ភ្នំពេញ ៖ ដូចដែលបានដឹងហើយ ម៉ូតូកង់បីឥណ្ឌា ឬហៅថា PassApp គឺជាមធ្យោបាយដឹកជញ្ជូន ដែលកំពុងពេញនិយមខ្លាំង សម្រាប់បងប្អូនអ្នកធ្វើដំណើរទូទៅ ព្រោះថា ពុំត្រឹមហៅ (Booking) រហ័សទាន់ចិត្តប៉ុណ្ណោះទេ តែតម្លៃក៏សមរម្យទៀតផង។
តែទោះយ៉ាងណា ទន្ទឹមនឹងការផ្តល់សេវាកម្មដ៏គួរឲ្យពេញចិត្តនេះ PassApp ក៏បង្កបញ្ហាដូចជាការបើកគ្មានសណ្តាប់ធ្នាប់ បើកបរសាហាវៗ និងរហូតកើតមានករណីប្លន់អ្នកដំណើរទៀងផង។ ប៉ុន្តែ ករណីនេះកើតឡើងតែសម្រាប់អ្នករត់កង់បីមួយចំនួនតូចប៉ុណ្ណោះ ដែលធ្វើឲ្យខូចឈ្មោះដល់គេល្អត្រឹមត្រូវ។
ជុំវិញរឿងនេះ លោក ផែង វណ្ណៈ បានចេញមុខព្រលះធ្ងន់ៗ សំដៅទៅកាន់ក្រុមរត់ PassApp ចរិកស្ទាវៗថា «បងប្អូនតុៗខ្លះ ពួកគាត់ខិតខំរកស៊ីណាស់ ដើម្បីផ្គត់ផ្គង់ជីវភាពគ្រួសារ ប៉ុន្តែ អាតុតុមួយចំនួនណានោះ រហូតបន្លំធ្វើជាអ្នករត់តុតុ ហើយប្លន់គេក៏មានដែរ ដឹកគេទៅធ្វើស៊ីក៏មានដែរ ឥឡូវ មានប្រភេទអាតុតុមួយក្រុមទៀត ឬហៅថាក្រុមអ្នកលេងតុតុ គេមានចាក់ធុងបាស់លើហ្នឹងឌីងឌីង (តំឡង់ពេញផ្លូវ) ដូចពួកក្រុមអាគ្រវីក្បាលលេងថ្នាំ និងតុតុគេហ្នឹង គេតុបតែងលេងភ្លើងពណ៌ដូចភ្លើងបារអ៊ីចឹង»។
ហេតុនេះ លោក ផែង វណ្ណៈ ដែលសម្តែងនូវការស្អប់ជាខ្លាំង ក៏សូមផ្តាំទៅបងប្អូនអ្នកដំណើរទាំងអស់ ជាពិសេសាច់ញាតិគ្រួសាររបស់លោក ពេលប្រទះនឹងតុតុប្រភេទលេងភ្លើង ចាក់ធុងបាស់ កុំឡើងជិះឲ្យសោះ ព្រោះពួកនេះសុទ្ធតែជាពួកសូវមិនល្អ អាចលេងថ្នាំ ដែលខ្លះឪពុកម្តាយខំខ្ចីបុលធនាគារដើម្បីទិញកង់បីឲ្យកូនរត់ តែមិនកែចរិក មិនខិតខំរកស៊ីទេ បែរជាទៅប្រមូលផ្តុំគ្នាតុបតែងកង់បីបង្អួតគ្នា ចាក់ធុងឮៗគ្មានខ្លាចចិត្តអ្នកណាសោះឡើយ។
តាមរយៈការលើកឡើងខាងលើនេះ លោក ផែង វណ្ណៈ ក៏សំណូមពរដល់សមត្ថកិច្ចគួរតែត្រួតពិនិត្យឡើងវិញផង ជាពិសេសទៅលើពួកតុតុប្រភេទនេះ ដោះគ្រវាត់ចោលធុងបាស់ ភ្លើងពណ៌រញ៉េរញ៉ៃស្អីៗហ្នឹងឲ្យអស់ ព្រោះថា ក្រុមនេះអាចបង្កប់ដាវ ដែកទីប ពូថៅ…ក្នុងហ្នឹង ដែលក៏អាចជាក្រុមកាប់ចាក់ ឬ ជាចោរប្លន់បន្លំខ្លួនក៏ថាបាន៕ រក្សាសិទ្ធិដោយ៖ លឹម ហុង
