ខេត្តស្វាយរៀង៖ ចោរម្នាក់បានធ្វើសកម្មភាពលួចម៉ូតូបានហើយ ប៉ុន្តែរត់រួចត្រូវសមត្ថកិច្ចនគរបាលក្រុងស្វាយរៀងក្របួចចាប់ភ្លាមៗដែរបន្ទាប់ពីប្រជាពលរដ្ឋរាយការណ៍មក។
ករណីនេះបានកើតឡើងកាលព្រឹកថ្ងៃទី៥ ខែវិច្ឆិកា ឆ្នាំ២០២០ ម៉ោង៧និង០០នាទីព្រឹក នៅត្រង់ចំណុច ភូមិវាលយន្ត សង្កាត់ស្វាយរៀង ក្រុងស្វាយរៀង ។
ប្រភពពីសមត្ថកិច្ចបានឱយដឹងថា ករណីលួចមានស្ថានទម្ងន់ប្រើមធ្យោបាយផ្សេងៗ (ប្លន់ម៉ូតូ) មួយកើតឡើងបង្កដោយជនសង្ស័យម្នាក់ឈ្មោះ សុខ ទី ភេទប្រុស អាយុ២៥ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅភូមិរោងបន្លែ សង្កាត់ស្វាយរៀង ក្រុងស្វាយរៀង បានធ្វើសកម្មភាពលួចយកម៉ូតូ ១ គ្រឿង ម៉ាកZoomer X ស៊េរីឆ្នាំ២០១៦ ពណ៌ខ្មៅ-បៃតង ពាក់ផ្លាកលេខ ស្វាយរៀង 1F-1983 របស់ឈ្មោះ គង់ សុផុន ភេទប្រុស អាយុ៤៨ឆ្នាំ ជនជាតិខ្មែរ មុខរបរមន្ត្រីរាជការ មានទីលំនៅភូមិ.សង្កាត់កើតហេតុខាងលើ។ប្រភពនោះបន្តថា បន្ទាប់ពីធ្វើសកម្មភាពលួចបានហើយជនសង្ស័យ បានជិះម៉ូតូគេចខ្លួនទៅទិសខាងកើត ហើយក៏ត្រូវម្ចាស់ផ្ទះស្រែកអោយប្រជាពលរដ្ឋនៅក្បែរនោះជួយជិះម៉ូតូដេញតាមពីក្រោយ និងបានរាយការណ៍មកនគរបាលជួយអន្តរាគមន៍។
ប្រភពខាងលើបានឲ្យដឹងបន្ថែមទៀតថា:ក្រោយពីទទួលបានព័ត៌មានភ្លាមៗនោះ នគរបាលជំនាញ នៃអធិការដ្ឋាននគរបាលក្រុងស្វាយរៀង ប៉ុស្តិ៍នគរបាលរដ្ឋបាលសង្កាត់ស្វាយរៀង សហការជាមួយកម្លាំងអាវុធហត្ថ បានចេញដេញតាមជនសង្ស័យរហូតដល់ត្រង់ចំណុចខាងមុខអតីតបញ្ជាការដ្ឋានកងរាជអាវុធហត្ថខេត្ត ស្ថិតក្នុងភូមិរោងបន្លែ ក្រុងស្វាយរៀង ជនសង្ស័យក៏ផ្តួលម៉ូតូចោល រួចរត់ចូលផ្ទះប្រជាពលរដ្ឋនៅក្បែរនោះ ហើយក៏ត្រូវសមត្ថកិច្ចយើងឃាត់ខ្លួនបានតែម្តង។ បច្ចុប្បន្ន ជនសង្ស័យត្រូវបានបញ្ជូនទៅការិយាល័យជំនាញខេត្ត ចាត់ការតាមច្បាប់៕ ដោយ៖វ៉ៃកូ
