ខេត្តស្វាយរៀង៖ លោក ម៉ែន វិបុល អភិបាលខេត្តស្វាយរៀង នៅព្រឹកថ្ងៃទី២៣ខែកញ្ញាឆ្នាំ២០២០នេះ បានមានប្រសាសន៍ថា នឹងរៀបចំផ្លាស់ប្តូរអំពូលភ្លើងបំភ្លឺផ្លូវសាធារណៈជាង៤០០បង្គោល ដែលបានដាច់ដោយកន្លែងនៅក្នុងក្រុងស្វាយរៀង ឲ្យបំភ្លឺឡើងវិញទាំងអស់ ចាប់ពីថ្ងៃទី១ ខែតុលាឆ្នាំ២០២០ នេះតទៅ។
លោកអភិបាលខេត្តបានមានប្រសាសន៍ដូច្នេះក្នុងឱកាស ដែលលោកបានអញ្ជើញជាអធិបតីភាព នៅក្នុងពិធីកិច្ចប្រជុំបូកសរុបលទ្ធផលការងារប្រចាំត្រីមាសទី៣ និងលើកទិសដៅការងារត្រីមាសទី៤ ឆ្នាំ២០២០ របស់រដ្ឋបាលខេត្តស្វាយរៀង ដែលពិធីនេះបានប្រព្រឹត្តទៅនាសាលប្រជុំនន្ទី អគារ ខ សាលាខេត្តស្វាយរៀង។
លោក ម៉ែន វិបុល អភិបាលខេត្តបានថ្លែងនូវការកោតសសើរអរគុណចំពោះកងកម្លាំងមានសមត្ថកិច្ច ប្រធានគណៈបញ្ជាការឯកភាព ក្រុង ស្រុក និងអាជ្ញាធរពាក់ព័ន្ធទាំងអស់ ក្នុងឱកាសកាន់បិណ្ឌ និងភ្ជុំបិណ្ឌ បានយកចិត្តទុកដាក់លើការងារពង្រឹងសន្តិសុខសុវត្ថិភាព ជូនដល់ប្រជាពលរដ្ឋបានល្អប្រសើរ ជាពិសេស ការចូលរួមផ្សព្វផ្សាយក្នុងការបង្ការទប់ស្កាត់ ការឆ្លងរាលដាលនៃជំងឺកូវីដ-១៩ នៅតាមមូលដ្ឋាននានាក្នុងខេត្ត។
លោកអភិបាលខេត្តបានដាក់ចេញនូវទិសដៅ និងចំណុចសំខាន់ៗមួយចំនួនដូចជា
១- រដ្ឋបាលខេត្ត និងរៀបចំដាក់អំពូលភ្លើងបំភ្លឺផ្លូវសាធារណៈ ដែលបានដាច់ដោយកន្លែងនៅក្នុងក្រុងស្វាយរៀងឡើងវិញ ក្នុងនោះក៏មានថែមនូវបង្គោលភ្លើង នៅតាមបណ្តាផ្លូវសំខាន់ៗមួយចំនួនទៀត ចាប់ពីថ្ងៃទី០១ ខែតុលា ឆ្នាំ២០២០តទៅ ។ ទន្ទឹមនោះក៏មានរៀបចំដាក់នៅទីប្រជុំជនផ្សារក្រោលគោ និងទីប្រជុំជនផ្សារស្វាយជ្រំផងដែរ។
២- គណៈបញ្ជាការឯកភាពរដ្ឋបាល ក្រុង ស្រុក ត្រូវត្រៀមលក្ខណៈរៀបចំទីទួលមានសុវត្ថិភាព និងត្រៀមសម្ភារៈគ្រប់បែបយ៉ាង ដើម្បីជម្លៀសប្រជាពលរដ្ឋពេលជួបគ្រោះធម្មជាតិដែលអាចកើតឡើងជាយថាហេតុ ដូចជាជំនន់ទឹកភ្លៀងជាដើម ក្នុងរដូវវស្សានេះ។
៣- រដ្ឋបាល ក្រុង ស្រុក អាជ្ញាធរពាក់ព័ន្ធ ត្រូវបន្តជំរុញផ្សព្វផ្សាយការធ្វើអត្តសញ្ញាណប័ណ្ណ នៅតាមមូលដ្ឋានឱ្យបានត្រឹមត្រូវ និងឆាប់រហ័ស ជូនប្រជាពលរដ្ឋ។
៤- រដ្ឋបាលក្រុង ស្រុក ត្រូវជំរុញការផ្សព្វផ្សាយទៅដល់ប្រជាពលរដ្ឋក្នុងការបង់ពន្ធអចលនទ្រព្យគ្រប់ប្រភេទឱ្យ បានមុនការកំណត់នៅថ្ងៃទី៣១ ខែកញ្ញា ឆ្នាំ២០២០នេះ។
៥-មន្ទីរកសិកម្ម និងអភិបាលក្រុងស្រុក ត្រូវបន្តតាមដានការបង្កបង្កើនផលរបស់ប្រជាពលរដ្ឋរួមទាំងការចិញ្ចឹមសត្វ និងដាំដំណាំរួមផ្សំ ក៏ដូចជាបញ្ហាប្រឈមផ្សេងៗ ។
៦- បន្តចូលរួមផ្សព្វផ្សាយអំពីច្បាប់ចរណ៍ផ្លូវគោក បញ្ហាគ្រឿងញៀន ការប្រើប្រាស់អំពើហឹង្សាក្នុងគ្រួសារ។ និង៧- ជំរុញការធ្វើរូប’’ឡូហ្គូ’’តំណាងរដ្ឋបាលក្រុងស្រុកនីមួយៗ និងរៀបចំនូវខ្លឹមសារ អត្ថន័យ នៃ(ឡូហ្គូ)ក្រុងស្រុកនីមួយៗឲ្យបានត្រឹមត្រូវ៕ដោយ៖វ៉ៃកូ
