ក្រុងញូវដែលីៈ មន្ត្រី បានថ្លែងកាលពីថ្ងៃចន្ទ ដោយបានគូសបញ្ជាក់អំពីរដ្ឋដែលមានទំនាក់ទំនងមិនល្អ រវាងប្រទេសមហាយក្សជិតខាងទាំង២នេះថា កងកម្លាំងយោធារបស់ប្រទេសឥណ្ឌានិងចិន បានប្រយុទ្ធគ្នានៅក្នុងជម្លោះថ្មីមួយ នៅតាមព្រំដែនជួរភ្នំហិម៉ាល័យរបស់ពួកគេ ដោយបានបណ្តាលឲ្យកងកម្លាំងរបស់ភាគីទាំង២រងរបួសអស់ជាច្រើននាក់។
ការប្រយុទ្ធគ្នាកាលពីថ្ងៃទី២០ខែមករា បានកើតឡើងរយៈពេល៦ខែ ក្រោយពីការប្រយុទ្ធគ្នាមួយ ដែលបានបណ្តាលឲ្យកងកម្លាំងឥណ្ឌាយ៉ាងតិច២០នាក់ បានស្លាប់ និងមិនដឹងអំពីការស្លាប់និងរបួសរបស់កងកម្លាំងទាហានចិនថា មានប៉ុន្មាននាក់នោះទេ។
ទោះបីជាយ៉ាងណាក៏ដោយ ក្រសួងការបរទេសចិន បានថ្លែងថា ប្រទេសខ្លួន«គ្មានព័ត៌មាន»អំពីឧប្បត្តិហេតុនោះទេ។
នៅក្នុងសេចក្តីថ្លែងការណ៍មួយ យោធាឥណ្ឌា បានថ្លែងថា ការប៉ះទង្គិចកាលពីសប្តាហ៍មុន«ត្រូវបានដោះស្រាយដោយមេបញ្ជាការប្រចាំតំបន់ អនុលោមទៅតាមពិធីការដែលបានបង្កើតឡើង ដើម្បីដោះស្រាយជម្លោះនៅទីនោះ»។
ប្រភពរដ្ឋាភិបាលបានថ្លែងថា កងកម្លាំងយោធាឥណ្ឌា៤នាក់ បានរងរបួស នៅពេលដែលកងកម្លាំងល្បាតរបស់ចិន ត្រូវបានបង្ខំឲ្យត្រឡប់មកវិញ។ ពួកគេ បានបន្ថែមទៀតថា កងកម្លាំងរំដោះប្រជាជនចិន បានស្លាប់និងរងរបួស ប៉ុន្តែមិនដឹងចំនួនប៉ុន្មាននាក់នោះទេ។
នៅក្នុងទីក្រុងប៉េកាំងវិញ អ្នកនាំពាក្យក្រសួងការបរទេស លោកហ្ស៊ៅ លីចៀន បានថ្លែងថា កងកម្លាំងយោធាចិន«បានពលីជីវិតរបស់ពួកគេខ្លួនឯង ដើម្បីការពារសន្តិភាព និងភាពស្ងប់ស្ងាត់នៅតាមតំបន់ព្រំដែន»។
លោកហ្ស៊ៅ លីចៀន បានថ្លែងថា៖« ប្រទេសចិន បានទទូចឲ្យប្រទេសឥណ្ឌា ធ្វើការនៅក្នុងទិសដៅតែមួយ»។
ព័ត៌មានលម្អិតនៃការប៉ះទង្គិចចុងក្រោយបំផុត បានកើតឡើងនៅមុន ថ្ងៃទិវាសាធារណរដ្ឋឥណ្ឌា នៅពេលប្រទេសមួយនេះបានសម្ញែងអាវុធធុនធ្ងន់របស់ខ្លួន នៅកន្លែងព្យុហយាត្រាមួយនៅក្នុងរដ្ឋធានីញូវដែលី។
ប្រទេសចិននិងឥណ្ឌា ដែលបានធ្វើសង្គ្រាមតាមព្រំដែននៅឆ្នាំ១៩៦២ បានស្តីបន្ទោសគ្នាទៅវិញទៅមក ជុំវិញបង្កើនភាពតានតឹង ហើយភាគីនីមួយៗ បានបញ្ជូនកងកម្លាំងបន្ថែមរាប់ម៉ឺននាក់ ចូលទៅក្នុងតំបន់ព្រំដែននោះ៕
រក្សាសិទ្ធិដោយ៖CEN
