បន្ទាយមានជ័យ៖ រូបិយវត្ថុចរាចរណ៍ និងប្រាក់បញ្ញើនៃប្រាក់រៀល នៅក្នុងធនាគារជាតិនៃកម្ពុជា បានកើនឡើងក្នុងអត្រា១៨ភាគរយ និង២៧ភាគរយ រៀងគ្នា ក្នុងនោះតាមរយៈកំណើនអត្រាទទួលបាន និងប្រើប្រាស់សេវាហិរញ្ញវត្ថុផ្លូវការ ព្រមទាំងបានផ្តល់កម្ចីដល់អតិថិជនប្រមាណជិត១,៨លាននាក់ និងទទួលប្រាក់បញ្ញើពីអ្នកផ្ញើប្រាក់ជាង ១,៧លាននាក់ ។
នាឱកាសអញ្ជើញប្រកាសតែងតាំងនាយកសាខាធនាគារជាតិនៃកម្ពុជាខេត្តបន្ទាយមានជ័យ នាថ្ងៃទី២២ ខែឧសភា ឆ្នាំ២០១៨នេះ លោក ជា ចាន់តូ ទេសាភិបាលធនាគារជាតិនៃកម្ពុជា បានប្រកាសឲ្យពលរដ្ឋទាំងអស់ប្រយ័ត្នឲ្យ បានខ្ពស់ចំពោះការចងការប្រាក់ក្រៅប្រព័ន្ធ (មិនមានច្បាប់អនុញ្ញាតត្រឹមត្រូវ ពីធនាគារជាតិនៃកម្ពុជា ឬស្ថាប័នណាមួយ) ព្រោះបច្ចុប្បន្ននេះ កំពុងមានជនឆ្លៀតឱកាស បានកឹបកេងចំណេញ ទៅលើការរកស៊ីចងការប្រាក់ ក្រៅប្រព័ន្ធនេះ។
លោកទេសាភិបាល បានឲ្យដឹងថា ទន្ទឹមនឹងការរីកចម្រើន នៃវិស័យមីក្រូហិរញ្ញវត្ថុ ក៏មានជនមួយចំនួនកំពុង កេងចំណេញដោយប្រើនសារយោបាយប្រភិថុតិ តាមរយៈការឃោសនាឲ្យប្រជាពលរដ្ឋយល់ច្រឡំថា គ្រឹះស្ថានមីក្រូហិរញ្ញវត្ថុជារបស់រដ្ឋ មិនតែប៉ុណ្ណោះពួកគេ បានដើរបោកបញ្ឆោត ពលរដ្ឋ មិនបាច់សងប្រាក់ប្រសិនបើគេឈ្នះឆ្នោត ឬឃោសនាប្រាក់សន្សំពីប្រជាពលរដ្ឋ ដោយសន្យាឲ្យអត្រាការប្រាក់ខ្ពស់ជាដើម តែទីបំផុតពួកគេបានរត់គេចខ្លួនបាត់ នេះជាសកម្មភាពមិនស្របច្បាប់ ធ្វើឲ្យពលរដ្ឋខាតបង់យ៉ាងធំធេង និងត្រូវមានការប្រុងប្រយត្ន័ឲ្យខ្ពស់។
លោកទេសាភិបាល ក៏បានបញ្ជាក់ទៀតថា ការរីកចម្រើនក្នុងវិស័យធនាគារនេះ អាស្រ័យដោយប្រទេសជាតិមានសន្តិភាព ទើបទទួលបាការជឿជាក់ និងការចូលរួមគាំទ្រពីប្រជាជន និងសាធារណៈជន។
លោក ក៏បានផ្តាំផ្ញើឱ្យមន្ត្រីធនាគារជាតិនៃកម្ពុជាបន្តអនុវត្តមុខងារប្រកបដោយស្មារតីទទួលខុសត្រូវខ្ពស់ មានភាពស្មោះត្រង់ រក្សាការសម្ងាត់វិជ្ជាជីវៈជូនអតិថិជន ខិតខំអភិវឌ្ឍខ្លួនឯង និងបន្តស្មារតីសាមគ្គីនិងសហការគ្នាល្អជាប្រពៃណី៕ ដោយ៖បញ្ញាស័ក្តិ
