មន្ទីរបញ្ចាកោណនៃក្រសួងការពារជាតិអាមេរិច ស្នើឲ្យសភាអនុម័តថវិការចំណាយរហូតដល់ ៦៨៦ ពាន់លានដុល្លារ ដើម្បីពង្រឹងការចំណាយលើវិស័យយោធាសំរាប់ឆ្នាំ ២០១៩ខាងមុខ ដែលនេះជាការចំណាយដ៏ធំបំផុតមិនធ្លាប់មាននៅក្នុងវិស័យការពារជាតិ។ នេះបើតាមការចេញផ្សាយរបស់ CNN នៅថ្ងៃអង្គារ ទី១៣នេះ។
នៅពេលជាមួយគ្នានេះដែរ រដ្ឋបាលរបស់លោក ដូណាល់ ត្រាំ បានស្នើឲ្យមានការកាត់ការចំណាយលើកិច្ចការការទូតអន្តរជាតិ និងជំនួយ។
ប្រធានាធិបតីអាមេរិច លោក ដូណាល់ ត្រាំ បាននិយាយថា យោធាអាមេរិចនឹងខ្លាំងបំផុតដែលមិនធ្លាប់មាន ក្រោយធ្វើការស្នើនៅថ្ងៃច័ន្ទម្សិលមិញនេះ។
មន្ត្រីយោធាអាមេរិចបាននិយាយថា ការបង្កើនថវិការចំណាយចំនួន ៨០ពាន់លានដុល្លាគឺមានគោលដៅចំបងទប់ទល់នឹងការគំរាមកំហែងពី រុស្សី និងចិន។
លោកត្រាំ ថ្លែងថា “ពួកយើងត្រូវតែធ្វើវា ពីព្រោះអ្នកផ្សេងកំពុងធ្វើវា។ ប្រសិនពួកគេឈប់ យើងនឹងឈប់ដែរ ប៉ុន្តែពួកគេមិនឈប់នោះទេ។ ដូច្នេះប្រសិនជាពួកគេនឹងមិនឈប់ ពួកយើងនឹងទៅឲ្យឆ្ងាយឲ្យបានមុនអ្នកគ្រប់គ្នា ដែលអ្នកមិនធ្លាប់ឃើញពីមុនមក”។ លោកចង់សំដៅថា យោធាអាមេរិចត្រូវតែខ្លាំងឆ្ងាយជាងអ្នកផ្សេង៕
