ថ្ងៃទីពីរ! នៃមហោស្រពបុណ្យភូមិមានជើង វត្តមានភ្ញៀវទេសចរជាច្រើនរួមទាំងជនជាតិបរទេស បានចូលមកទស្សនានូវវប្បធម៌ប្រពៃណី ម្ហូបអាហារ និង ការរស់នៅរបស់បងប្អូនជនជាតិដើមភាគតិច ដែលរៀបចំឡើងនៅជើងភ្នំដោះក្រមុំ។ រយ:ពេលពេញមួយថ្ងៃនេះ អ្នកចូលទស្សនាបានទស្សនាការលេងតន្រ្តីរបស់ជនជាតិដើមភាគតិច ល្បែងកំសាន្ត ដូចជាការដើរលើបំពង់ឬស្សី ព្រមទាំងបទបង្ហាញពីការចម្អិនសម្លព្រោង និង ពិធីកាប់ក្របីផឹកស្រ រហូតដល់ជាង ៣០០០នាក់។
តាមរយ:បុណ្យភូមិមានជើង ភ្ញៀវទេសចរក៏បានទៅកម្សាន្តនៅកន្លែងទេសចរណ៍នានា ដែលបានរៀបចំដូចជាកម្សាន្ត នៅទឹកជ្រោះប៊ូស្រាដែលជារមណីយដ្ឋានធម្មជាតិដ៏ស្រស់ត្រកាលរបស់ខេត្តមណ្ឌលគិរី និងទស្សនាថ្ងៃលិច ពីភ្នំដោះក្រមុំផងដែរ។
រាត្រីដ៏អស្ចារ្យនាថ្ងៃទីមួយនេះក៏មានការប្រគំតន្រ្តីសម័យដើម្បីអបអរសាទទិវាកុមារពិភពលោកផងដែរ។ ការប្រគំ តន្រ្តីសម័យនេះមានការចូលរួមពិសិល្បករ សិល្បការិនីដូចជា៖ កញ្ញា ស៊ីន យូប៊ីន អ្នកនាង មីន ចេនី កញ្ញា កេសរ កញ្ញា ROXY អ្នកនាងម៉េង កែវពេជ្រចិន្តា និង អូនផ្អែម កញ្ញា រ៉េត ស៊ូហ្សាណា និង ចូលរួមពិសេសជាមួយកញ្ញា ឡូរ៉ា ម៉ម កញ្ញា ឆាឆា និង នាយពាក់ ម៉ី។
លោក សកល កិត្យា សហស្ថាបនិកនៃមហោស្រពសិល្បៈបុណ្យភូមិ និង ជាអ្នកដឹកនាំមហោស្រពសិល្បៈ បុណ្យភូមិមានជើង នៅក្នុងឆ្នាំនេះបានលើកឡើងថា «ឆ្នាំនេះយើងពិតជាចង់ឃើញអ្នកស្រុកបុណ្យភូមិមានជើង មកទទួលនូវបទពិសោដន៍មួយនេះ ក៏ដូចជាមកចូលរួមស្វែងយល់ពីបងប្ងូនជនជាតិដើមភាគតិច សត្វដំរី និង មកទស្សនាខេត្តមណ្ឌលគិរីដែលជាតំបន់ទេសចរណ៍ធម្មជាតិ ហើយក៏ជាដង្ហើមនៃភូមិភាគឦសាន អោយបានច្រើនកុះករ។
លោកបន្តថា នាថ្ងៃទី៣នៃកម្មវិធី ពោលគឺថ្ងៃទី២៤ ខែវិច្ឆិកា មហោស្រពបុណ្យភូមិមានជើង និង មានការបង្ហាញ កម្មពិសេសគឺ ដំរីលេងខ្លួន ជាមាតិកាថ្មីមួួយដែលយើងចង់បង្ហាញពីសត្វដំរី នៅខេត្តមណ្ឌលគិរី យើងខានឃើញដំរីតែខ្លួនស្អាតយូរហើយ ចឹងលើកនេះបុណ្យភូមិមានជើងនឹងនាំការភ្ញាក់ផ្អើលមួយដល់ អ្នកស្រុកបុណ្យភូមិមានជើង គឺ ដំរីលេងខ្លួន
សូមបញ្ចាក់ថា មហោស្រពសិល្ប: បុណ្យភូមិមានជើងរៀបចំដោយ: ភ្លើងគប់ PlerngKob & BonnPhum បុណ្យភូមិ ដែលមានការសហការរៀបចំ: UNICEF Cambodia – ដើម្បីកុមារគ្រប់រូប
ឧបត្ថម្តដោយ: KampumEra។
