ភ្នំពេញ ៖ ស្ដ្រីម្នាក់ប្ដឹងសមត្ថកិច្ចឲ្យចាប់ប្ដីរបស់ខ្លួន ដោយសារតែទ្រាំនឹងទង្វើររបស់ប្ដី ដែលប្រើអំពើហឹង្សាដាក់ខ្លួនជាច្រើនលើកច្រើនសា ក៏សម្រេចចិត្ដប្ដឹងសមត្ថកិច្ច ឲ្យឃាត់ខ្លួនបុរសជាប្ដីតែម្ដង ។
ការចាប់ខ្លួនកាលពីវេលាម៉ោង២និង៣០នាទីរសៀល ថ្ងៃទី២៧ ខែមិថុនា ឆ្នាំ២០២០ នៅក្រុម៧ ភូមិព្រៃទា១ សង្កាត់ចោមចៅ៣ ខណ្ឌពោធិ៍សែនជ័យ ។
សមត្ថកិច្ចបានឲ្យដឹងថា ប្តីឈ្មោះ កង អ៊ុយ អាយុ ៣៤ឆ្នាំ មុខរបរគ្មានទេ ស្នាក់នៅស្រុកកំណើត ភូមិទឹកថ្លា សង្កាត់ទឹកថ្លា ខណ្ឌសែនសុខ ។ ចំណែកប្រពន្ធមានឈ្មោះ ម៉ឺន ភ័ណ្ឌ អាយុ៣៤ឆ្នាំ មុខរបរ ដើររើសអេតចាយ និងដើរបេះបន្លែលក់ រស់នៅផ្ទះកើតហេតុ មានស្រុកកំណើត ស្រុកចំការលើ ខេត្តកំពង់ចាម ។
តាមការរៀបរាប់ពីស្ត្រីជាប្រពន្ធ បានឲ្យដឹងថា គាត់បានគ្នាជាប្តីប្រពន្ធ អស់រយៈពេលជាង១០ឆ្នាំមកហើយ មានកូន៣នាក់ ប្រុស២នាក់ ស្រី១នាក់ រស់នៅផ្ទះខាងឪពុកម្តាយក្មេក ត្រង់ចំណុចខាងលើ តែប្តីមួយថ្ងៃគិតតែពីដើរផឹកស៊ី ជក់គ្រឿងញៀន ហើយច្រើនលើកច្រើនសារាប់លែងអស់ទៅហើយ ដែលប្តីផឹកស្រវឹង ប្រើប្រាស់អំពើហឹង្សាមកលើខ្លួន ឈ្លោះត្រូវ ត្រូវឈ្លោះ លួងលោមនិយាយត្រូវ ចិត្តសណ្តោយក៏មិនប្តឹង តែទង្វើរសកម្មភាពដដែលៗរបស់ប្តី មិនរាងចាល គ្មានក្តីមេត្តា មកដល់រសៀលថ្ងៃទី២៧ ខែមិថុនា ឆ្នាំ២០២០នេះ ក្រោយពីផឹកស្រាថ្នាំអស់កន្លះលីត្រ ស្រវឹងមកសុំប្រពន្ធមួយ(រួមភេទ) ខណៈដែលកំពុងអង្គុយចងបន្លែ តែប្រពន្ធមិនព្រម ផ្ទុះកំហឹងយកលេសចោទថាមានសហាយ វាយប្រវាយប្រតប់ យកកាំបិតចាក់ចំកប្រពន្ធ ហូរឈាមកក្លាក់ បង្កឲ្យឆោឡោ ប្តឹងប៉ូលិសចាប់ខ្លួនតែម្តង ។
តាមសម្តីបុរសជាប្តីក្នុងសភាពស្រវឹងងិល ថាខ្លួនគេធ្វើលេងទេ លើកមុនៗអង្វរសុំទោសបាន លើកនេះសុំថើបលួងចិត្តដែរ តែប្រពន្ធមិនព្រម ។
ក្រោយពេលកើតហេតុ សមត្ថកិច្ចមកដល់ឃាត់ខ្លួនបុរសជាប្តី កសាងសំណុំរឿងបញ្ជូនខ្លួនទៅផ្នែកជំនាញខណ្ឌ ចាត់ការតាមច្បាប់៕
ដោយ៖ ភត្រា និងសាម៉េត
