ការប្រណាំងរថយន្ត Formula One Grand Prix លើកទី៧ នៅប្រទេស ប៊ែលហ្សិច កីឡាករស្បែកខ្មៅសញ្ជាតិ អង់គ្លេស Lewis Hamilton បាននាំមុខតាំងពីចាប់ផ្តើមរហូតដល់ទីបញ្ចប់នៅទីលាន Spa ក្នុងក្រុង Stavelot ប្រទេស ប៊ែលហ្សិក ដោយ Hamilton ប្រើពេល ១ម៉ោង២៤នាទី និង០៨វិនាទីចុច៧៦១ ក្នុងការយកជ័យជំនះជាលើកទី៥ ក្នុងចំណោម៧ទីលាននារដូវកាល២០២០នេះ ចំណាត់ថ្នាក់ទីពីរបានទៅលើមិត្តរួមក្រុម Mercedes ជាមួយគ្នាគឺកីឡាករសញ្ជាតិហ្វាំងឡង់ Valteri Bottasនិងចំណាត់ថ្នាក់លេខ៣បានទៅលើកីឡាករសញ្ជាតិហូឡង់របស់ក្រុម Red Bull Max Verstappen ដែលប្រើពេលច្រើនជាង Lewis ១៥វិនាទីចុច៤៥៥។
សម្រាប់ជ័យជំនះក្នុងប្រទេស ប៊ែលហ្សិច លើកនេះបានបង្កើនកំណត់ត្រារបស់ Lewis Hamilton ដែលជាកីឡាករស្បែកខ្មៅតែមួយគត់ក្នុងប្រវត្តិសាស្ត្រ Formula One ឲ្យឈានដល់លើកទី៨៩ ដែលនៅខ្វះតែ២លើកទៀតប៉ុណ្ណោះ នឹងតាមស្មើកំណត់ត្រាចាស់របស់អតីតជើងឯកពិភពលោក៧សម័យកាល គឺកីឡាករសញ្ជាតិ អាល្លឺម៉ង់ ដែលឈ្នះ៩១លើក។
សូមបញ្ជាក់ថា Lewis Hamilton ជាកីឡាករប្រណាំងរថយន្ត F1 ជនជាតិ អង់គ្លេសកាត់អាហ្វ្រិច ដំបូងបំផុតក្នុងប្រវត្តិសាស្ត្រអង់គ្លេស ក៏ដូចពិភពលោកដែលធ្លាប់ឈ្នះជើងឯកពិភពលោក៦ដងមកហើយ និង បច្ចុប្បន្នកំពុងនាំមុខគេក្នុងតារាងរួមទៀតផង៕
ប្រភព ៖The Sun
ដោយ ៖វិច្ឆិកា
