សត្វក្ងានត្រូវបានចាត់ទុកជាសត្វស្លាបធំមួយប្រភេទ ដែលមានអត្តចរិកកាច មិនថាចំពោះសត្វដទៃ ឬ សូម្បីមនុស្សឡើយ នៅពេលចូលមកកៀកដែលពួកវាគិតថាសកម្មភាពបម្រុងវាយប្រហារមួយ ហេតុនេះ វាតែងតែស្រែកខ្លាំងៗឡើងក្នុងបំណងបណ្តេញចេញ ឬ ដេញច្រាស ។ ជាក់ស្តែង ក្មេងប្រុសតូចម្នាក់ត្រូវបានសត្វក្ងាន់មួយ ដេញវាយប្រហារយ៉ាងសាហាវ បណ្តាលឲ្យរត់ព្រលឹងចុងសក់តែម្តង បន្ទាប់ពីក្មេងប្រុងនេះបានចាប់វាធ្វើបាបយ៉ាងធ្ងន់ដៃ ។
នៅក្នុងវីដេអូបានបង្ហាញឲ្យឃើញក្មេងប្រុសតូចនោះ ចាប់សត្វក្ងាន១ក្បាលច្របាច់កធ្ងន់ៗ ប៉ុន្តែ ដោយសារតែវាប្រឹងរើបម្រាស់យ៉ាងខ្លាំង ជាហេតុធ្វើឲ្យក្មេងប្រុសនោះទប់ទល់លេងឈ្នះ និងព្រលែងវា ។ ភ្លាមៗនោះ សត្វក្ងាននេះដែលពោរពេញដោយកំហឹងយ៉ាងឈឺចាប់ បានដេញច្រាសក្មេងប្រុសរូបនេះយ៉ាងសាហាវ បណ្តាលឲ្យរត់ប្រាសអាយុតែម្តង ។
ទោះយ៉ាងណា សកម្មភាពវាយប្រហារនេះ ត្រូវបានដឹងថា ពុំបង្កឲ្យមានរបួសនោះទេ ព្រោះតែខណៈពេលនោះ ម្តាយរបស់ក្មេងនេះក៏បានស្ថិតនៅទីនោះផងដែរ ដោយនាងបានថតវីដេអូពីសកម្មភាពក្ងានវាយប្រហារកូនប្រុសរបស់ខ្លួន ធ្វើឲ្យនាងផ្ទុះសំណើចយ៉ាងខ្លាំងទៀតផង ៕ ឧត្តម
