សៀមរាប ៖ អាជ្ញាធរខេត្តសៀមរាប បានប្រកាសស្វាគមន៍ ចំពោះគណៈប្រតិភូបវរកញ្ញាពិភពលោកឆ្នាំ២០១៧ បានទៅដល់លើទឹកដីប្រវត្តិសាស្ត្រសៀមរាបអង្គរ នៅរសៀលថ្ងៃទី៩ ខែវិច្ឆិកា ឆ្នាំ២០១៧ ដើម្បីស្វែងពីសក្តានុពលទេសចរណ៍នៅខេត្តសៀមរាប ដែលជាតំបន់គោលដៅទេសចរណ៍វប្បធម៌ ដែលជាគោលដៅធម្មជាតិប្រវត្តិសាស្ត្រ ហើយក៏ជាសម្បត្តិបេតិកភណ្ឌពិភពលោក របស់មនុស្សជាតិ។
បើតាមលោកឃឹម ប៊ុនសុង អភិបាលខេត្តសៀមរាប បានមានប្រសាសន៍ថា “ល្ងាចនេះខ្ញុំ និងភរិយា រួមជាមួយនឹងថ្នាក់ដឹកនាំខេត្ត បានចូលរួមពិធីជួបសំណេះសំណាល និងទទួលទានអាហារសាមគ្គីជាមួយប្រតិភូ បវកញ្ញាពិភពលោកឆ្នាំ២០១៧ ដែលមកបំពេញទស្សនកិច្ច ស្វែងយល់ពីសក្ដានុពលទេសចរណ៍នៅខេត្តសៀមរាប ដែលជាតំបន់គោលដៅទេសចរណ៍វប្បធម៌ និងធម្មជាតិ និងជាសម្បត្តិបេតិកភណ្ឌពិភពលោក”។
លោក ឃឹម ប៊ុនសុង បានមានប្រសាសន៍ថា ប្រតិភូបវរកញ្ញាឯកពិភពលោកឆ្នាំ២០១៧ ដែលមកទស្សនកិច្ច ដើម្បីស្វែងពីសក្តានុពលទេសចរណ៍នៅខេត្តសៀមរាប ដែលជាតំបន់គោលដៅទេសចរណ៍វប្បធម៌ និងធម្មជាតិ ហើយក៏ជាសម្បត្តិបេតិកភណ្ឌពិភពលោកនាពេលនេះ។ លោកអភិបាលខេត្ត បានថ្លែងប្រាប់ភ្ញៀវទេសចរដែលមកកម្សាន្តក្នុងខេត្តសៀមរាប អំពីសក្តានុពលរបស់ខេត្តសៀមរាប និងការងារ សន្តិសុខ សណ្តាប់ធ្នាប់ បរិស្ថាន អនាម័យ និង ជីវភាពរស់នៅរបស់ប្រជាពលរដ្ឋខេត្តសៀមរាប ដោយពឹងផ្អែកលើវិស័យកសិកម្ម និងទេសចរណ៍ ជាពិសេសការងារសន្តិសុខសណ្តាប់ធ្នាប់សង្គមផងដែរ។
លោក ឃឹម ប៊ុនសុង បានបញ្ជាក់ថា “ខេត្តសៀមរាប ជាអតីតរាជធានី នៃអធិរាជណាចក្រខ្មែរសម័យអង្គរ នាសតវត្សរ៍ទី៩ ដល់ទី១៤ ដែលជាទីក្រុងដ៏ប្រណិតផ្នែកវប្បធម៌ប្រវត្តិសាស្ត្រមួយនៅអាស៊ី ហើយកេរ្តិ៍មរតកវប្បធម៌ដ៏សម្បូរបែបជាច្រើន ដែលជាស្នាដៃនៃបុព្វបុរសជំនាន់ដើមបន្សល់ទុក បានក្លាយជាកំណប់ទ្រព្យដ៏មហាសាល ញ៉ាំងឲ្យខេត្តសៀមរាបនាពេលបច្ចុប្បន្ននេះ ក្លាយជាតំបន់គោលដៅទេសចរណ៍វប្បធម៌ និងធម្មជាតិ ដ៏សំខាន់មួយរបស់កម្ពុជា ក៏ដូចលើពិភពលោកទាំងមូល។ កត្តានេះបានធ្វើឲ្យភ្ញៀវទេសចរកើនឡើង ពីមួយឆ្នាំទៅមួយឆ្នាំ ជាក់ស្តែងក្នុងឆ្នាំ២០១៦ ទទួលបានភ្ញៀវទេសចរជាង៥លាននាក់ ដោយក្នុងនោះរយៈពេល១០ខែដើមឆ្នាំ២០១៧ ខេត្តសៀមរាបទទួលបានភ្ញៀវទេសចរជាង៤លាននាក់់ ប្រៀបធៀបរយៈពេលដូចគ្នាក្នុងឆ្នាំ២០១៦ គឺមានការកើនឡើង។ ជាមួយនឹងកំណើនទេសចរណ៍ ក្នុងខេត្តសៀមរាបយ៉ាងច្រើនលើសលប់នេះ អាជ្ញាធរខេត្ត បានយកចិត្តទុកដាក់ និងរៀបចំយ៉ាងយកចិត្តទុកដាក់ខ្ពស់ ចំពោះភ្ញៀវទេសចរ ជាពិសេសការងារសន្តិសុខសណ្តាប់ធ្នាប់សាធារណៈ ដែលជាការងារស្នួល ដើម្បីធានាឲ្យបាននូវភាពសុខដុមរមនា ជូនភ្ញៀវទេសចរជាតិនិងអន្តរជាតិ ឲ្យមានភាពកក់ក្តៅ និងកុំឲ្យបាត់ឱកាសក្នុងការប្រកបរបរ ដើម្បីទ្រទ្រង់ជីវភាពប្រចាំថ្ងៃ ក៏ដូចជា កំណើរកម្សាន្តរបស់ភ្ញៀវទេសចរគ្រប់រមណីយដ្ឋាន គ្រប់ទីកន្លែង ទាំងនៅទីក្រុងនិងជនបទ ដែលបណ្តាលមកពីបញ្ហាអសន្តិសុខនោះឡើយ។
លោកបានបន្តថា “ការអញ្ជើញរបស់ប្រតិភូបវរកញ្ញានាពេលនេះ ជាការបញ្ជាក់ឲ្យឃើញ ឲ្យកាន់តែច្បាស់ថាកម្ពុជា ទទួលបានយ៉ាងពេញលេញ នូវសន្តិសុខស្ថិរភាពនយោបាយ បាននិងការអភិវឌ្ឍនិងការរីកចម្រើន ឥតឈប់ឈរ ។ ជាមួយគ្នានោះដែរ ក៏បានឃើញនូវស្នាដៃដ៏ល្អឯក របស់បុព្វបុរសខ្មែរ ដែលបានបន្សល់ទុក ប្រាង្គប្រាសាទដល់កូនចៅជំនាន់ក្រោយ និងបានស្វែងយល់អំពីវប្បធម៌អរិយធម៌និងទំនៀមទម្លាប់ ដ៏ល្អផូរផង់របស់ប្រជាពលរដ្ឋខ្មែរផងដែរ “៕ ដោយ៖បញ្ញាស័ក្តិ
