ភ្នំពេញ៖ នៅក្នុងសន្និសីទសារព័ត៌មាន ស្ដីពីបច្ចុប្បន្នភាពនៃជំងឺឆ្លងCovid-19 នៅវិមានសន្តិភាព នាថ្ងៃទី៧ ខែមេសា ឆ្នាំ២០២០ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានមានប្រសាសន៍ថា ជំងឺ Covid-19 បានបង្កផលប៉ះពាល់យ៉ាងធ្ងន់ធ្ងរដល់សេដ្ឋកិច្ចជាសាកល ក្នុងនោះកម្ពុជា ក៏ជាប្រទេសមួយ រងផលអវិជ្ជមានពីវិបត្តិនេះមួយដែរ។ សម្តេចតេជោ បានឲ្យដឹងថា នៅក្នុងសេដ្ឋកិច្ចមានវិស័យធំៗ ៣ ដូចជាវិស័យកសិកម្ម ឧស្សាហកម្ម និងសេវាកម្ម ដែលជាផ្នែកមួយយ៉ាងសំខាន់នៅក្នុងសេដ្ឋកិច្ចជាតិ។ ក្នុងនោះសម្តេចបានបន្តថា វិស័យសំខាន់ៗ ដែលទទួលរងនូវផលប៉ះពាល់យ៉ាងធ្ងន់ធ្ងរ រួមមាន វិស័យឧស្សាហកម្ម និងវិស័យសេវាកម្ម លើកលែងតែ ឧស្សាហកម្មក្នុងផ្នែកវេជ្ជសាស្ត្រ បែរជាអាចរកចំណូលបានច្រើនទៅវិញ។
សម្តេចតេជោ ហ៊ុន សែន បានគូសបញ្ជាក់ថា ក្នុងកាលទេសៈដែលបង្កផលប៉ះពាល់ដោយជំងឺឆ្លងកូវីដ ១៩នេះ វាគឺជាឱកាសមួយសម្រាប់កម្ពុជា ធ្វើកាលានុវត្តភាពនៃវិស័យកសិកម្ម ដោយក្រសួងកសិកម្ម ត្រូវបង្កើនឲ្យប្រជាកសិករ ធ្វើការដាំដុះឲ្យបានច្រើន បណ្តុះបណ្តាលជំនាញ ចំណេះដឹង ដើម្បីធានាបាននូវគុណភាពនៃកសិផល មុននាំយកមកកាន់ទីផ្សារ។ ត្រូវជំរុញឲ្យប្រើប្រាស់គ្រាប់ពូជ ឲ្យប្រជាពលរដ្ឋដាំដុះ នៅបន្លែបង្ការ សម្រាប់ផ្គត់ផ្គង់ក្នុងស្រុក ដោយប្រើប្រាស់ឱកាសដ៏លំបាកនេះ ប្រែក្លាយទៅជាកាលានុវត្តភាព សម្រាប់វិស័យកសិកម្មរបស់កម្ពុជា។
បច្ចុប្បន្ន រាជរដ្ឋាភិបាលកម្ពុជា បានសម្រេចបិតការនាំចេញស្រូវ-អង្ករស ត្រី និងស្បៀងជាច្រើនទៀតដើម្បីទុកផ្គត់ផ្គង់ក្នុងប្រទេស ដោយសារការរីករាលដាលនៃជំងឺឆ្លង Covid-19 ហើយជំរុញឱ្យបង្កើនលទ្ធភាព ក្នុងការផលិតបន្ថែមទៀត ដើម្បីអាចផ្គត់ផ្គង់តម្រូវការទីផ្សារក្នុងស្រុកបានគ្រប់គ្រាន់៕ ដោយ ៖ សម្ផស្ស
