ភ្នំពេញ៖ នៅព្រឹកថ្ងៃព្រហស្បតិ៍ ទី១៤មករានេះ សាលាដំបូងរាជធានីភ្នំពេញ បានបើកសវនាការសួរឆ្លើយទៅលើមន្ត្រី និងសកម្មជនអតីតគណបក្សសង្គ្រោះជាតិប្រមាណ៦០នាក់នៅក្នុងសំណុំរឿងរួមគំនិតក្បត់ និងញុះញង់ឱ្យប្រព្រឹត្តបទល្មើសជាអាទិ៍។ សវនាការនៅព្រឹកនេះ មានអ្នកការពារសិទ្ធិមនុស្សអង្គការសហប្រជាជាតិបានសម្តែងកង្វល់ចំពោះសវនាការលើមនុស្សច្រើននាក់នេះដោយថា ការទទួលបានការជំនុំជម្រះដោយយុត្តិធម៌របស់ពួកគេប្រឈមនឹងហានិភ័យ។
មជ្ឈមណ្ឌលសិទ្ធិមនុស្ស បានចេញផ្សាយព័ត៌មានថា នៅព្រឹកថ្ងៃទី១៤ ខែមករា ឆ្នាំ២០២១ វេលាម៉ោង៨និង៣០នាទីព្រឹកនេះ សមាជិកគ្រួសារអតីតសកម្មជនគណបក្សសង្គ្រោះជាតិ ដែលត្រូវបានចាប់ខ្លួនជាង២០នាក់ និងអ្នកគាំទ្រប្រមាណ៥០នាក់ទៀត បានប្រមូលផ្តុំគ្នា នៅទីតាំង៣កន្លែងផ្សេងៗគ្នា ដើម្បីបង្ហាញការគាំទ្រ ដល់អតីតសមាជិកគណបក្សសង្គ្រោះជាតិ ដែលស្ថិតក្នុងសវនាការអង្គសេចក្ដីនៅសាលាដំបូងរាជធានីភ្នំពេញ ក្រោមបទចោទ “រួមគំនិតក្បត់ និងញុះញង់ឱ្យប្រព្រឹត្តបទឧក្រិដ្ឋជាអាទិ៍”។
ក្រុមទីមួយ បានប្រមូលផ្ដុំគ្នានៅទិសខាងត្បូងឈាងខាងកើតនៃផ្លូវមុន្នីរ៉េត ចម្ងាយ១គីឡូម៉ែត្រពីតុលាការ ហើយក្រុមទីពីរបានប្រមូលផ្ដុំនៅខាងក្នុងជិតរបងស្តាតអូឡាំពិក និងក្រុមទីបីបានប្រមូលផ្តុំគ្នានៅខាងជើងនៃតុលាការ។
អាជ្ញាធរជាច្រើនរួមមានទាំងប៉ូលីស និងសន្តិសុខខណ្ឌ ត្រូវបានដាក់ពង្រាយនៅជុំវិញតំបន់នោះ។
ក្រុមអ្នកតវ៉ាមិនត្រូវបានអនុញ្ញាតឱ្យឈរនៅក្បែរតុលាការឡើយ ដោយអាជ្ញាធរបានដេញពួកគេចេញ រហូតដល់ក្នុងពហុកីឡដ្ឋានជាតិអូឡាំពិក និងបានរារាំងឱ្យនៅទីនោះ។
ក្រុមអ្នកឃ្លាំមើលសិទ្ធិរបស់ម.ស.ម.ក ក៏ត្រូវបានដេញចេញចម្ងាយប្រមាណ១គីឡូម៉ែត្រពីតុលាការ រហូតដល់ម៉ោង១០ព្រឹក ដោយឱ្យពួកគេឃ្លាំមើលបានតែពីរបងពហុកីឡដ្ឋាន។ អាជ្ញាធរបានចាប់ខ្លួន លោកម៉ុក សំអាន ដែលជាអតីតសមាជិកក្រុមប្រឹក្សាស្រុកមេមត់ នៃខេត្តត្បូងឃ្មុំផងដែរ។
សវនាការនឹងត្រូវបន្តទៅថ្ងៃទី២៨ ខែមករា ឆ្នាំ២០២១ វេលាម៉ោង៨:៣០នាទីព្រឹក។
លើសពីនេះ តុលាការកំពូលថ្ងៃនេះ បានបើកសវនាការជំនុំជម្រះលើបណ្តឹង សុំនៅក្រៅឃុំរបស់សមាជិកពីររូបនៃក្រុមខ្មែរថាវរៈ គឺលោក ហ៊ុន វណ្ណៈ និងកញ្ញា ឈឿន ដារ៉ាវី។ តុលាការនឹងប្រកាសសាលដីការបស់ពួកគេនៅថ្ងៃទី ២១ ខែមករាឆ្នាំ ២០២១។
មុនសវនាការនេះមួយថ្ងៃនេះ លោកស្រី រ៉ូណា ស្មីត អ្នករាយការណ៍ពិសេសអង្គការសហប្រជាជាតិ ទទួលបន្ទុកស្ថានភាពសិទ្ធិមនុស្សនៅកម្ពុជាបានបង្ហាញនូវកង្វល់អំពីការជំនុំជម្រះក្តី ដែលលោកស្រីចាត់ទុកថា មានលក្ខណៈទ្រង់ទ្រាយធំ នេះ។ តាមរយៈទំព័រហ្វេសប៊ុក លោកស្រីរ៉ូណា ស្មីត បានលើកឡើងថា សវនាការនេះ នឹងធ្វើឱ្យសិទ្ធិបុគ្គលរបស់ពួកគេ ក្នុងការទទួលបានការជំនុំជម្រះក្តីប្រកបដោយយុត្តិធម៌ត្រូវប្រឈមនឹងហានិភ័យ។
លោកស្រីរ៉ូណា ស្មីត បានស្នើយ៉ាងទទូចឱ្យរដ្ឋាភិបាលកម្ពុជាគោរពសិទ្ធិទទួលបានការជំនុំជម្រះក្តីប្រកបដោយយុត្តិធម៌ដល់បុគ្គលទាំងនេះ និងបានលើកទឹកចិត្តឱ្យអាជ្ញាធរកម្ពុជាជួយសម្រួលដល់ការវិលត្រឡប់របស់ពួកគេ និងអនុញ្ញាតឱ្យពួកគេចូលរួមសវនាការ និងការពារក្តីរបស់ខ្លួននៅក្នុងតុលាការ។ លោកស្រីរ៉ូណា ស្មី ចង់ឱ្យអាជ្ញាធរកម្ពុជាជួយសម្រួលឱ្យមានការចូលរួមសវនាការពីចម្ងាយដល់ពួកគេ ឬពន្យារការជំនុំជម្រះរហូតដល់ជនជាប់ចោទអាចធ្វើដំណើរមកកម្ពុជាបាន៕រក្សាសិទ្ធិដោយ៖បញ្ញាស័ក្តិ
