ភ្នំពេញ៖ សម្តេចក្រឡាហោម ស ខេង បានថ្លែងថា គ្រោះថ្នាក់ចរាចរណ៍ផ្លូវគោកក្នុងរយៈពេល១ឆមាស (ពីថ្ងៃទីខែមករា រហូតដល់ថ្ងៃទី៣០ ខែមិថុនា) ឆ្នាំ២០២០នេះ កើតឡើង១៦១៩លើក ស្លាប់ ៨៦១នាក់ រងរបួស ២៤៤៩នាក់។ សម្តេចបានក្រើនរំលឹកថែមទៀត ដល់កងកម្លាំងមានសមត្ថកិច្ច ក៏ដូចជាមន្ត្រីពាក់ព័ន្ធទាំងអស់ ដែលបានចូលរួមអនុវត្តភារកិច្ចរបស់ខ្លួន ត្រូវតែបន្តការគោរពក្រមសីលធម៌វិជ្ជាជីវៈ និងវិន័យឲ្យបានខ្ជាប់ខ្ជួន ក្នុងការអនុវត្តតួនាទីភារកិច្ចរបស់ខ្លួន ត្រូវកាត់បន្ថយ ឬលប់បំបាត់ឲ្យបាននូវបាតុភាពអវិជ្ជមានផ្សេងៗ ដើម្បីបម្រើផលប្រយោជន៍ជាតិ និងប្រជាពលរដ្ឋយើង។
យោងតាមផេកហ្វេសប៊ុកផ្លូវការសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានផ្សាយនៅព្រឹកថ្ងៃទី១ ខែកក្កដា ឆ្នាំ២០២០នេះថា ថ្ងៃនេះគឺជាថ្ងៃទី១ខែកក្កដា ជាថ្ងៃបញ្ចប់ពាក់កណ្តាលឆ្នាំ២០២០ ហើយនៅថ្ងៃនេះសម្តេចក្រឡាហោម ក៏សូមជម្រាបជូនបងប្អូនជនរួមជាតិ អំពីលទ្ធផលប្រកបដោយភាពវិជ្ជមាន នៃបញ្ហាចរាចរណ៍រយៈពេល១ឆមាស ឆ្នាំ២០២០នេះ គឺការគ្រោះថ្នាក់មានការថយចុះ គួរកត់សម្គាល់បើប្រៀបធៀបនឹងឆ្នាំមុន និងមុនពេលមានការរឹតបន្តឹង ការអនុវត្តច្បាប់ចរាចរណ៍ផ្លូវគោក។
ទិន្នន័យជាផ្លូវការបានបង្ហាញថា ចំនួនគ្រោះថ្នាក់ចរាចរណ៍ផ្លូវគោក ក្នុងរយៈពេល១ឆមាស (ពីថ្ងៃទីខែមករា រហូតដល់ថ្ងៃទី៣០ ខែមិថុនា) ឆ្នាំ២០២០នេះ បើប្រៀបធៀបឆមាសទី១ ឆ្នាំ២០១៩ គឺចំនួនគ្រោះថ្នាក់ចរាចរណ៍មានការថយចុះ ៥៥២លើក ស្មើ២៥% (១៦១៩ លើ២១៧១លើក) ចំនួនមនុស្សស្លាប់ថយចុះ១៧២នាក់ ស្មើនឹង១៧% (៨៦១ លើ១០៣៣នាក់) ចំនួនអ្នករងរបួសថយចុះ ៧៧៨នាក់ ស្មើនឹង២៤% (២.៤៤៩ លើ៣.២២៧នាក់)។
ដូចគ្នានេះដែរ បើប្រៀបធៀបគ្រោះថ្នាក់ចរាចរណ៍ រយៈពេល២ខែ នៃការរឹតបន្តឹងច្បាប់ចរាចរណ៍ផ្លូវគោក គឺខែឧសភា និងខែមិថុនា ឆ្នាំ២០២០ នឹងខែឧសភា និងខែមិថុនា ឆ្នាំ២០១៩ គឺគ្រោះថ្នាក់ចរាចរណ៍ មានការថយចុះ២៣៣លើក ស្មើនឹង៣៤% (៤៥៧ លើ៦៩០លើក) ចំនួនមនុស្សស្លាប់ មានការថយចុះ៧៩នាក់ស្មើនឹង២៥% (២៤១ លើ៣២០នាក់) និងអ្នករងរបួស បានថយចុះ២៣៣នាក់ ស្មើនឹង២៣% (៧៦៦ លើ៩៩៩នាក់)។
តាមទិន្នន័យបញ្ជាក់ខាងលើនេះ គឺបានបង្ហាញយ៉ាងច្បាស់ថា ប្រជាពលរដ្ឋយើងពិតជាមានការយល់ដឹង និងបានចូលរួមគោរពច្បាប់ចរាចរណ៍ កាន់តែច្រើននៅពេលប្រទេសជាតិយើង មានការរីកចម្រើន មានកំណើនយានយន្តធ្វើដំណើរ និង កំណើនអ្នកបើកបរក៏ដោយតែគ្រោះថ្នាក់ចរាចរណ៍មានការថយចុះ។
លទ្ធផលវិជ្ជមាននេះ ក្នុងនាមជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក សម្តេចសូមថ្លែងអំណរគុណ ដល់បងប្អូនជនរួមជាតិទាំងអស់ ជាពិសេសអ្នកប្រើប្រាស់ផ្លូវថ្នល់ ដែលបានចូលរួមគោរពអនុវត្តច្បាប់ចរាចរណ៍ផ្លូវគោក យ៉ាងខ្ជាប់ខ្ជួន និងអរគុណដល់កងកម្លាំងមានសមត្ថកិច្ច ក៏ដូចជា មន្ត្រីពាក់ព័ន្ធទាំងអស់ ដែលបានអនុវត្តភារកិច្ចរបស់ខ្លួនបានល្អប្រសើរ។ សូមថ្លែងអំណរគុណចំពោះគ្រប់បណ្តាញសារព័ត៌មាន អង្គការក្រៅរដ្ឋាភិបាល និង អាជ្ញាធរមូលដ្ឋានគ្រប់ជាន់ថ្នាក់ ដែលបានចូលរួមផ្សព្វផ្សាយ និង អប់រំអំពីច្បាប់ចរាចរណ៍ផ្លូវគោកនេះ ជូនប្រជាពលរដ្ឋផងដែរ។
សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ក៏សូមថ្លែងអំណរគុណដ៏ជ្រាលជ្រៅ ចំពោះបងប្អូនជនរួមជាតិដែលបានផ្ញើសារ និងការបញ្ចេញមតិ ជាពិសេសនៅក្នុងផេកហ្វេសប៊ុក របស់សម្តេចផ្ទាល់តែម្តង ដែលសុទ្ធតែជាសារ និងមតិប្រកបដោយខ្លឹមសារ ចូលរួមស្ថាបនានិងកែលម្អ។
សម្តេច ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ សូមលើកទឹកចិត្តដល់បងប្អូនជនរួមជាតិ បន្តចូលរួមផ្តល់ជាមតិយោបល់ ក្នុងន័យស្ថាបនា និងកែលម្អថែមទៀត ដើម្បីបន្តការអនុវត្តច្បាប់ចរាចរណ៍ផ្លូវគោក ឲ្យកាន់តែល្អប្រសើរឡើង គឺមានន័យថាអត្រាគ្រោះថ្នាក់ចរាចរណ៍ នឹងកាន់តែថយចុះ ចំនួនអ្នកស្លាប់កាន់តែតិច សណ្តាប់ធ្នាប់សាធារណៈកាន់តែមានរបៀបរៀបរយល្អប្រសើរ សមជាប្រទេសកម្ពុជា និងប្រជាពលរដ្ឋខ្មែរ ជាប្រជាជាតិស៊ីវិល័យ។
ជាមួយគ្នានេះ សម្តេចសូមក្រើនរំលឹកថែមទៀត ដល់កងកម្លាំងមានសមត្ថកិច្ច ក៏ដូចជា មន្ត្រីពាក់ព័ន្ធទាំងអស់ ដែលបានចូលរួមអនុវត្តភារកិច្ចរបស់ខ្លួន ត្រូវតែបន្តការគោរពក្រមសីលធម៌វិជ្ជាជីវៈ និងវិន័យឲ្យបានខ្ជាប់ខ្ជួន ក្នុងការអនុវត្តតួនាទីភារកិច្ចរបស់ខ្លួន ត្រូវកាត់បន្ថយ ឬលប់បំបាត់ឲ្យបាននូវបាតុភាពអវិជ្ជមានផ្សេងៗ ដើម្បីបម្រើផលប្រយោជន៍ជាតិ និងប្រជាពលរដ្ឋយើង ៕
ដោយ ៖ កូឡាប
