម្មសិក្សាការីកម្ពុជាដែលបានទៅធ្វើកម្មសិក្សា និងធ្វើការនៅខេត្តអិហ៊ិម៉ិ (Ehime) មានប្រមាណតែ២% ប៉ុណ្ណោះ បើប្រៀបធៀបនឹងចំនួនកម្មសិក្សាការីកម្ពុជានៅទូទាំងប្រទេសជប៉ុន។
លោក អ៊ិត សំហេង បញ្ជាក់ថា កម្មសិក្សាការីកម្ពុជា ក្រោយពីបានទៅបំរើការងារនៅប្រទេសជប៉ុន ពួកគេនឹងទទួបានប្រាក់បៀវត្សរ៍ខ្ពស់ អាចចាប់ពី១.០០០ដុល្លារឡើងទៅក្នុង១ខែ ក្រៅពីនោះ ពួកគេក៏នឹងទទួលបានបទពិសោធន៍ ចំណេះដឹងភាសា ទំនៀមទម្លាប់ វប្បធម៌ និងការស្វែងយល់ពីរស់នៅពីគ្នាទៅវិញទៅមក ដើម្បីបង្កើនសមត្ថភាពបន្ថែម ក្រោយពេលត្រឡប់មកប្រទេសវិញ។
ចំណែកលោក ណាការម៉ូរ៉ា អភិបាលខេត្ត អិហ៊ិម៉ិ បានអះអាងថា ក្រោពីបានមកដល់ប្រទេសកម្ពុជាដោយផ្ទាល់ទើបលោកដឹងថា កម្ពុជាកំពុងមានការរីកចម្រើន ហើយប្រទេសនេះមានកំណើនសេដ្ឋកិច្ចល្អ ប្រជាជនមានភាពរួសរាយរាក់ទាក់ មានកម្លាំងពលកម្មច្រើន និងមានការតស៊ូខ្ពស់ ដែលប្រទេសជប៉ុនកំពុងតែត្រូវការ ពិសេសប្រជាជនកម្ពុជា មានការស្រឡាញ់និងចូលចិត្តប្រជាជននិងប្រទេសជប៉ុនផងដែរ ដែលពួកគេអាចរស់នៅ ធ្វើការជាមួយគ្នាបានយ៉ាងល្អពីពេលបច្ចុប្បន្ននិងទៅថ្ងៃខាងមុខ។ ចំពោះលក្ខណការងារវិញ ជប៉ុនមិនមានតម្រូវការជំនាញខ្ពស់ ឬ ច្បាស់លាស់ពេកទេ សំខាន់កម្មសិក្សាការី ត្រូវចេះភាសាបឋម ជំនាញបឋម ដែលភាគីជប៉ុន និងកម្ពុជាបានឯកភាពគ្នាមុនពេលបញ្ជូន។ នៅពេលទៅដល់ ក៏នឹងមានការតាមមើលថែទាំពួកគាត់យ៉ាងល្អបន្ថែមទៀត។
កម្មសិក្សាការីកម្ពុជា ដែលត្រូវទៅបម្រើការងារនៅខេត្ត អិហ៊ិម៉ិ មានដូចជា ផ្នែកកសិកម្ម ឧស្សាហកម្ម នេសាទ និងសេវាកម្មមួយចំនួនទៀត៕ ដោយ៖កូឡាប
