ភ្នំពេញ ៖ ថ្ងៃទី ២៩ ខែមិថុនា ឆ្នាំ ២០២0 -ក្រុមហ៊ុនម្ចាស់ភាគហ៊ុនរួមរបស់ក្រុមហ៊ុនអាកាសចរណ៍ Vietjet បានរៀបចំកិច្ចប្រជុំម្ចាស់ភាគហ៊ុនប្រចាំឆ្នាំ ២០២០របស់ខ្លួនដើម្បីពិនិត្យមើលសមិទ្ធិផលអាជីវកម្មរបស់ខ្លួនក្នុងឆ្នាំ ២០១៩ ហើយបានបោះឆ្នោតអនុម័តលើរបាយការណ៍ហិរញ្ញវត្ថុដែលបានធ្វើសវនកម្មរួចនិងពិភាក្សាអំពីផែនការអភិវឌ្ឍន៍របស់ក្រុមហ៊ុនសម្រាប់ឆ្នាំ ២០២០។
ក្រុមប្រឹក្សាប្រតិបត្តិបានឲ្យដឹងថា ក្រុមហ៊ុនអាកាសចរណ៍ Vietjet បានបង្ហាញកំណើនអាជីវកម្មដ៏រឹងមាំនិងការអភិវឌ្ឍប្រកបដោយចីរភាពជាមួយនឹងសមិទ្ធិផលអាជីវកម្មវិជ្ជមានកាលពីឆ្នាំមុន។ ក្នុងឆ្នាំ ២០១៩ ក្រុមហ៊ុន Vietjetរកប្រាក់ចំណូលបានចំនួនសរុប ៥០,៦០៣ ពាន់លានដុង (ប្រហែល ២,២ ពាន់លានដុល្លារអាមេរិក) និងប្រាក់ចំណេញចំនួន ៤,៥៦៩ ពាន់លានដុង (ប្រហែល ២០០ លានដុល្លារអាមេរិក) មុនបង់ពន្ធ។ប្រាក់ចំណូលពីសេវាដឹកជញ្ជូនតាមផ្លូវអាកាសដែលបានធ្វើសវនកម្មរួចរបស់ក្រុមហ៊ុន Vietjetបានកើនឡើងដល់ចំនួន ៤១,២៥២ ពាន់លានដុង (ប្រហែល ១,៨ ពាន់លានដុល្លារអាមេរិក)មុនបង់ពន្ធពោលគឺកើនឡើង ២២ ភាគរយធៀបនឹងឆ្នាំ២០១៨ ឯប្រាក់ចំណេញវិញមានចំនួន៣,៨៦៩ ពាន់លានដុង (ប្រហែល ១៧០ លានដុល្លារអាមេរិក) មុនបង់ពន្ធកើនឡើង ២៧ភាគរយធៀបនឹងឆ្នាំ ២០១៨ ។
ក្នុងឆ្នាំ២០១៩ក្រុមហ៊ុន Vietjetបានបន្ថែមផ្លូវហោះហើរថ្មីចំនួន ៣៤ ខ្សែ នាំឱ្យជើងហោះហើរសរុបមានចំនួន ១៣៩ខ្សែក្នុងនោះ ៤៤ ខ្សែជាជើងហោះហើរក្នុងស្រុកនិង៩៥ខ្សែជាជើងហោះហើរអន្តរជាតិ។ជារួម ជើងហោះហើរទាំង១៣៩ខ្សែ បានដឹកអ្នកដំណើរជាង ២៥ លាននាក់ នាំឱ្យក្រុមហ៊ុនបានសម្រេចគោលដៅ“អ្នកដំណើរ ១០០ លាននាក់”របស់ខ្លួន។ ការនេះធ្វើឱ្យ Vietjet បង្កើតបានជាមូលដ្ឋានដ៏រឹងមាំដើម្បីក្រោកឈរឡើងវិញ ពីវិបត្ដិកូវីដ។ ក្រុមហ៊ុន Vietjetបានទទួលពានរង្វាន់ល្បីឈ្មោះជាច្រើនក្នុងឆ្នាំ ២០១៩ ហើយបានបន្តវិនិយោគទៅក្នុងវិទ្យាស្ថានអាកាសចរណ៍ដែលឥឡូវនេះបានក្លាយជាស្ថាប័នជំនាញបណ្តុះបណ្តាលផ្នែកអាកាសចរណ៍ឈានមុខគេមួយក្នុងតំបន់។
រាល់ជោគជ័យទាំងអស់ដែលសម្រេចបានក្នុងឆ្នាំ ២០១៩ បានជួយឲ្យក្រុមហ៊ុន Vietjetក្លាយជាក្រុមហ៊ុនអាកាសចរណ៍ដ៏សំខាន់មួយដែលបានចូលរួមចំណែកយ៉ាងសំខាន់ដល់ការអភិវឌ្ឍវិស័យអាកាសចរណ៍របស់ប្រទេសវៀតណាមក៏ដូចជាការជួយស្ដារឡើងវិញនូវសេដ្ឋកិច្ចជាតិនិងពិភពលោកផងដែរ។
ចាប់តាំងពីដើមឆ្នាំ ២០២០ រហូតមកដល់បច្ចុប្បន្នវិស័យអាកាសចរណ៍របស់ប្រទេសវៀតណាមទទួលរងផលប៉ះពាល់យ៉ាងធ្ងន់ធ្ងរបន្ទាប់ពីមានការរីករាលដាលជាសកលនៃជំងឺកូវីដ-១៩ ប៉ុន្តែនៅពេលដែលទីផ្សារអាកាសចរណ៍ក្នុងស្រុកបានចាប់ផ្តើមឡើងវិញក្រុមហ៊ុន Vietjet បានអនុវត្តយុទ្ធនាការមួយដែលមានឈ្មោះថា“ផ្ដើមការហោះហើរឡើងវិញ”(Returning to the Sky)និងបានបើកសម្ពោធផ្លូវហោះហើរថ្មីចំនួន ៨ ខ្សែ នាំឱ្យជើងហោះហើរក្នុងស្រុក កើនដល់ចំនួនសរុប ៥៣ ខ្សែ។អាកាសចរណ៍ Thai Vietjet ក៏ជាក្រុមហ៊ុនអាកាសចរណ៍ដំបូងបង្អស់ដែលបើកប្រតិបត្តិការឡើងវិញផងដែរ នៅព្រលានយន្តហោះភូកេត (Phuket Airport) ដោយបានពង្រីកបណ្តាញហោះហើរក្នុងស្រុកថ្មីរបស់ខ្លួនចំនួន ៥ ខ្សែនៅក្នុងប្រទេសថៃ។
គេរំពឹងថាក្រុមហ៊ុន Vietjet នឹងបើកដំណើរការយន្តហោះចំនួន ៩០ គ្រឿងជើងហោះហើរជាង ១១៨,០០០ ជើងនិងសេវាដឹកអ្នកដំណើរជាង ២០ លាននាក់នៅចុងឆ្នាំ ២០២០។ នេះបើផ្អែកលើហេតុផលជាក់ស្ដែងដែលថា រដ្ឋាភិបាលវៀតណាមកំពុងអនុវត្តកម្មវិធីនិងដំណោះស្រាយជាច្រើនដើម្បីចូលរួមជួយក្រុមហ៊ុនអាកាសចរណ៍ទាំងអស់ តាមរយៈការបន្ធូរបន្ថយពន្ធនិងថ្លៃសេវានិងការផ្ដល់ប្រាក់កម្ចីដែលមានការប្រាក់ទាប។
នៅឆ្នាំ ២០២០ ក្រុមហ៊ុន Vietjet នឹងផ្តោតការយកចិត្តទុកដាក់លើមធ្យោបាយកាត់បន្ថយចំណាយដែលមិនចាំបាច់ ក្នុងគោលដៅចង់ធ្វើឱ្យសេវាដឹកជញ្ជូនតាមអាកាស ដែលជាប្រភពចំណូលគោលរបស់ខ្លួន អាចស្រង់ដើមរួច នាត្រឹមដំណាច់ឆ្នាំ២០២០នេះ។
បន្ទាប់ពីបើកដំណើរការឡើងវិញនិងពង្រីកជើងហោះហើរក្នុងស្រុកបន្ថែម ក្រុមហ៊ុន Vietjet និងវិស័យអាកាសចរណ៍វៀតណាមបានត្រៀមខ្លួនរួចរាល់អស់ហើយដើម្បីបើកដំណើរការជើងហោះហើរអន្តរជាតិរបស់ខ្លួនចាប់ពីខែកក្កដាខាងមុខនេះតទៅដោយមានការប្រុងប្រយ័ត្នខ្ពស់ទៅលើការគ្រប់គ្រងការរីករាតត្បាតនៃកូវីដ ១៩ និងធានាឱ្យបាននូវសុខសុវត្ថិភាពរបស់អ្នកដំណើរនិងបុគ្គលិករបស់ខ្លួន។
អំពីក្រុមហ៊ុន Vietjet :
Vietjet គឺជាក្រុមហ៊ុនអាកាសចរណ៍ដំបូងគេរបស់វៀតណាម ក្នុងការប្រតិបត្តក្នុងនាមជាក្រុមហ៊ុនអាកាសចរណ៍ជំនាន់ថ្មីមួយ ដែលផ្តល់ជូនតម្លៃសំបុត្របែបសន្សំសំចៃតាមតម្រូវការ និងសេវាកម្មយ៉ាងទូលំទូលាយដើម្បីឆ្លើយតបទៅនឹងតម្រូវការអតិថិជន។ ក្រុមហ៊ុននេះ មិនត្រឹមតែផ្តល់ឲ្យនូវសេវាកម្មដឹកជញ្ជូនប៉ុណ្ណោះទេ ប៉ុន្តែក៏ប្រើប្រាស់បច្ចេកវិទ្យាពាណិជ្ជអេឡិចត្រូនិក (e-commerce) ធំជាងគេបំផុត ដើម្បីផ្តល់ជូននូវសេវាកម្ម និងផលិតផលផ្សេងៗជាច្រើនសម្រាប់អតិថិជន។ Vietjet គឺជាសមាជិក សមាគមដឹកជញ្ជូនផ្លូវអាកាសអន្តរជាតិ (IATA) និងបានទទួលវិញ្ញាបនបត្រសវនកម្មសុវត្ថិភាពប្រតិបត្តិការ (IOSA) ពីសមាគមដដែលនេះ។Vietjetក៏បានជាប់ឈ្មោះជា ក្រុមហ៊ុនអាកាសចរណ៍ដែលយកកម្រៃសេវាទាបដ៏ល្អបំផុតនៅអាស៊ីឆ្នាំ២០១៨ (Best Ultra Low-Cost Airline 2018) និងទទួលបានចំណាត់ថ្នាក់ខ្ពស់ជាងគេបំផុតសម្រាប់សុវត្ថិភាពជាមួយនឹងពិន្ទុផ្កាយ៧ ក្នុងឆ្នាំ២០១៨ ពីគេហទំព័រអង្កេតលើផលិតផល និងសុវត្ថិភាពរបស់ពិភពលោក AirlineRatings.com ។ ក្រុមហ៊ុនអាកាសចរណ៍នេះ ក៏ត្រូវបានបញ្ចូលឈ្មោះក្នុងបញ្ជីក្រុមហ៊ុនអាកាសចរណ៍ដ៏ល្អបំផុតផ្តាច់គេទាំង៥០របស់ពិភពលោក សម្រាប់ការប្រើហិវញ្ញវត្ថុដ៏មានផាសុខភាព និងប្រតិបត្តិការផ្សេងៗ ដោយអង្គភាពវិភាគលើក្រុមហ៊ុនអាកាសចរណ៍ Airfinance Journal ក្នុងឆ្នាំ២០១៨។
ក្រុមហ៊ុន Vietjet អាកាសចរណ៍ Vietjet ប្រតិបត្តិការហោះហើរប្រចាំថ្ងៃច្រើនជាង៤០០លើក ដោយដឹកអ្នកដំណើរច្រើនជាង៦៥លាននាក់ មកទល់ពេលនេះ ជាមួយនឹងផ្លូវហោះហើរចំនួន១០៦ ដែលគ្របដណ្តប់ក្នុងគោលដៅជាច្រើនទូទាំងវៀតណាម និងគោលដៅអន្តរជាតិនានា ដូចជាជប៉ុន ហុងកុង សិង្ហបុរី កូរ៉េខាងត្បូង តៃវ៉ាន់ ប្រទេសចិន ថៃ មីយ៉ាន់ម៉ា ម៉ាឡេស៊ី និងកម្ពុជា ៕ ដោយ ៖ CEN
