យោងតាមកាសែត South China Morning Post បានចុះផ្សាយឲ្យដឹងថា តារាសម្តែងចិននាង Gao Liu បានធ្វើការព្រមានទៅដល់អ្នកគាំទ្ររបស់នាង ឲ្យគិតពីហានិភ័យគ្រោះថ្នាក់ នៃការកែសម្ផស្សផង ខណៈដែលពេលនេះ រូបនាងផ្ទាល់បានជួបហើយ បន្ទាប់ពីកែច្រមុះនៅគ្លីនិកមួយគ្មានឯកទេស និងជំនាញច្បាស់លាស់ ជាលទ្ធផល បានបន្សល់ទុកនូវចុងច្រមុះរបស់នាងរលួយបែបនេះ។
នាង Liu បានចែករំលែករូបភាពដ៏រន្ធត់ នៃច្រមុះរបស់នាងប្រែសភាពខ្មៅ និងសាច់ងាប់ ខណៈពេលនេះនាងបានបាត់បង់ផ្នែកនៃការងារសម្តែងមួយចំនួន ដែលធ្វើឲ្យមានអារម្មណ៍ចង់តែធ្វើអត្តឃាតម្តងៗ។
នាងបាននិយាយថា “ខ្ញុំបានគិតថា រយៈពេល ៤ ម៉ោង នៃការវះកាត់នេះ នឹងធ្វើឱ្យខ្ញុំកាន់តែស្រស់ស្អាត ប៉ុន្តែ ខ្ញុំមិនបានដឹងថាពួកគេនឹងចាប់ផ្តើមជាសុបិន្តអាក្រក់បែបនេះនោះទេ”។
សូមបញ្ជាក់ថា ការវះកាត់កែកុនខ្នាតតូច ដើម្បីផ្សាភ្ជាប់ឆ្អឹងខ្ចីទៅចុងច្រមុះរបស់នាង ត្រូវបានឆ្លងមេរោគដែលបណ្តាលឱ្យមានការវះកាត់បន្តទៀត ដែលនាងបានសម្រាកនៅមន្ទីរពេទ្យរយៈពេល ៦១ ថ្ងៃ ហើយនាងត្រូវចំណាយអស់ ៤០០,០០០ យ័ន (ស្មើនឹង ៦ ម៉ឺនដុល្លារ)។
យោងទៅតាមរបាយការណ៍របស់ AsiaOne នាង Liu ក្រោយមកបានដឹងថាកន្លែងដែលធ្វើការវះកាត់លើនាងត្រូវបានដកហូត ពីការធ្វើបែបបទបែបនេះ ហើយបច្ចុប្បន្នកំពុងរង់ចាំការស៊ើបអង្កេតឱ្យបានពេញលេញ។
ជុំវិញករណីនេះផងដែរ បណ្តាញសារព័ត៌មានចិន បានរាយការណ៍ឲ្យដឹងថា ការិយាល័យសុខភាពក្នុងស្រុក នៅភាគខាងត្បូងទីក្រុងក្វាងចូវ ដែលជាកន្លែងគ្លីនិកនេះស្ថិតនៅ ក៏បានបញ្ជាក់ថា ខ្លួនកំពុងស៊ើបអង្កេតបញ្ហានេះ។
នេះបើយោងតាមរបាយការណ៍របស់អង្គភាពស្រាវជ្រាវទីផ្សារចិន iiMedia បានបញ្ចេញឲ្យដឹងថា ការវះកាត់ផ្លាស្ទិចកំពុងតែរីកដុះដាលដូចផ្សិត នៅក្នុងប្រទេសចិន ដែលមានអ្នកជំងឺជាង ១៥,២ លាននាក់ ត្រូវបានប៉ាន់ប្រមាណថាបានស្លាប់ក្រោមផ្លែកាំបិតវះកាត់ កាលពីឆ្នាំមុន៕ រក្សាសិទ្ធិដោយ៖ លឹម ហុង
