ភ្នំពេញ៖ រដ្ឋាភិបាលចិន បានផ្តល់ជំនួយសារធាតុ Detection Reagent ជំងឺវីរុស COVID-19 សម្រាប់២០០០នាក់ ជូនរាជរដ្ឋាភិបាលកម្ពុជា ដើម្បីប្រយុទ្ធទប់ទល់នឹងជំងឺដ៏កាចសាហាវនេះ ខណៈដែលរាជរដ្ឋាភិបាលកម្ពុជា បានសម្រេចយកសណ្ឋាគារផ្កាយ៥ Great Duke ដែលជាសណ្ឋាគាររបស់អ្នកវិនិយោគចិន ធ្វើជាមន្ទីរពេទ្យសម្រាប់ពិនិត្យ និងព្យាបាល ជំងឺកូវីដ១៩។
ស្ថានទូតចិនប្រចាំកម្ពុជា នៅថ្ងៃទី១៧ខែមីនាឆ្នាំ២០២០នេះ បានប្រកាសថា តាមការប៉ាន់ស្មានទុកមុន នារាត្រីថ្ងៃទី១៧ ខែមីនា សារធាតុ Detection Reagent ជំងឺវីរុស COVID-19 សម្រាប់២០០០នាក់ ដែលជាជំនួយរបស់ភាគីចិន ជូនចំពោះភាគីកម្ពុជា នឹងមកដល់រាជធានីភ្នំពេញ តាមជើងហោះហើរ។
ស្ថានទូតចិន បានឲ្យដឹងថា ហើយជំនួយសារធាតុទាំងនេះ នឹងត្រូវបានទទួលដោយក្រសួងសុខាភិបាល នៃប្រទេសកម្ពុជា។ ប្រទេសចិន នឹងបន្តផ្តល់ជំនួយជាសម្លៀកបំពាក់ការពារ ម៉ាសវេជ្ជសាស្ត្រ និងសម្ភារៈផ្សេងទៀតជាបន្តបន្ទាប់ និងព្រមទាំងខិតខំផ្តល់ជាកម្លាំងជំរុញ គាំទ្រក្នុងកិច្ចទប់ស្កាត់នឹងជំងឺវីរុស ជូនចំពោះភាគីកម្ពុជា។
រាជរដ្ឋាភិបាលកម្ពុជា ដែលមានក្រសួងសុខាភិបាលជាសេនាធិការ បានចេញសេចក្តីជូនព័ត៌មាន ពីការប្រយុទ្ធទប់ស្កាត់ការរីករាលដាល នៃជំងឺកូវីដ ១៩ ដោយបានសម្រេចប្រើប្រាស់សណ្ឋាគារ Great Duke ដែលជាសណ្ឋាគាររបស់អ្នកវិនិយោគចិន ធ្វើជាមន្ទីរពេទ្យសម្រាប់ពិនិត្យ ថែទាំ និងព្យាបាលជំងឺកូវីដ១៩ ។
បើយោងតាមសេចក្តីជូនដំណឹងរបស់ក្រសួងសុខាភិបាល នៅថ្ងៃទី១៧ ខែមីនា ឆ្នាំ២០២០ ៖ នៅក្នុងសភាពការបច្ចុប្បន្ន ដែលមានការរាតត្បាត ជាសកលនៃកូវីដ១៩ ប៉ុន្តែក្នុងពេលនេះ កម្ពុជាមិនទាន់មានការរាតត្បាត ក្នុងសហគមន៍របស់យើងនៅឡើយទេ។ ករណីទាំងអស់សុទ្ធជាករណីនាំចូលពីក្រៅប្រទេស។
ដោយមានការសម្រេចពីរាជរដ្ឋាភិបាល ក្រសួងសុខាភិបាល សហការគណៈអភិបាលរាជធានីភ្នំពេញ នឹងប្រើប្រាស់សណ្ឋាគារ Great Duke (អតីតសណ្ឋាគារអាំងទែកុងទីណង់តាល់) ជាមន្ទីរពេទ្យសម្រាប់ពិនិត្យ ថែទាំ និងព្យាបាលអ្នកជំងឺកូវីដ១៩។
ដើម្បីបញ្ចៀសនូវការចម្លងក្នុងសហគមន៍ជាយថាហេតុ រាជរដ្ឋាភិបាល បានឲ្យក្រសួងសុខាភិបាល សហការជាមួយកងកម្លាំងសុខាភិបាល នៃកងយោធពលខេមរភូមិន្ទ របស់ក្រសួងការពារជាតិ និងកងកម្លាំសុខាភិបាល នៃនគរបាលជាតិរបស់ក្រសួងមហាផ្ទៃ ដើម្បីរួមសហការគ្នាប្រយុទ្ធនឹងជំងឺកូវីដ១៩ ឲ្យកាន់តែមានប្រសិទ្ធភាព៕ដោយ៖បញ្ញាស័ក្តិ
