កំពង់ធំ ៖ យោងតាមអធិការដ្ឋាននគរបាលស្រុកស្ទោង បានឲ្យដឹងថា ថ្មីៗនេះ នាថ្ងៃទី០៩ ខែកុម្ភៈ ឆ្នាំ២០២១ កម្លាំងជំនាញប្រឆាំងគ្រឿងញៀនអធិការដ្ឋាននគរបាលស្រុកស្ទោង បានសហការជាមួយកម្លាំងប៉ុស្តិ៍នគរបាលរដ្ឋបាលចំណាលើ និងប៉ុស្តិ៍នគរបាលរដ្ឋបាលកំពង់ចិនជើង ធ្វើការឃាត់ខ្លួនជនសង្ស័យចំនួន៦នាក់ (ស្រី២នាក់ និងប្រុស៤នាក់)។
ជាមួយនឹងលទ្ធផលឃាត់ខ្លួននោះផងដែរ សមត្ថកិច្ចបានដករហូតវត្ថុតាងរួមមាន៖ ១- ទូរស័ព្ទដៃចំនួន ០៤គ្រឿង, ២- ផៅវឺបេង ចំនួន ០១, ៣- កាបូបដៃសំរាប់ដាក់លុយចំនួន០៤, ៤- ដែកកេះចំនួន ០២, ៥- ឧបករណ៍សម្រាប់វេចខ្ចប់ថ្នាំញៀនមួយចំនួន, ៦- កន្ត្រៃមួយ, ៧- អត្តសញ្ញាណប័ណ្ណសញ្ជាតិខ្មែរឈ្មោះណូ រ៉ានី មួយសន្លឹក, ៨- ម៉ូតូម៉ាកសង់សេ125 បិទពណ៌ទឹកមាសស៊េរីឆ្នាំ 2020 ពាក់ស្លាកលេខកំពង់ធំ 1.O-5451 ចំនួន1គ្រឿង។
យ៉ាងណាមិញ អ្វីដែលគួរឲ្យចាប់អារម្មណ៍ និងភ្ញាក់ផ្អើលខ្លាំងនោះ គឺថាក្នុងចំណោមនោះ ជនសង្ស័យម្នាក់ ពិតជាមានមុខមាត់ដូចបេះដាក់ទៅនឹងនាយ ចយ អ៊ីចឹង ដែលរហូតធ្វើឲ្យគ្រប់គ្នាមានការងឿងឆ្ងល់ និងសួរនាំតៗគ្នាថា តើនោះគឺជានាយ ចយ ឬយ៉ាងណា។
ក្នុងនោះផងដែរ អ្នកប្រើប្រាស់បណ្តាញសង្គមជាច្រើន ក៏បាននាំគ្នាលាន់មាត់ថា៖ «ចុម! មុខដូចអាចយម្ល៉េះ សុទ្ធគ្នា ១០០% ហ្មង, ហាសហា ដូចមែនហ្នឹង!»៕ រក្សាសិទ្ធិដោយ៖ លឹម ហុង
