ស្ទឹងត្រែង៖ បុរសកាន់កាតកាសែតម្នាក់ ត្រូវបានកងរាជអាវុធហត្ថឃាត់ខ្លួន ក្នុងពេលចុះបង្ក្រាបរថយន្តកាមរីឆ្លាម ដឹកជញ្ជូនឈើនៅម៉ោងជាង ២រសៀល ថ្ងៃទី១២ខែវិច្ឆិកាឆ្នាំ២០២០។
សមត្ថកិច្ចបានប្រាប់ឲ្យដឹងថា រថយន្តកាមរីឆ្លាមបានដឹកឈើប្រណីតពីស្រុកសៀមប៉ាង ខេត្តស្ទឹងត្រែង ក្នុងបំណងយកលក់នៅស្រុកស្នួល ខេត្តក្រចេះ។ សមត្ថកិច្ចបានដេញស្ទាក់តាំងពីចំណុចដុងក្រឡ រហូតដល់ត្រង់ចំណុចមុខវត្តអូរព្រះ ស្ថិតក្នុងឃុំអូរគ្រៀង ស្រុកសំបូរ ខេត្តក្រចេះទើបចាប់បាន។
នៅក្នុងពេលចុះបង្ក្រាបឈ្មួងឈើនោះ បើកប៉ះរថយន្តសមត្ថកិច្ចអស់៣គ្រឿងផង។
សេចក្តីរាយការណ៍បានឲ្យដឹងទៀតថា រថយន្តដឹកឈើដែលកម្លាំងសមត្ថកិច្ចអាវុធហត្ថ បង្ក្រាបបាន ជាប្រភេទរថយន្តកាមរីឆ្លាម ពណ៌ស្លែ ពាក់ផ្លាកលេខ កំពង់ស្ពឺ 2A-2025 ។ ចំណែកអ្នកបើកបររថយន្ត ឈ្មោះ តាន សុភ័ក្ត្រ ជាជំនួយការនិពន្ធនាយក របស់អង្គភាពសារព័ត៌មានមួយក្នុងស្រុក ដែលឈរជើងយកព័ត៌មាន នៅក្នុងខេត្តក្រចេះ។
ក្រោយការឃាត់ខ្លួនជនសង្ស័យ រួមជាមួយរថយន្តដឹកឈើក្រញូង ត្រូវបានបញ្ជូនមកកាន់បញ្ជាការដ្ឋានកងរាជអាវុធហត្ថខេត្តស្ទឹងត្រែង ។ ដោយឡែកឈើនៅក្នុងរថយន្តនោះ នៅមិនទាន់ដឹងពីចំនួនពិតប្រាកដនៅឡើយទេ ចំពោះវត្ថុតាងបទល្មើស ត្រូវបានប្រគល់ទៅឲ្យមន្ត្រីព្រៃឈើខេត្តស្ទឹងត្រែង ដើម្បីកសាងសំណុំរឿង ចាត់ការតាមនីតិវិធីច្បាប់៕ ដោយ៖សុខុម
