ខេត្តព្រះសីហនុ៖ ថ្នាក់ដឹកនាំ នៃស្នងការដ្ឋាននគរបាលខេត្តព្រះសីហនុ កាលពីព្រឹកថ្ងៃទី២៨ ខែមីនា ឆ្នាំ២០១៨ បានបើកសន្និបាតបូកសរុបលទ្ធផលការងារឆ្នាំ២០១៧ និងផ្សព្វផ្សាយទិសដៅការងារអនុវត្ត បន្តឆ្នាំ២០១៨ របស់អគ្គស្នងការដ្ឋាននគរបាលជាតិ នៃក្រសួងមហាផ្ទៃ និងប្រកាសមុខតំណែង បំពាក់ឋានន្តរស័ក្តិជូនមន្ត្រីនគរបាលជាតិចំនួន ៣៥នាក់។
របាយការណ៍បូកសរុបលទ្ធផលការងារឆ្នាំ២០១៧ របស់ស្នងការដ្ឋាននគរបាល ខេត្តព្រះសីហនុ បង្ហាញថា បទល្មើសព្រហ្មទណ្ឌបានកើតមានចំនួន ៧៤លើក បើប្រៀបធៀបឆ្នាំ២០១៦ កើតមាន ៨៦លើក គឺថយចុះ ១២លើក ឬស្មើ១៤%។ ក្នុងនោះមាន៖ បទល្មើសឧក្រិដ្ឋមាន ១៥លើក ប្រៀបធៀបឆ្នាំ២០១៦ កើតមាន ១៩លើក គឺថយចុះ ៤លើក។
បទល្មើសមជ្ឈឹមកើតមាន ៥៨ លើក បើធៀបឆ្នាំ២០១៦ បានកើតមាន ៦៧លើក គឺថយចុះ ៩លើក។ បទល្មើសខាងលើបណ្ដាលឲ្យស្លាប់មានមនុស្ស ៨នាក់ រងរបួសមនុស្ស ២៧នាក់។ បាត់ម៉ូតូចំនួន ៤៧គ្រឿង និងសម្ភារៈផ្សេងជាច្រើនទៀត។
របាយការណ៍ដដែល បញ្ជាក់ថា លទ្ធផល នៃកិច្ចប្រតិបត្តិការ បង្ក្រាបបទល្មើសបានចំនួន ៧០ករណី ឃាត់ខ្លួនជនសង្ស័យបាន ចំនួន ១៤៧នាក់ ក្នុងនោះមានបទឧក្រិដ្ឋចំនួន ១២ករណី ឃាត់ខ្លួនជនសង្ស័យចំនួន ២០ នាក់។ បទល្មើសមជ្ឈឹមចំនួន៥៨ ករណីឃាត់ខ្លួនជនសង្ស័យ ចំនួន ១២៧នាក់ និងបានកសាងសំណុំរឿងតាមនីតិវិធីបញ្ជូនទៅសាលាដំបូងខេត្តព្រះសីហនុ។
ចំណែក គ្រោះថ្នាក់ចរាចរណ៍ បានកតមានចំនួន ២១៣លើក បើប្រៀបធៀបឆ្នាំ២០១៦ កើតមាន ៣១១លើក គឺថយចុះ ១០២លើក។ គ្រោះថ្នាក់នេះ បានបណ្តាលឲ្យស្លាប់មនុស្សចំនួន ៧៦នាក់ ស្រី ១៩នាក់ ក្នុងនោះ មានជនបរទេសចំនួន ៩នាក់ និង រងរបួសចំនួន ៣៦៧នាក់។
ដោយឡែក គ្រោះថ្នាក់អគ្គីភ័យ បានកើតមានចំនួន ១៩លើក ឆេះផ្ទះ ៧លើក ឆេះបន្ទប់ផ្ទះសំណាក់៣លើក ឆេះរថយន្តកំពុងលើកបរ៣លើក ឆេះឡក្នុងរោងចក្រ ២លើក ឆេះរោងសិប្បកម្ម ១លើក ឆេះដំបូលបឹងកាឡូ ២លើក និងឆេះបន្ទប់ខារ៉ាអូខេ ១លើក។ គ្រោះថ្នាក់ខាងលើនេះ បានបណ្ដាលឲ្យមានស្លាប់មនុស្សម្នាក់ និង រងរបួស៤នាក់។
នាឱកាសនោះ លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ មានប្រសាសន៍ ណែនាំដល់កងកម្លាំងក្រោមឱវាទទាំងអស់ ត្រូវខិតខំប្រឹងប្រែង បំពេញការងារ ឲ្យបានល្អ គោរពតាមផែនការ និង បទបញ្ជា របស់ថ្នាក់លើ តាមឋានានុក្រម ត្រូវមានស្មារតីសាមគ្គីភាព ឯកភាពផ្ទៃក្នុង ឲ្យបានល្អ ធ្វើការប្រកបដោយឆន្ទៈ និងមានការទទួលខុសខ្ពស់។
អង្គសន្និបាត របស់ស្នងការដ្ឋាននគរបាលខេត្តព្រះសីហនុ កាលពីព្រឹកថ្ងៃពុធ ទី២៨ ខែមីនា ឆ្នាំ២០១៨ ក៏មានវត្តមាន លោកនាយឧត្តមសេនីយ៍ ថោង លីម អគ្គស្នងការរងនគរបាលជាតិ តំណាងឲ្យ លោកនាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ និង លោក ស្រ៊ុន ស្រ៊ន់ អភិបាលរងខេត្តព្រះសីហនុ បានអញ្ជើញចូលរួមជាគណៈអធិបតី។
នាឱកាសនោះដែរ លោក ស្រ៊ុន ស្រ៊ន់ អភិបាលរងខេត្តព្រះសីហនុ និងលោកនាយឧត្តមសេនីយ៍ ថោង លីម អគ្គស្នងការរង នគរបាលជាតិ បានថ្លែងកោតសរសើរដល់កងកម្លាំងនគរបាលខេត្តព្រះសីហនុ ដែលបាន ខិតខំប្រឹងប្រែងបំពេញការងារ ថែរក្សាសន្តិសុខសណ្តាប់ធ្នាប់សង្គម ជូនប្រជាពលរដ្ឋ អ្នកវិនិយោគទុន ភ្ញៀវទេសចរណជាតិនិងអន្តរជាតិ ឲ្យមានសុវត្ថិភាពល្អប្រសើរ ជាពិសេសបានបង្ក្រាបមុខសញ្ញាចាប់ជំរិតជនជាតិចិន ទទួលបានជោគជ័យជាបន្តបន្ទាប់នាពេលកន្លងមក។
បន្ថែមលើនេះ លោក ថោង លីម បានសង្កត់ធ្ងន់ថា កងកម្លាំងនគរបាលជាតិ គឺជាកម្លាំងស្នូលក្នុងការការពារថែរក្សាសន្តិសុខសណ្តាប់ធ្នាប់សង្គម ការពាររាជរដ្ឋាភិបាលស្របច្បាប់ ដែលកើតឡើងដោយការបោះឆ្នោត ហើយត្រូវប្រឆាំងដាច់ខាតរាល់ការប៉ុនប៉ងទាំងឡាយណា ដែលមានបំណងញុះញង់បំបែកបំបាក់បំផ្លាញដល់សន្តិសុខជាតិ។ ក្នុងសន្និបាតនោះដែរ ក៏មានប្រកាសចូលកាន់មុខតំណែង ថ្នាក់ស្នងការរង ១រូប និង បំពាក់ឋានន្តរស័ក្តិជូនមន្ត្រីនគរបាលជាតិ ចំនួន ៣៥នាក់ មានថ្នាក់៖
– វរសេនីយ៍ឯក ចំនួន ៣នាក់
– វរសេនីយ៍ទោ ចំនួន ៣នាក់
– វរសេនីយ៍ត្រី ចំនួន ១១នាក់
– អនុសេនីយ៍ឯក ១២នាក់
– អនុសេនីយ៍ទោ ២នាក់ និងថ្នាក់អនុសេនីយ៍ត្រី ៤នាក់ផងដែរ។
បន្ថែមលើនេះ លោក ថោង លីម អគ្គស្នងការរងនគរបាលជាតិ ក៏បានប្រគល់ម៉ូតូធុនធំចំនួន ១៤គ្រឿង រថយន្តចំនួន ៥គ្រឿង និង ឯកសណ្ឋានចំនួន ៣៥០កំប្លេរ ដែលជាអំណោយ របស់ លោកនាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ ផ្តល់ជូនស្នងការដ្ឋាននគរបាលខេត្តព្រះសីហនុ ដើម្បីបម្រើការងារថែរក្សាសន្តិសុខ សណ្តាប់ធ្នាប់សង្គម ឲ្យបានប្រសើរឡើងនាបណ្តាឆ្នាំខាងមុខៗទៀត៕ ដែន សីមា
