ភ្នំពេញ៖ បុរសវ័យចំណាស់ម្នាក់បានបើកបររថយន្តម៉ាកហាយឡិនឌ័រ១គ្រឿង ក្នុងទិសដៅពីជើងទៅត្បូង តាមបណ្ដោយផ្លូវលេខ៤៧ ស្រាប់តែមកដល់ត្រង់ចំណុចទល់មុខនឹងហាងកាសា ក៏បានជ្រុលទៅបុកជាមួយនឹងម៉ូតូម៉ាកសង់២០១៩គ្រឿង ដែលបានបើកបរស្របទិសដៅគ្នាពីខាងក្រោយបណ្ដាលឱ្យរងការខូចខាតយ៉ាងធ្ងន់ធ្ងរ ចំណែកភាគីខាងម៉ូតូចំនួន២នាក់ បានរងរបួសធ្ងន់ម្នាក់នឹងម្នាក់ទៀតរងរបួសស្រាល ត្រូវបានបញ្ជូនយកទៅព្យាបាលនៅមន្ទីរពេទ្យកេតុមាលាភ្លាមៗផងដែរ ។
ហេតុការណ៍នេះបានកើតឡើងកាលពីវេលាម៉ោង ៨ នឹង២០ នាទីព្រឹក ថ្ងៃទី ២៨ ខែវិច្ឆិកាឆ្នាំ ២០២០ ស្ថិតក្នុងសង្កាត់វត្តភ្នំ ខណ្ឌដូនពេញ រាជធានីភ្នំពេញ ។
តាមប្រភពព័ត៌មានដែលក្រុមការងារយើងទទួលបានពីកន្លែងកើតហេតុ បានបញ្ជាក់ប្រាប់ឲ្យដឹងថា នៅមុនពេលកើតហេតុគេបានឃើញបុរសវ័យចំណាស់ម្នាក់ បើកបររថយន្តម៉ាក់ហាយឡិនឌ័រ ពណ៌ស ១គ្រឿងពាក់ផ្លាកលេខភ្នំពេញ2X 3365 ក្នុងទិសដៅពីជើងទៅត្បូង ខណៈពេលមកដល់ត្រង់ចំណុចកើតហេតុខាងលើ ក៏បានជ្រុលទៅបុកហើយកិនពីលើម៉ូតូម៉ាកហុងដាស៊េរីឆ្នាំ២០១៩ ពណ៌ខ្មៅ ពាក់ផ្លាកលេខកណ្ដាល1l 8116 ដែលកំពុងតែបើកបរស្របទិសដៅគ្នា ហើយក៏មានការកកស្ទះនៅចន្លោះផ្លូវផ្នែកខាងមុខនោះផងដែរ ។
ក្រោយកើតហេតុសមត្ថកិច្ច មូលដ្ឋានក៏បានចុះមកដល់ដើម្បីធ្វើការវាស់វែង នឹងយករថយន្តបង្កព្រមទាំងម៉ូតូជនរងគ្រោះ ចេញពីពាក់កណ្ដាលផ្លូវទៅអែបខាង ដើម្បីធ្វើការសម្របសម្រួលគ្នា នឹងចេញជាសំណង់ទៅដល់ជនរងគ្រោះ ដើម្បីបញ្ចប់រឿងនៅកន្លែងកើតហេតុ៕ ដោយ ៖ ហេងវុត្ថា
