ភ្នំពេញ÷នារីរូបស្រស់ម្នាក់បានបើករថយន្តម៉ាកព្រូសក្នុងល្បឿនលឿនមិនប្រយ័ត្នជ្រុលទៅបុកជាមួយនឹងរឺម៉កបណ្ដាលឲ្យបុរសម្នាក់រងរបួសធ្ងន់រួចក៏ព្យាយាមបើករត់គេចតែត្រូវបានបងប្អូនប្រជាពលរដ្ឋនិងកម្លាំងសមត្ថកិច្ចតាមពីក្រោយហើយក៏បានបួងចង្កូតធ្លាក់ចូលទៅក្នុងប្រឡាយទៅមុខលែងរួច។
ហេតុការណ៍នេះបានកើតឡើងនៅវេលាម៉ោង ១០ និង ៤០នាទីត្រង់ចំណុចបុរីឈូកវ៉ា ២ តាមបណ្ដោយផ្លូវបេតុង ក្នុងសង្កាត់កាកាបទី ២ ខណ្ឌពោធិ៍សែនជ័យ រាជធានីភ្នំពេញ។
ប្រភពព័ត៌មានពីសមត្ថកិច្ចបានឱ្យដឹងថាមុនពេលកើតហេតុគេបានឃើញបុរសម្នាក់បើករ៉ឺម៉កកង់បី មិនមានផ្លាកលេខ ធ្វើដំណើរក្នុងទិសដៅពីលិចមកកើតក្នុងល្បឿនធម្មតាស្រាប់តែមកដល់ចំណុចកើតហេតុ
គេបានឃើញស្ត្រីម្នាក់ បើករថយន្តម៉ាកព្រូសពណ៌សដែលពាក់ផ្លាកលេខ ភ្នំពេញ 2AI 9144 រួមជាមួយស្ត្រីម្នាក់ទៀត ធ្វើដំណើរក្នុងទិសដៅពីលិចមកកើតក្នុងល្បឿនលឿនស្រាប់តែមកដល់ចំណុចកើតហេតុក៏បានជ្រុលចង្កូតទៅបុកនឹងរឺម៉កបណ្ដាលឱ្យដាច់ចេញពីគ្នារួចព្យាយាមបើករត់តែសំណាងមិនល្អត្រូវធ្លាក់ចូលទៅក្នុងប្រឡាយទឹកជាប់នៅត្រឹមហ្នឹងទៅមុខលែងរួច ហើយភ្លាមនោះដែរកម្លាំងសមត្ថកិច្ចក៏បានឃាត់នារីរូបស្រស់ពីររូបយកទៅប៉ុស្តិ៍នគរបាលរដ្ឋបាលសង្កាត់កាកាប ទី២ ដើម្បីសាកសួរបន្ថែម។
ក្រោយពេលកើតហេតុសមត្ថកិច្ចមូលដ្ឋានចុះមកដល់រួចទាក់ទងទៅខាងជំនាញចុះមកធ្វើការវាស់វែងយកម៉ូតូនិងរថយន្តទៅរក្សាទុកនៅអធិការរដ្ឋានខណ្ឌពោធិ៍សែនជ័យដើម្បីរកដំណោះស្រាយនៅពេលក្រោយ៕ ដោយ៖ សាមេត
