នៅថ្ងៃទី៥ ខែតុលា នាវានេសាទត្រីមួយរបស់ចិនដីគោកបានបុកត្រូវនាវាដឹកប្រេងរបស់ហុងកុងនៅតំបន់សមុទ្រជប៉ុន បណ្តាលឲ្យប្រជានេសាទ១៣នាក់ ស្លាប់ ។
ហេតុការណ៍គ្រោះថ្នាក់នេះបានកើតឡើងនៅតំបន់ជិតប្រជុំកោះ Oki របស់ជប៉ុន ចម្ងាយប្រមាណ៤០០គីឡូម៉ែត្រប៉ែកខាងជើងនៃតំបន់សមុទ្រ ជាប់គ្នារវាងឧបទ្វីបកូរ៉េនិងជប៉ុន-នេះបើតាមព័ត៌មានផ្សាយដោយ Reuters ។
នាវានេសាទត្រីចិន បានក្រឡាប់ចុះក្រោយពេលបុកនាវាដឹកប្រេងរបស់ហុងកុង
នាវានេសាទដែលមានកម្លាំងជ្រែកទឹក២៩០តោន ឈ្មោះថា Lurong Yuanyu 378 របស់ចិន មានមនុស្ស១៦នាក់ ហើយនៅខណៈពេលកើតហេតុមានតែមនុស្ស៤នាក់ប៉ុណ្ណោះ ដែលបានបណ្តានាវានៅជិតនោះជួយសង្គ្រោះបាន ។
កងកម្លាំងល្បាតរបស់ជប៉ុនបានរកឃើញសាកសពរបស់ប្រជានេសាទ១២ ស្ថិតនៅខាងក្នុងសំបកនាវានេសាទដែលក្រឡាប់ ។ មនុស្សម្នាក់ក្នុងចំណោម៤នាក់ ដែលសង្គ្រោះបាន ក្រោយមកក៏បានស្លាប់ ។
រីឯនាវិក២១រូប នៅលើនាវាដឹកប្រេងដែលមានកម្លាំងជ្រែកទឹក៦៣២៩៤តោន ពុំមានបញ្ហាអ្វីទេ ។ បច្ចុប្បន្នគេនៅពុំទាន់ដឹងពីមូលហេតុដែលបណ្តាលឲ្យមានគ្រោះថ្នាក់នេះកើតឡើង ក៏ដូចជាអត្តសញ្ញាណរបស់អ្នកស្លាប់ ៕ សូយន