ភ្នំពេញ៖ កសិផលសំខាន់ៗរបស់កម្ពុជា រួមមាន ស្រូវ ដំឡូងមី ពោត ស្វាយចន្ទី ផ្លែស្វាយ និងកសិកផលជាច្រើនមុខទៀត មានកំណើននៃការនាំចេញ។ បើតាមក្រសួងកសិកម្ម ក្នុងរយៈពេល ៣ខែដើមឆ្នាំ២០២២ បានប៉ាន់ស្មានតម្លៃនៃការនាំចេញកសិផលនេះ គិតជាទឹកប្រាក់ តាមឯកតាតម្លៃផ្អែកតាមវិក្កយបត្ររបស់អ្នកនាំចេញ មានចំនួន ១២៦៨ លានដុល្លារអាមេរិក។
តាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ក្នុងរយៈពេល ៣ខែដំបូង ឆ្នាំ ២០២២នេះ កម្ពុជា បាននាំចេញ កសិផលសំខាន់ៗ ចំនួន ៣,៤៣លានតោន ទៅកាន់ទីផ្សារ ៥៧ប្រទេស នៅក្នុងតំបន់ និងពិភពលោក មានកំណើន ១១,១៦ភាគរយ បើធៀបនឹងរយៈពេលដូចគ្នាកាលពី ឆ្នាំ ២០២១។
របាយការណ៍ដដែលនេះបានបង្ហាញថា ក្នុងចំណោមផលិតផលសំខាន់ៗដែលបាននាំចេញទាំងនោះ រួមមានអង្ករចំនួន ១៧ម៉ឺនតោន បានកើនឡើង ១០,៩៦%, ស្រូវ ចំនួន ១,៣៩លានតោន ទៅកាន់ប្រទេសវៀតណាម កើនឡើង ១៣,៨០%, ដំឡូងមីស្រស់ជាង ៣៥ម៉ឺនតោន កើនឡើង ១២,៧៥%, ម្ស៉ៅដំឡូងមី ជាង ២ម៉ឺន ៥ពាន់តោន កើនឡើង ៩០,១៥%, គ្រាប់ស្វាយចន្ទីឆៅ ជាង ២៧ម៉ឺនតោន ថយចុះ ៣៩,៦៧% និងគ្រាប់ចន្ទីកែច្នៃ ២១៣តោន កើនឡើង ៣១១,៨៣%។
ការនាំចេញគ្រាប់ពោត មានជាង ៥ម៉ឺន ៥ពាន់តោន ថយចុះ ៤៩,១២%, គ្រាប់សណ្តែកបាយមានចំនួន ៨៩០០តោន កើនឡើង ២៩៥,៥៦%, គ្រាប់សណ្តែកសៀង ៥ម៉ឺន ២០១០តោន, ផ្លែចេកស្រស់ ជាង ១០ម៉ឺនតោន ថយចុះ ១៣,៤៦%, ផ្លែក្រូចថ្លុង ៣៧៥០តោន ថយចុះ ៧៦,១៤%, ផ្លែស្វាយស្រស់ជាង ៨ម៉ឺនតោន ថយចុះ ២០,៧៣%, ដូងប្រេង ចំនួន ១ម៉ឺន ១ ៣៦០តោន ថយចុះចំនួន ៣,៦២% និងម្រេច ចំនួន ៣០៧២,៩៤តោន កើនឡើង ១៧៥,០៦%៕
