ភ្នំពេញ ៖ កាលពីពេលថ្មីៗនេះ ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រនៃកម្ពុជា បានចេញព្រះរាជក្រឹត្យ ត្រាស់បង្គាប់ផ្តល់គោរពងាជា «ឧកញ៉ា» ដល់ស្វាមីអ្នកនាងស្រីអូន ម្ចាស់សម្រស់ធម្មជាតិ គឺលោក ឈាង រ័ត្ន។
ការចេញព្រះរាជក្រឹត្យ ត្រាស់បង្គាប់ផ្តល់គោរពងារជា «ឧកញ៉ា» នេះផងដែរ គឺត្រូវបានធ្វើឡើង បន្ទាប់ពីមានសេចក្តីក្រាបបង្គំទួលថ្វាយពីសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ដែលធ្វើឡើងកាលពីថ្ងៃទី២៩ ខែមករា ឆ្នាំ២០២១ កន្លងទៅ។
គួរបញ្ជាក់ថា លោក ឈាង រ័ត្ន និងភរិយាលោកស្រី នួន ស៊ុន្ទរី (ហៅស្រីអូន) ម្ចាស់ក្រុមហ៊ុនសម្រស់ធម្មជាតិ គឺជាបុគ្គលដ៏មានចិត្តធម៌គួរឲ្យសរសើរខ្លាំងបំផុត ដែលប្តីប្រពន្ធអ្នកទាំងពីរតែងតែលេចមុខជួយទៅដល់បងប្អូនប្រជាពលរដ្ឋទីទ័លក្រ និងអ្នកជួបទុក្ខលំបាកជាច្រើនរាប់មិនអស់ និងក៏ដូចចូលរួមយ៉ាងសកម្ម ជាមួយការលះបង់ធនធានផ្ទាល់ខ្លួនយ៉ាងច្រើនសន្ធឹកសន្ធាប់ ក្នុងកិច្ចការងារសម្បុរសធម៌ ដើម្បីចូលរួមកាត់បន្ថយភាពក្រីក្ររបស់ប្រជាជនជាមួយរាជរដ្ឋាភិបាល។
ជាក់ស្តែង ថ្មីៗនេះ លោកស្រី នួន ស៊ុន្ទរី (ស្រីអូន) និងស្វាមីលោក ឈាង រ័ត្ន បានចូលរួមឧបត្ថម្ភនូវថវិការចំនួន ១៥០.០០០ (មួយរយហាសិបពាន់) ដុល្លារអាមេរិក ដល់រាជរដ្ឋាភិបាលសម្រាប់ទិញវ៉ាក់សាំងចាក់ការពារជំងឺ COVID-19 ដែលជាកិច្ចជួយសម្រាលទម្ងន់បន្ទុករបស់រាជរដ្ឋាភិបាល ក្នុងការការពារ និងថែមទាំសុខុមាលភាពរបស់ប្រជាជាតិកម្ពុជា ជាទីស្រឡាញ់របស់យើង៕ រក្សាសិទ្ធិដោយ៖ លឹម ហុង
