ភ្នំពេញ ៖ បុរស២ជិះម៉ូតូឌុបគ្នាយ៉ាងលឿន ជ្រុលទៅបុករថយន្តពេញទំហឹង បណ្តាលឲ្យស្លាប់បាត់បង់ជីវិតម្នាក់ និងរងរបួសធ្ងន់ម្នាក់ បញ្ជូនទៅសង្គ្រោះនៅមន្ទីរពេទ្យភ្លាមៗ។
ហេតុការណ៍នេះដែរ កើតឡើងនៅវេលាម៉ោង៨ និង៣០ នាទីយប់ ថ្ងៃសុក្រទី១៧ ខែកក្កដា ឆ្នាំ២០២០ នៅតាមបណ្តោយផ្លូវសហពន្ធរុស្ស៊ី ក្នុងសង្កាត់ការកាបទី២ ខណ្ឌពោធិ៍សែនជ័យ រាជធានីភ្នំពេញ។
បុរសដែលស្លាប់មានឈ្មោះប៊ុន សម្បត្តិ អាយុ ២៧ឆ្នាំរស់នៅភូមិសុក្រំ ឃុំអូសារាយ ស្រុកត្រាំកក់ ខេត្តតាកែវ មានប្រពន្ធ និងកូនម្នាក់។ រីឯអ្នករងរបួស មិនទាន់ស្គាល់អត្តសញ្ញាណនៅឡើយ។
យោងតាមប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុ គេបានឃើញបុរស់២នាក់ ជិះម៉ូតូម៉ាកស្កុបពីពណ៌ស ដែលពាក់ផ្លាកលេខ តាកែវ 1Q 6376 ឌុបគ្នាធ្វើដំណើក្នុងទិសដៅពីលិច មកកើតក្នុងល្បឿនលឿន ។ ស្រាប់តែភ្លាមនោះដែរ គេឃើញមានរថយន្តម៉ាក ហាយឡែនឌ័រ ពណ៌ស្ករដែលពាក់ផ្លាកលេខ ភ្នំពេញ 2BC 4659 មួយគ្រឿងទៀត ធ្វើដំណើក្នុងទិសដៅពីកើតមកលិច
ដឹកភ្ញៀវបម្រុងបត់ចូលព្រលានយន្តហោះ ត្រូវម៉ូតូមកបុកពេញទំហឹង បណ្តាលឲ្យស្លាប់ម្នាក់ និងរងរបួសធ្ងន់ម្នាក់ បញ្ជូនទៅមន្ទីរពេទ្យ។
ក្រោយពេលកើតហេតុ សមត្ថកិច្ចមូលដ្ឋានចុះមកដល់ រួចទាក់ទងទៅខាងជំនាញចរាចរណ៍ក្រុង ឲ្យចុះមកវាស់វែង យករថយន្តនិងម៉ូតូទៅរក្សាទុករួចធ្វើកំណត់ហេតុ ប្រគល់សពឲ្យទៅក្រុមគ្រួសារ យកទៅស្រុកកំណើតធ្វើបុណ្យតាមប្រពៃណី៕ដោយ៖ សា មេត
