បាត់ដំបង៖ ប្រជាពលរដ្ឋរងផលប៉ះពាល់ ដោយជំនន់ទឹកភ្លៀងនិងមានជីវភាពក្រីក្រជាង ៧៥០គ្រួសារ រស់នៅក្នុងស្រុកគាស់ក្រឡ ខេត្តបាត់ដំបង បានទទួលនូវពូជបន្លែចំនួន៦មុខ ជាអំណោយសម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដើម្បីយកទៅដាំដុះស្ដារជីវភាពគ្រួសារឡើងវិញ ក្រោយពីទឹកជំនន់ស្រក។
អំណោយពូជបន្លែដែលចែកជូនពលរដ្ឋតាមរយៈ ឯកឧត្តមងួន រតនៈ អភិបាលខេត្តបាត់ដំបង ឯកឧត្តម ស្រេង វង្សហៀងនិងលោកជំទាវ សុត សុវណ្ណដា អនុប្រធានក្រុមការងារចុះជួយស្រុកគាស់ក្រឡ ដែលពូជបន្លែនេះជាការឧបត្ថម្ភ របស់សភាយុវពាណិជ្ជកម្មអន្តរជាតិកម្ពុជា និងសហព័ន្ធស្រូវអង្ករកម្ពុជា បានធ្វើឡើងកាលពីព្រឹកថ្ងៃទី១៦ ខែវិច្ឆិកា ឆ្នាំ២០២០។
ឯកឧត្តម ងួន រតនៈ បានមានប្រសាសន៍ថាបច្ចុប្បន្ន បន្ទាប់ពីទឹកស្រកពលរដ្ឋក្នុងខេត្តបាត់ដំបង ដែលមានលទ្ធភាពនិងមានទឹកគ្រប់គ្រាន់ កំពុងធ្វើស្រែស្ដារជីវភាពឡើងវិញ ស្ទើរនៅទូទាំងខេត្តនិងនៅតំបន់ខ្លះក៏បានដាំដំណាំផ្សេងៗ ខណៈអាជ្ញាធរខេត្តក៏កំពុងធ្វើការស្ដារជួសជួលកែលម្អឡើងវិញនូវហេដ្ឋារចនាសម្ព័ន្ធ ដែលបានរងការប៉ះពាល់និងខូចខាតដោយទឹកជំនន់កន្លងទៅ។ ទន្ទឹងនឹងការស្ដារនូវវិស័យកសិកម្មនេះ រាជរដ្ឋាភិបាលនិងសប្បុរសជននានា បានផ្ដល់នូវពូជស្រូវ ពូជដំណាំនិងសត្វជាដើម ដល់ពលរដ្ឋក្នុងការជួយស្ដារជីវភាពឡើងវិញ។ក្នុងនាមជាអាជ្ញាធរខេត្តនឹងខិតខំប្រឹងប្រែងជួសជុលកែលម្អនូវហេដ្ឋារចនាសម្ព័ន្ធរងការប៉ះពាល់ ទៅតាមទីតាំងអាទិភាព ក្នុងការបម្រើផលប្រយោជន៍របស់ពលរដ្ឋគ្រប់គ្នា។
ឯកឧត្តម ស្រេង វង្សហៀង អនុប្រធានក្រុមការងារចុះជួយស្រុកគាស់ក្រឡ បានជំរុញពលរដ្ឋទទួលបានពូជបន្លែ ត្រូវខិតខំដាំដុះថែទាំ ដើម្បីអាចទទួលប្រយោជន៍ពីវា ទាំងអាចទុកបរិភោគខ្លួនឯងផងនិងលក់ដូរបានប្រាក់សម្រាប់ផ្គត់ផ្គង់គ្រួសារផង។ ក្រុមការងារឯកឧត្តមនិងសហការីនឹងបន្តចូលរួមជាមួយរាជរដ្ឋាភិបាល ក្នុងការជួយកាត់បន្ថយនូវភាពក្រីក្ររបស់ពលរដ្ឋ ក្នុងមូលដ្ឋានស្រុកគាស់ក្រឡ។
ពលរដ្ឋដែលទទួលបានពូជបន្លែ បាននិយាយលើកឡើងថាការផ្ដល់ពូជបន្លែដល់ពួកគាត់នៅពេលនេះ គឺបានឆ្លើយតបទាន់ពេលវេលា ខណៈទឹកក៏ចាប់ផ្ដើមស្រកជិតអស់ ហើយពួកគាត់នឹងអាចយកពូជបន្លែទាំងអស់នេះទៅដាំដុះបានបណ្ដើរៗ។
គួរបញ្ជាក់ផងដែរថា សភាយុវពាណិជ្ជកម្មអន្តរជាតិកម្ពុជា និងសហព័ន្ធស្រូវអង្ករកម្ពុជា នឹងបន្តចែកពូជបន្លែដល់ពលរដ្ឋក្នុងខេត្តបាត់ដំបង មាន៣ស្រុកទៀត គឺមានស្រុករតនមណ្ឌល ស្រុកបាណន់និងស្រុកសំឡូត ដើម្បីយកទៅដាំដុះ ហើយបន្ទាប់ពីទឹកស្រកទៅនេះដែរ រាជរដ្ឋាភិបាល ក៏បានផ្ដល់នូវពូជស្រូវ ពូជបន្លែនិងកូនត្រី ដល់ពលរដ្ឋក្នុងខេត្តបាត់ដំបង រងផលប៉ះពាល់ដោយទឹកជំនន់ចំនួនជាង ១០ ៧០០គ្រួសារផងដែរ ៕ ដោយ៖អ៊ុងសារុំ
