ភ្នំពេញ៖ ក្នុងជំនួបរវាងឯកឧត្តមប្រាក់សុខុន ឧបនាយករដ្ឋមន្ត្រី រដ្ឋមន្ត្រីក្រសួងការ បរទេសនិងសហប្រតិបត្តិការអន្តរជាតិ និងលោកជំទាវម៉ានីកា ជេន( Manika Jain) ឯកអគ្គរដ្ឋទូតឥណ្ឌា ប្រចាំកម្ពុជា ដែលនិងបញ្ចប់អាណត្តិ នៅទីស្តីការក្រសួង ថ្ងៃទី១៥ កញ្ញា ឆ្នាំ២០២០ បានបង្ហាញពីការបើកជើងហោះហើរត្រង់ពីឥណ្ឌា និងកម្ពុជា ដើម្បីកំណើនទេសចរណ៍ និងសេដ្ឋកិច្ច។
បន្ទាប់ពីចប់ជំនួបពិភាក្សា ឯកឧត្តម កុយ គួង អ្នកនាំពាក្យក្រសួងការបរទេស មានប្រសាសន៍ឲ្យដឹងថា នៅក្នុងជំនួបជម្រាបលា លោក ជំទាវ ម៉ានីកា ជេន ឯកអគ្គរដ្ឋទូតឥណ្ឌា បានបញ្ជាក់ថា ទំនាក់ទំនងកម្ពុជា ឥណ្ឌាមានការរីកចម្រើនក្នុងអាណត្តិការទូតរបស់ជំទាវ បានបន្តពង្រឹងទំនាក់ទំនងនៃប្រទេសទាំងពីរកាន់តែរឹងមាំ។
ឯកឧត្តមឧបនាយករដ្ឋមន្ត្រី បានថ្លែងអំណរគុណដល់ប្រជាពលរដ្ឋ ប្រទេសឥណ្ឌា ដែលបានផ្តល់ជំនួយអភិវឌ្ឍន៍ដល់កម្ពុជា រួមមានចំនួនឥតសំណង និងកម្ចីឥណ្ឌទាននានា ដើម្បីអភិវឌ្ឍន៍ដល់កម្ពុជា និងការផ្តល់អាហារូបកណ៍ដល់និស្សិតកម្ពុជាទៅរៀននៅឥណ្ឌា។ ជាមួយគ្នានេះដែរ ប្រទេសឥណ្ឌាបានផ្តល់ការអនុគ្រោះពន្ធដល់កម្ពុជា ធ្វើឲ្យទំហំពាណិជ្ជកម្ម មានការកើនឡើងជារៀងរាល់ឆ្នាំ។
កម្ពុជា-ឥណ្ឌា មានទំនាក់ទំនងការទូតល្អជាមួយគ្នា និងមានកិច្ចសហការទ្វេភាគី និងត្រៀមចុះសន្ធិសញ្ញានិងកិច្ចព្រមព្រៀងជាច្រើនទៀត។ លោកជំទាវ ឯកអគ្គរដ្ឋទូតឥណ្ឌា បានកោតសរសើរដល់ក្រសួងសុខាភិបាលកម្ពុជា ដែលបានទប់ស្កាត់ការឆ្លងរាលដាលជំងឺកូវីដ១៩ទទួលបានជោគជ័យ។
គួរបញ្ជាក់ថា បើយោងតាមជំនួបរវាងថ្នាក់ដឹកនាំប្រទេសទាំងពីរ កម្ពុជា- ឥណ្ឌានិងបើកឲ្យមានជើងហោះហើរត្រង់ពីឥណ្ឌាមកកម្ពុជា ដើម្បីកំណើនអ្នកទេសចរណ៍ និងការផ្លាស់ប្តូរវប្បធម៌និងគ្នាទៅវិញ ទៅមករវាងទាំងពីរឱ្យកាន់ប្រសើរឡើងថែមមួយកម្រិតទៀត៕
ដោយ៖CEN
