ភ្នំពេញ៖ ក្រុមសង្គមស៊ីវិល សហជីព និងសហគមន៍ចំនួន៨៨ សូមសម្ដែងការសោកស្ដាយ និងព្រួយបារម្ភយ៉ាងខ្លាំងចំពោះការចាប់និងឃុំខ្លួនតំណាងសហគមន៍ដីធ្លីចំនួន៣នាក់ ក៏ដូចជាការចោទប្រកាន់ទៅលើតំណាងសហគមន៍ដីធ្លីជាង៥០នាក់ទៀត កាលពីពេលថ្មីៗកន្លងមកនេះ និងសូមស្នើសុំឱ្យតុលាការទម្លាក់ចោលការចោទប្រកាន់ និងដោះលែងអ្នកទាំងនោះឱ្យមានសេរីភាពវិញ ។
បើតាមសេចក្តីថ្លែងការណ៍នៅថ្ងៃទី១៤មករា បានឲ្យដឹងថា លោក ផុន សុផល តំណាងសហគមន៍ដីធ្លីឃុំជាំក្រវៀន ត្រូវបានកម្លាំងនគរបាលចាប់ខ្លួន នៅច្រក ផ្លូវចូលទៅក្រុមហ៊ុន ឃី ជឿ ស្ថិតនៅឃុំរាម ស្រុកព្រៃនប់ ខេត្តព្រះសីហនុ កាលពីព្រឹកថ្ងៃពុធ ទី៣០ ខែធ្នូ ឆ្នាំ២០២០ បន្ទាប់ពីលោកត្រឡប់ពីចូលរួមកិច្ចប្រជុំឆ្លុះបញ្ចាំងសកម្មភាពការងារប្រចាំឆ្នាំ២០២០ ជាមួយ សមាគមសម្ព័ន្ធកសិករកម្ពុជា ដែលប្រារព្ធឡើងនៅសហគមន៍ថ្មធំព្រែកត្របែក ភូមិអណ្តូងត្របែក ឃុំរាម ស្រុកព្រៃនប់ ខេត្តព្រះសីហនុ ។ ការចាប់ខ្លួននេះធ្វើឡើងតាមរយៈដីកាបង្គាប់ឲ្យចាប់ខ្លួនលេខ០៣ ចុះថ្ងៃទី ២៨ ខែធ្នូ ឆ្នាំ២០២០ ដោយចោទប្រកាន់ពីបទសមគំនិតក្នុងអំពើញុះញង់ឲ្យប្រព្រឹត្ត អំពើបង្កឲ្យមានភាព វឹកវរធ្ងន់ធ្ងរដល់សន្តិសុខសង្គម ប្រព្រឹត្តតាមបណ្តាញសង្គម ក្នុងភូមិសាស្ត្រ ខេត្តត្បូងឃ្មុំ កាលពីថ្ងៃទី២២ ខែសីហា ដល់ថ្ងៃទី២២ ខែតុលា ឆ្នាំ២០២០ ចេញដោយចៅក្រមស៊ើបសួរសាលាដំបូងខេត្តត្បូងឃ្មុំ ។ លោកក៏ត្រូវបាននាំខ្លួនពីខេត្តព្រះសីហនុ មកឃុំខ្លួនបណ្តោះអាសន្នក្នុងពន្ធនាគារខេត្តត្បូងឃ្មុំ កាលពី រសៀលថ្ងៃទី៣១ ខែធ្នូ ឆ្នាំ២០២០ ដោយមិនបានផ្តល់ព័ត៌មានដល់ក្រុមគ្រួសាររបស់គាត់ឱ្យស្របទៅតាម នីតិវិធីឡើយ ។ ក្រោយមកទើបក្រុមគ្រួសារបានដឹងព័ត៌មានតាមរយៈ មន្ត្រីពន្ធនាគារបានធ្វើការទាក់ទង ទៅពួកគាត់ ។ តាមការចោទប្រកាន់នេះលោក ផុន សុផល អាចត្រូវប្រឈមការផ្តន្ទាទោសជាប់ពន្ធនាគារ ចំនួនពី៦ខែ ទៅ២ឆ្នាំ តាមបញ្ញត្តិមាត្រា៤៩៤និងមាត្រា៤៩៥ នៃក្រមព្រហ្មទណ្ឌនៃព្រះរាជាណាចក្រកម្ពុជា ។ លោក ផុន សុផល ជាតំណាងសហគមន៍ដីធ្លីជាំក្រវៀន ខេត្តត្បូងឃ្មុំ តែងតែធ្វើសកម្មភាព ក្នុងការជួយ ជ្រោមជ្រែងការពារសិទ្ធិដីធ្លីជូនប្រជាពលរដ្ឋក្នុងសហគមន៍ និងតែងតែឈឺឆ្អាលចូលរួមតស៊ូមតិដោយសន្តិ វិធី ពីបញ្ហាអយុត្តិធម៌សង្គម និងព្រឹត្តិកាណ៍សង្គមនានា ស្របតាមច្បាប់សិទ្ធិមនុស្សជាតិ និងអន្តរជាតិ ។
ក្រៅពីនេះ តំណាងសហគមន៍២នាក់នៅសហគមន៍ស្រែប្រាំងក្នុងខេត្តត្បូងឃ្មុំ ត្រូវបានចាប់ខ្លួន ខណៈដែលសមាជិកសហគមន៍របស់ពួកគាត់ជាង៣០នាក់ផ្សេងទៀតត្រូវបាន រងការចោទប្រកាន់ពីបទល្មើសព្រហ្មទណ្ឌជាច្រើន ដោយសារភាពសកម្មរបស់អ្នកទាំងនោះក្នុងការព្យាយាមការពារដីធ្លីសហគមន៍ របស់ពួកគាត់ ។ ក្នុងនោះមាន លោក សែម សាង ដែលត្រូវបានចាប់ខ្លួនកាលពីខែតុលា ឆ្នាំ២០១៩ និងលោក សឿន ស៊ីនាត ដែលត្រូវបានចាប់ខ្លួនកាលពីខែសីហា ឆ្នាំ២០២០ ។ អ្នកទាំងពីរ ត្រូវបានប្រឈម នឹងបទចោទជាច្រើន ពាក់ព័ន្ធនឹងជម្លោះដីធ្លីមួយរវាង ក្រុមហ៊ុនចិនចំការកៅស៊ូ ហាម៉ឺនី វីន អ៊ិនវេសមេន និងសហគមន៍មួយចំនួននៅស្រុកតំបែរ ខេត្តត្បូងឃ្មុំ ។
នៅខេត្តកោះកុងឯណោះវិញ មានតំណាងសហគមន៍ដីធ្លីចំនួន ១៣នាក់ ត្រូវបានសាលាដំបូង ខេត្តកោះកុងចោទប្រកាន់ពី បទបរិហារបង្កាច់កេរ្តិ៍” “បទញុះញង់ឲ្យប្រព្រឹត្តអំពើបង្កឲ្យមានភាពវឹកវរធ្ងន់ធ្ងរ ដល់សន្តិសុខសង្គម” និង “បទបរិហារកេរ្តិ៍ជាសាធារណៈ។ តាមបញ្ញត្តិ មាត្រា៣១១ មាត្រា៣១២ មាត្រា ៤៩៤និងមាត្រា៤៩៥ និងមាត្រា៣០៥នៃក្រមព្រហ្មទណ្ឌ ហើយត្រូវបានដាក់ឲ្យស្ថិតក្រោមការត្រួតពិនិត្យ តាមផ្លូវតុលាការ ដោយសារការប្រើប្រាស់សិទ្ធិសេរីភាពជាមូលដ្ឋានក្នុងការការពារដីធ្លីរបស់ពួកគាត់។
តាមការឃ្លាំមើលលើបញ្ហាការរំលោភសិទ្ធិមនុស្សនៅកម្ពុជា មួយរយៈចុងក្រោយនេះ ក្រុមសង្គមស៊ីវិលទាំងអស់គ្នាជាអង្គការ សមាគម សហជីព និងសហគមន៍ សង្កេតឃើញថា មានការធ្វើទុក្ខបុកម្នេញពីសំណាក់ អាជ្ញាធរ និងការចោទប្រកាន់ និងចាប់ខ្លួនសកម្មជនដីធ្លី សកម្មជនបរិស្ថាន ជាច្រើនដោយចោទប្រកាន់ពី បទញុះញង់ឲ្យប្រព្រឹត្តបទឧក្រិដ្ឋជាអាទិ៍ ញុះញង់ឲ្យមានភាពវឹកវរដល់សន្តិសុខសង្គម និងបទល្មើសផ្សេង ទៀត ។ ការចាប់ និងឃុំខ្លួន លោក ផុន សុផល លោក សឿន ស៊ីនាត លោក សែម សាង ជាតំណាងសហ គមន៍ដីធ្លី អ្នកស្រី អេង វ៉ាន់ (តាមសាលដីការតុលាការកំពូល)ជាសកម្មជនដីធ្លីដ៏ឆ្នើម គឺជាការគំរាមកំហែង ដោយផ្ទាល់ និងប្រយោល ចំពោះសហគមន៍ដីធ្លីទូទាំងប្រទេស ព្រោះពួកគាត់តែងតែជួយការពារសិទ្ធិ ពលរដ្ឋក្នុងសហគមន៍ និងចូលរួមកិច្ចការសង្គមយ៉ាងសកម្មជាច្រើននាពេលកន្លងមកនេះ តែបែរជាត្រូវ បានអាជ្ញាធរចាប់ខ្លួន ដោយគ្រាន់តែប្រើប្រាស់សិទ្ធិរបស់ខ្លួន ទាំងដែលសិទ្ធិទាំងនេះត្រូវបានធានាដោយ រដ្ឋ ធម្មនុញ្ញ នៃព្រះរាជាណាចក្រកម្ពុជា និងកតិកាសញ្ញាអន្តរជាតិស្តីពីសិទ្ធិមនុស្សជាច្រើនទៀត ដែលមិនគួរ ត្រូវបានប្រឈមនឹងការភ័យខ្លាចចំពោះការចាប់ខ្លួនពីសំណាក់សមត្ថកិច្ច ក៏ដូចជាការជាប់ពន្ធនាគារជា ច្រើនឆ្នាំនោះទេ ។
ក្រុមសង្គមស៊ីវិលសង្ឃឹមថា រាជរដ្ឋាភិបាល នឹងគោរពកាតព្វកិច្ចរបស់ខ្លួន ដើម្បីធានាសិទ្ធិក្នុងការបញ្ចេញមតិ ផ្អែកតាមរដ្ឋធម្មនុញ្ញ និងច្បាប់សិទ្ធិមនុស្សអន្តរជាតិ ។ ក្រុមសង្គមស៊ីវិលក៏សង្ឃឹមផងដែរថា សាលាដំបូងខេត្តត្បូងឃ្មុំ និងសាលាដំបូងខេត្តកោះកុង នឹងទម្លាក់ចោលរាល់ការចោទប្រកាន់ទៅលើតំណាងសហគមន៍ដីធ្លីទាំងអស់ ព្រមទាំងដោះលែងតំណាងសហគមន៍ទាំង៣នាក់គឺ លោក ផុន សុផល លោក ហ៊ីន ស៊ីនាត និង លោក សែម សាង ដែលកំពុងជាប់ឃុំ ឱ្យមានសេរីភាពវិញ ដើម្បីបានជួបជុំក្រុមគ្រួសារ និងបម្រើ ការងារ សង្គមក្នុងពេលដ៏ឆាប់នាពេលខាងមុខនេះវិញ ៕ រក្សាសិទ្ធិដោយ៖បញ្ញាស័ក្តិ
