ឈុតសម្តែងម៉ូតសម្លៀកបំពាក់មួយ នៅអាហ្វ្រិកខាងត្បូង បានកើតភាពភ័យស្លន់ស្លោរ គ្រាដែលមួកដ៏ធំមួយរបស់តារាបង្ហាញម៉ូត ស្រាប់តែកើត… អគ្គិភ័យ។
វីដេអូ១ ត្រូវបានបង្ហោះផ្សាយលើ Daily Mail ឲ្យឃើញថា តារាបង្ហាញម៉ូតស្រីម្នាក់ក្នុងឈុតសម្លៀកបំពាក់ពណ៌លឿង យកតាមលំនាំនៅអេហ្ស៊ីប ព្រមទាំងមានពាក់បន្ថែមមួករោមសត្វធំមួយ កំពុងផ្តុំអារម្មណ៍ដើរបង្ហាញម៉ូតលើឆាក។ ខាងក្រោយនាងជាតារាប្រុស ២រូប ដៃកាន់គប់ភ្លើង។
ខណៈពេលដែលតារាស្រីរូបនេះ ដើរចូលកៀកទស្សនិកជន មួករោមសត្វរបស់នាងបានឆាបឆេះដោយរងទទួលអណ្តាតភ្លើងគប់ពីតារាប្រុសម្នាក់ដើរពីក្រោយ។
តារាស្រីរូបនេះ ពុំបានដឹងឡើយដោយនៅបន្តការងាររបស់ខ្លួន រហូតដល់ពេលដែលទស្សនិកជនស្រែកសន្ធាប់ប្រាប់។ ពេលនោះតារាប្រុសម្នាក់បានស្ទុះទៅជួយនាង តែពុំអាចពន្លត់ភ្លើងបាន។
ទស្សនិកជនម្នាក់ បានស្ទុះឡើងលើឆាកយ៉ាងរហ័ស ហើយទាញមួរបស់នាងចេញពីក្បាល។ បន្ទាប់ពី “រង់ចាំព្រលឹងចូលសន្ធិត” វិញ នាងក៏ដើរសំដៅទៅក្រោយឆាកដើម្បី បានទទួលការព្យាបាលរលាកតិចតួចលើមុខ៕ ចន្ទ្រា