ភ្នំពេញ៖ សម្តេចពិជ័យសេនា ទៀ បាញ់ បានប្រកាសជាថ្មីម្តងទៀតថា ប្រសិនបើចលនាសង្គ្រោះជាតិ កើតមានឡើង នៅកម្ពុជាពេលណា នោះកងយោធពលខេមរភូមិន្ទ នឹងកម្ទេចចោល នៅពេលនោះភ្លាមៗតែម្តង។
សម្តេចពិជ័យសេនា ទៀ បាញ់ ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ បានថ្លែងបែបនេះ ក្នុងឱកាសអញ្ជើញចូលរួមបិទសិក្ខាសាលាការងារបច្ចេកទេសទូទាំងកងយោធពលខេមរភូមិន្ទ រយៈពេល៥ឆ្នាំ (២០១៣-២០១៧) និងទិសដៅអនុវត្ត៥ឆ្នាំបន្ត (២០១៨-២០២២) នៅបញ្ជាការដ្ឋានកងពលតូចលេខ៧០ នៅថ្ងៃទី២៥ ខែមករា ឆ្នាំ២០១៨នេះ។
សម្តេចពិជ័យសេនា ទៀ បាញ់ បានមានប្រសាសន៍ថា “ចលនាសង្គ្រោះជាតិកើតពេលណា កម្ទេចចោលពេលនោះ។ ចលនាសង្គ្រោះជាតិ កើតចេញពេលណា នៅប្រទេសកម្ពុជា ដូចតាមការអួតរបស់ខ្លួន គឺ នឹងកម្ទេចចោលភ្លាម ហើយកងទ័ព មិនបណ្តោយឲ្យពួកទាំងនោះ មកបំភ្លេចបំផ្លាញជាតិនោះឡើយ “។
ប្រមុខក្រសួងការពារជាតិ បានបញ្ជាក់បន្ថែមថា “រឿងហ្នឹង ដូចជាខ្ញុំបាននិយាយរួមហើយថា អាចលនាស្អីគេ វាហាក់ដូចជាមិនមានស្អីខុសពីអ្វីកន្លងមក ដែលវាបានធ្វើនោះទេ អាចលនាស្អីគេ បើសិនជាវាធ្វើសកម្មភាពមែនទែន ដូចអ្វីដែលវាអួត និងគឺថាវាច្បាស់លាស់ហ្មង គឺវាត្រូវតែត្រូវហ្មង ប៉ុន្តែវាត្រូវស្អី គឺចាំដល់ពេលដែលវាមានមែនទែន ដឹងហើយ “។ សម្តេចពិជ័យសេនា បានបញ្ជាក់ថា កងយោធពលខេមរភូមិន្ទ ប្តេជ្ញាចិត្តរួចជាស្រេច ក្នុងបុព្វហេតុការថែរក្សាសន្តិភាព ស្ថិរភាព ពង្រឹងសន្តិភាព ហើយមិនអនុញ្ញាតជាដាច់ខាតឲ្យអ្វីដែលជាចលនានេះកើតឡើង នាំឲ្យប៉ះពាល់ដល់សន្តិភាពជាដដាច់ខាត។ កងយោធពលខេមរភូមិន្ទ នឹងដើរមុខសហការជាមួយកម្លាំង មានសមត្ថកិច្ចទប់ស្កាត់ រារាំង និងបង្ក្រាបតែម្តង គឺបង្ក្រាបមិនឲ្យមានរឿង អ្វីមួយដែលមានចេតនាបំផ្លិចបំផ្លាញសន្តិភាពនៅកម្ពុជាឡើយ៕ ដោយ៖បញ្ញាស័ក្តិ
