ប្រិយមិត្ត និងមហាជន បានទទួលជ្រាបរួចហើយ ពីក្មេងស្រីម្នាក់ឈ្មោះ យ៉ង់ ស្រីនីត រស់នៅក្នុងខេត្តមណ្ឌលគិរី ដែលពេលនេះកំពុងទទួលបានការចាប់អារម្មណ៍យ៉ាងខ្លាំង តាមរយៈ រូបសម្រស់ស្អាតប្លែក មានទម្រង់មុខប្រៀបដូចតារា ឥណ្ឌា និងសមត្ថភាពរបស់ប្អូនស្រី ក៏អាចច្រៀងបានយ៉ាងពីរោះ ថែមទៀតផង។
យ៉ាងណាមិញ ក្រោយពី បានឃើញ ក្មេងស្រី សម្បុរ ខ្មៅ ស្រអែម រូបនេះ ដែលមានរូបឆោមស្រស់សោភា ប្លែកគួរឲ្យចាប់អារម្មណ៍ ជាហេតុធ្វើឲ្យមហាជនបានបង្ហាញការពេញចិត្ត និងសរសើរដល់នាងគ្រប់ៗគ្នាថា ៖ « ស្អាត ខ្លាំងណាស់ ទម្រង់មុខដូចបវរកញ្ញា , ឈាមខ្មែរដើម !! មើលតែច្រមុះទេអ្នកមណ្ឌលគិរី រតនគិរី ច្រមុះស្អាតៗណាស់ ! » ។
តែយ៉ាងណា ដោយឃើញស្ថានសភាពរបស់ក្មេងស្រីរូបនេះ ហាក់ក្រលំបាកខ្លាំង ខណៈដើរលក់ចេកឆាបស្ថិតក្នុងសម្លៀកបំពាក់ចាស់ និងសក់សំពីងសំពោងដ៏គួរឲ្យអាណិត បងប្រុសម្នាក់ដែលមានគណនីហ្វេសប៊ុកឈ្មោះ Bouy Meng Hong ក៏មានបំណងចង់ជួយផ្តល់ការងារឲ្យនាងបានធ្វើ និងទទួលបានប្រាក់ខែ៣ខែដំបូង 200$ ។ ប៉ុន្តែ ប្រហែលគួរឲ្យសោកស្តាយ ព្រោះថា ពេលនេះប្អូនស្រី យ៉ង់ ស្រីនីត ដែលឆ្នាំនេះមានអាយុ១១ឆ្នាំ កំពុងសិក្សាថ្នាក់ទី៥ ហេតុនេះ ប្រហែលជាប្អូនស្រីពុំអាចតបតាមការជួយជ្រោមជ្រែងរបស់សប្បុរសជនខាងលើបានទេ។
ដោយឡែក នាយ ពាក់មី ឯណេះ ក៏បានប្រកាសសួររកលេខទូរស័ព្ទរបស់ក្មួយស្រី ក្នុងបំណងហៅគាត់មកសម្តែង ដោយលោកបានបង្ហោះសារយ៉ាងខ្លីថា៖ «មានបងប្ពូនណាស្គាល់លេខ ក្មួយស្រីម្នាក់នេះអត់ ខ្ញុំចង់ហៅគាត់ថត»។ បន្ទាប់មក នាយ ពាក់មី ក៏បានប្រាប់តាមខមិនឲ្យដឹងទៀតថា៖ «អគុណ បងប្អូននឹងឃើញគាត់សំដែងឆាប់ៗនេះ ដើម្បីឲ្យគាត់បានថវិកាខ្លះ និងអោយគាត់បានចូលសិល្បៈតាមបំណងប្រាថ្នារបស់គាត់ គាត់នឹងមានទីផ្សារបន្តទៅមុខទៀត តាមរយៈផលិតកម្មផ្សេងៗហៅគាត់»។
ជាមួយគ្នានេះផងដែរ មហាជនក៏បានសម្តែងនូវក្តីត្រេកអរជំនួសជាខ្លាំង និងក៏បានកោតសរសើរនូវទឹកចិត្តដ៏ល្អរបស់នាយ ពាក់មី ថា៖ «គាំទ្រប្រូ, អរគុណដល់ទឹកចិត្តបងប្រុសណាស់ដែលបានផ្ដល់ឱកាសឲ្យគាត់បានធ្វើនូវអ្វីដែលគាត់ស្រឡាញ់, អរគុណលោកពូណាស់ ខ្ញុំនឹងចាំគាំទ្ររហូត, បងពាក់មីកុំយូរពេក ចង់ឃើញគាត់សម្តែងខ្លាំងណាស់!!»៕ ដោយ៖ លឹម ហុង
