ភ្នំពេញ៖ ប្រតិភូខេត្តក្វាងស៊ីនៃសាធារណរដ្ឋប្រជាមានិតចិន បានបង្ហាញចេតនាជួយសម្របសម្រួលឲ្យកម្ពុជាអាចនាំផលិតផលស្វាយ ស្វាយចន្ទី មៀន ម្រេច និងទឹកមាត់ត្រចៀកកាំ ចូលទៅប្រទេសចិនឲ្យបាននាពេលខាងមុខ។ ការលើកឡើងរបស់ភាគីចិននេះ ត្រូវបានធ្វើឡើងនៅក្នុងជំនួបពិភាក្សារវាង លោក ស៊ាង ថៃ អគ្គនាយកជំរុញពាណិជ្ជកម្ម ក្រសួងពាណិជ្ជកម្ម និង លោក Liang Yi អគ្គនាយករងនៃភ្នាក់ងារជំរុញការវិនិយោគខេត្តក្វាងស៊ី នាល្ងាច ថ្ងៃទី១៨ ខែឧសភា ឆ្នាំ២០១៨ នៅទីស្តីការក្រសួងពាណិជ្ជកម្ម។
សូមជម្រាបផងដែរថា គោលបំណងសំខាន់នៃដំណើរទស្សនកិច្ចរបស់ប្រតិភូខេត្តក្វាងស៊ី មកកម្ពុជានាពេលនេះ គឺដើម្បីពង្រឹង និងពង្រីកសហប្រតិបត្តិការពាណិជ្ជកម្មនិងវិនិយោគរវាងចិន-កម្ពុជា និងអញ្ជើញថ្នាក់ដឹកនាំក្រសួងពាណិជ្ជកម្ម ចូលរួមពិព័រណ៍ចិន-អាស៊ាន លើកទី១៥ ដែលនឹងប្រព្រឹត្តទៅពីថ្ងៃទី១២-១៥ ខែកញ្ញា ឆ្នាំ២០១៨ នៅទីក្រុងណាននីង នៃតំបន់ស្វយ័តក្វាងស៊ី ខណៈដែលឆ្នាំ២០១៨នេះ កម្ពុជា នឹងត្រូវធ្វើជា ប្រទេសកិត្តិយស ក្នុងព្រឹត្តិការណ៍ដ៏ធំនេះ។
នៅក្នុងឱកាសនោះ លោក Liang Yi បានជម្រាបថា នៅកម្ពុជាមានក្រុមហ៊ុនមកពីខេត្តក្វាងស៊ីជាច្រើន បានកំពុងធ្វើប្រតិបត្តិការអាជីវកម្ម ហើយនៅថ្ងៃខាងមុខ លោក នឹងខិតខំកៀរគរវិនិយោគិនខេត្តក្វាងស៊ី ឲ្យចូលមកបណ្តាក់ទុនថែមទៀតនៅកម្ពុជា ដើម្បីឈានទៅសម្រេចគោលដៅយុទ្ធសាស្ត្រផ្លូវមួយ ខ្សែក្រវាត់មួយ ដែលផ្តួចផ្តើមដោយ លោក ស៊ី ជិនពីង ប្រធានាធិបតីនៃសាធារណរដ្ឋប្រជាមានិតចិន។ លោក Liang Yi បានបន្តថា មានក្រុមហ៊ុនមកពីខេត្តក្វាងស៊ីដ៏ធំមួយ កំពុងបោះទុនវិនិយោគលើកំពង់ផែក្រុងព្រះសីហនុ បើសិនជាគម្រោងនេះទទួលជោគជ័យ កម្ពុជាអាចដឹកជញ្ជូនទំនិញតាមផ្លូវទឹកត្រង់ទៅប្រទេសចិនតែម្តង។
ជាការឆ្លើយតប លោក ស៊ាង ថៃ បានសម្តែងនូវការគាំទ្រពេញទំហឹង ចំពោះគម្រោងវិនិយោគរបស់ខេត្តក្វាងស៊ី និងបានសន្យាជួយសម្រួលគម្រោងនេះ ឲ្យលេចរូបរាងឡើងនាពេលអនាគត។ លោក អគ្គនាយក ក៏បានស្នើ លោក Liang Yi ឲ្យពិចារណាជួយសម្របសម្រួលយ៉ាងណាឲ្យកម្ពុជាអាចនាំផលិតផលស្វាយ ស្វាយចន្ទី មៀន ម្រេច និងទឹកមាត់ត្រចៀកកាំ ចូលទៅប្រទេសចិនឲ្យបានឆាប់ ព្រោះឥឡូវនេះ កម្ពុជា ត្រូវបានអនុញ្ញាតឲ្យនាំចូលទៅប្រទេសចិនបានតែ អង្ករ ដំឡូងមី និងពោតប៉ុណ្ណោះ។ ក្នុងឱកាសនេះដែរ លោក អគ្គនាយក ក៏បានថ្លែងអំណរគុណដល់ រដ្ឋបាលខេត្តក្វាងស៊ី ដែលកន្លងមកតែងបានជួយសម្របសម្រួលប្រតិភូកម្ពុជា ក្នុងការចូលរួមពិព័រណ៍ចិន-អាស៊ាន ចាប់តាំងពីឆ្នាំ២០០៤ ដោយបានជួយឲ្យក្រុមហ៊ុនកម្ពុជាភាគច្រើន កាន់តែមានភាពម្ចាស់ការ ក្នុងការស្វែងរកដៃគូអាជីវកម្ម និងពង្រីកទីផ្សារថ្មីៗជាបន្តបន្ទាប់។ តបតាមសំណើរនេះ លោក Liang Yi នឹងរាយការណ៍ទៅមន្ត្រីនិងអាជ្ញាធរចិនពាក់ព័ន្ធដើម្បីចូលរួមដោះស្រាយឲ្យកម្ពុជាអាចនាំផលិតផលស្វាយ ស្វាយចន្ទី មៀន និងម្រេច ចូលប្រទេសចិនបាន។ ដោយឡែក ចំពោះផលិតផលទឹកមាត់ត្រចៀកកាំវិញ ភាគីចិន នឹងសហការជាមួយប្រទេសម៉ាឡេស៊ី បង្កើតជាក្រុមជំនាញមួយ ដើម្បីជួយសម្របសម្រួលយ៉ាងណាឲ្យកម្ពុជាអាចនាំចូលទឹកមាត់ត្រចៀកកាំទៅកាន់ប្រទេសចិនបានដូចប្រទេសម៉ាឡេស៊ីផងដែរ៕ ដោយ៖បញ្ញាស័ក្តិ
