ភ្នំពេញ៖ កាលពីថ្ងៃចន្ទទី៣០ ខែមីនា ឆ្នាំ២០២០នេះ សម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា អ្នកតំណាងរាស្ត្រមណ្ឌលកំណ្តាល និងជានាយករដ្ឋមន្ត្រីនៃព្រះរាជាណាចក្រកម្ពុជា បានធ្វើសន្និសីទសារព័ត៌មានដ៏កម្រមួយ នៅឯវិមានរដ្ឋសភាជាតិ ក្រោយបន្តិចដែលរដ្ឋសភាបោះឆ្នោតផ្តល់សេចក្តីទុកចិត្តជូនឯកឧត្តម កើត រិទ្ធ វរជនប្រកបដោយទេពកោសល្យខាងកិច្ចការច្បាប់ជាតិ និងអន្តរជាតិ។ ឳ្យកាន់តំណែងជារដ្ឋមន្ត្រីក្រសួងយុត្តិធម៌។
ក្នុងឋានៈជាអ្នកផ្តួចផ្តើមគំនិតមុនគេបង្អស់ក្នុងការបង្កើត “សេចក្តីព្រាងច្បាប់ស្តីពីការគ្រប់គ្រងប្រទេសក្នុងភាពអាសន្ន” សម្តេចតេជោ ហ៊ុន សែន បានជម្រាបជូនជនរួមជាតិរបស់សម្តេច សហគមន៍អន្តរជាតិតាមរបៀបដោយត្រង់ៗផង បង្ហើបឲ្យដឹងខ្លះៗជាមុនផង និងប្រុងប្រយ័ត្នគោរពតាមការណែនាំរបស់អង្គការសុខភាពពិភពលោកផង ដោយសម្តេចបានប្រើពាក្យមួយជាចម្លើយ ទៅកាន់សំណួររបស់អ្នកសារព័ត៌មាន ដែលជជីកសួរសម្តេចពីស្ថានភាពនយោបាយ សេដ្ឋកិច្ច សង្គមសេដ្ឋកិច្ច ជាពិសេសស្ថានភាពរីករាលដាលនៃជំងឺរាតត្បាត COVID-19។
ដោយមានកាតព្វកិច្ចគោរពតាមរដ្ឋធម្មនុញ្ញដូចពលរដ្ឋកម្ពុជាទាំងអស់ដែរ សម្តេចតេជោ ហ៊ុន សែន បានប្រើចម្លើយមួយដែលក្នុងក្រមសីលធម៌សារព័ត៌មានគេហៅថា អ្នកឆ្លើយសំណួររបស់អ្នកសារព័ត៌មាន មានសិទ្ធិឆ្លើយ ឬមិនឆ្លើយក៏បាន ដូចជាពាក្យថា “គ្មានអត្ថធិបាយទេ ស្មើនឹង No Comments” ហើយសម្តេចលោកក៏ឆ្លើយថា “មិនប្រាប់ទុកឳ្យឆ្ងល់=គ្មានអ្នកអត្ថធិបាយ” ។
ក្រោយមកទៀត រដ្ឋសភា និងព្រឹទ្ធសភា ជាបន្តបន្ទាប់បានអនុម័តលើសេចក្តីព្រាងច្បាប់ ដូចបានរៀបរាប់មកពីខាងលើ ឥឡូវនេះសេចក្តីព្រាងច្បាប់នេះ បានក្លាយទៅជាច្បាប់ហើយ ប៉ុន្តែនៅមិនទាន់ចូលជាធរមានសម្រាប់ការអនុវត្តន៍នៅឡើយទេ។ ច្បាប់ដ៏ថ្មីសន្លាងដែលព្រឹទ្ធសភាអនុម័ត កាលពីថ្ងៃទី១៧ ខែមេសា ឆ្នាំ២០២០ ក្នុងសំឡេងឯកច្ឆន្ទរួមមានចំនួន៥ទំព័រ ៥ជំពូក និង១២មាត្រា នៅត្រង់មាត្រា១២ចែងថា ច្បាប់នេះត្រូវបានប្រកាស់ជាការប្រញាប់។
ច្បាប់នេះត្រូវបានបង្កើតឡើងក្នុងគោលបំណងពង្រឹងនិតិរដ្ឋ ប្រជាធិបតេយ្យ និងសិទ្ធិមនុស្សនៅកម្ពុជា អាចនិយាយបានថា គោលបំណងដ៏ពិតប្រាកដនៃច្បាប់នេះ គឺការពារសុខុមាលភាព ការពារអាយុជីវិតពលរដ្ឋ បង្រួមហានិភ័យឳ្យនៅត្រឹមអប្បរមា ឬតិចបំផុតក្នុងករណីដែលមេរោគ COVID-19 មានការរាតត្បាតទ្រង់ទ្រាយធំ។ នៅក្នុងនៅការបំភ្លឺជូនព្រឹទ្ធសភា ឯកឧត្តម កើត រិទ្ធ រដ្ឋមន្ត្រីក្រសួងយុត្តិធម៌អ្នកដឹកនាំក្រុមការងារអ្នកច្បាប់សរសេរពង្រាងច្បាប់នេះ ក្រោមការណែនាំដោយផ្ទាល់របស់សម្តេចតេជោ បានមានប្រសាសន៍ ពីការចាំបាច់ឱ្យមានច្បាប់នេះ ក្នុងករណីដែលប្រទេសជាតិកំពុងជួបការរាតត្បាតនៃជំងឺ COVID-19 ដោយមិនអាចប៉ាន់ប្រមាណទុកជាមុនបាន។ ឯកឧត្តមបានឆ្លើយតបដោយ ប្រយោលទៅនឹងក្រុមអ្នករិះគន់កម្រិតជាតិ និងអន្តរជាតិទៅលើច្បាប់នេះ “មានប្រទេសជាច្រើន លើពិភពលោកយើងបានដាក់ប្រទេសក្នុងភាពអាសន្ន ហើយមិនចាំបាច់ទាំងមានច្បាប់បែបនេះផង”។
សូមបញ្ជាក់ថា ពលរដ្ឋមិនត្រូវព្រួយបារម្ភស្លន់ស្លោពេក ចំពោះជំងឺ COVID-19 នេះ ឬការប្រកាសឱ្យប្រើជាប្រញាប់នូវច្បាប់នេះដែរ ព្រោះហេតុថា មកទល់នឹងពេលនេះ និងទៅថ្ងៃខាងមុខទៀត ប្រសិនបើការរាតត្បាតនៃជំងឺ COVID-19 មិនឈានដល់កម្រិតធ្ងន់ធ្ងរពេក ឬស្ថានភាពល្អដូចប៉ុន្មានថ្ងៃចុងក្រោយនេះ ដែលចំនួនអ្នកឆ្លងចេះតែស្មើសូន្យ ចំនួនអ្នកជំងឺដែលត្រូវបានព្យាបាលជាសះស្បើយ ចេះតែកើនឡើង ចំនួនអ្នកកំពុងព្យាបាលចេះតែបន្តថយចុះ យើងរំពឹងថា ប្រមុខរដ្ឋស្តីទី ឬព្រះមហាក្សត្រ ក៏នឹងមិនចុះហត្ថលេខាប្រកាសឲ្យប្រើជាប្រញាប់នូវច្បាប់នេះដែរ ព្រោះពុំមានការស្នើ និងឯកភាពពីនាយករដ្ឋមន្ត្រី និងប្រមុខសភាជាន់ទាប និងជាន់ខ្ពស់។
ប្រជាពលរដ្ឋកម្ពុជាគ្រប់រូប មិនគប្បីព្រយបារម្ភហួសហេតុ ឬស្លន់ស្លោប្រសិនបើច្បាប់នេះ ត្រូវបានប្រកាសឲ្យប្រើជាប្រញាប់នោះឡើយដោយហេតុថា ច្បាប់នេះបានចែងយ៉ាងច្បាស់នូវទោសបញ្ញត្តិនៅក្នុងជំពូកទី៤ ពោលគឺទាំងពលរដ្ឋទាំងអាជ្ញាធរមាន សមត្ថកិច្ចត្រូវទទួលទោសរៀងៗខ្លួន។ ក្នុងន័យនេះ អ្នកតាក់តែងពង្រាងច្បាប់ តាមការណែនាំរបស់សម្តេចអគ្គមហាសេនាបតីតេជោ ហ៊ុន សែន ដែលយើងរាល់គ្នាហៅថា “ឪពុកប្រកបដោយគុណធម៌ មេដឹកនាំដឹងសុខទុក្ខពលរដ្ឋ នៅជាប់ជាមួយពលរដ្ឋគ្រប់ពេលវេលា ពិសេសគ្រាអាសន្នអន់ក្រ” បានសរសេរទុកនៅមាត្រា១០នៃច្បាប់នេះថា “មន្ត្រីមានសមត្ថកិច្ចដែលប្រើប្រាស់សិទ្ធិអំណាច តាមទំនើងចិត្តដោយរំលាភបំពាន ហើយបង្កការប៉ះពាល់ដល់រូបកាយ ឬការខូចខាតដល់ទ្រព្យសម្បត្តិរបស់បុគ្គលដទៃ ត្រូវទទួលខុសត្រូវចំពោះអំពើដែលខ្លួនប្រព្រឹត្តស្របតាមច្បាប់ នៃព្រះរាជាណាចក្រកម្ពុជា”។
ច្បាប់នេះប្រៀបបានទៅនឹងការរៀបយុទ្ធសាស្ត្រ វាយប្រហារទៅលើខ្មាំំងសត្រូវ ហើយខ្មាំងសត្រូវនៅទីនេះគឺ មេរោគកូរ៉ូណាដ៏រាតត្បាតបង្កើតបានជាជំងឺ COVID-19 ដូចពេលនេះ។ ចូរយើងប្រយុទ្ធនឹងសត្រូវគ្មានរូបរាង COVID-19 ឳ្យបានព្រមគ្នា វាយវាក្នុងពេលតែមួយពីគ្រប់មុខព្រួញ អាវុធយុទ្ធភ័ណ្ឌយើងនាពេលនេះមានឃ្លាំងទុកដាក់នៅឯក្រសួងសុខាភិបាល មានជាអាទិ អាល់កុល ម៉ាស ទឹកជែលលាងដៃ បរិក្ខារវេជ្ជសាស្ត្រផ្សេងៗទៀត ហើយអគ្គមេបញ្ជាការកំពូលនៃការប្រយុទ្ធប្រឆាំងនឹងជំងឺ COVID-19 គឺសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជា ដែលមានក្រសួងសុខាភិបាលជាសេនាធិការ ក្រុមគ្រូពេទ្យស្ម័គ្រចិត្តសម្តេចតេជោ (TYDA) ជាយុទ្ធជនស្ម័គ្រចិត្តឈានមុខលើសមរភូមិរោគរាតត្បាត ហើយពលរដ្ឋគ្រប់ៗរូបត្រូវតែជាកងទ័ពប្រយុទ្ធនឹង COVID-19 ដោយស្តាប់តាម និងធ្វើតាមអគ្គមេបញ្ជាការកំពូល សេនាធិការ នឹងប្រតិបត្តិនូវវិន័យដ៏ខ្ជាប់ខ្ជួនគឺ អនាម័យ និងលាងដៃឲ្យបានច្រើនដងក្នុងមួយថ្ងៃ មិនចេញក្រៅផ្ទះបើគ្មានការចាំបាច់បំផុត ពោលគឺ “ពលទាហានទាំងឡាយត្រូវមានវិន័យប្រតិបត្តិតាមបញ្ជារបស់សេធិការ ដើម្បីប្រយុទ្ធនឹងខ្មាំងសត្រូវ COVID-19” រហូតទាល់បានជ័យជម្នះទាំងស្រុង និងជានិច្ចកាល។
ប្រជាពលរដ្ឋដែលជាពលទាហានទាំងឡាយ នាសម័យសង្គ្រាមប្រឆាំង COVID-19 ត្រូវជឿជាក់តាមប័ណ្ណប្រកាស់ នៃទីភ្នាក់ងារសារព័ត៌មានកម្ពុជា AKP ដែលផ្សព្វផ្សាយទៅលើគណនេយ្យ Facebook របស់ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មានកម្ពុជា “ឪពុកដ៏មានគុណធម៌របស់អ្នកសារព័ត៌មានខ្មែរ“ ដែលមានខ្លឹមសារថា “សម្តេចតេជោឆ្លងកាត់សមរភូមិរាប់មិនអស់ ដូច្នេះចំពោះសមរភូមិប្រឆាំងនឹង COVID-19 យើងត្រូវតែជឿជាក់លើសម្តេច“៕ដោយ៖ CEN
