ភ្នំពេញ៖ ក្រុមហ៊ុនអាកាសចរណ៍ Cambodia Angkor Air បានចាប់ផ្តើមប្រតិបត្តិការជើងហោះហើររបស់ខ្លួនរវាងខេត្តសៀមរាប និងទីក្រុងហាណូយ នៃប្រទេសវៀតណាម ដោយផ្តល់ការជំរុញដ៏ធំធេងដល់ទំនាក់ទំនងនៃវិស័យទេសចរណ៍ និងពាណិជ្ជកម្មរវាងប្រទេសទាំងពីរ
ក្រុមហ៊ុនអាកាសចរណ៍ Cambodia Angkor Air បានប្រកាសនៅលើទំព័រប្រព័ន្ធផ្សព្វផ្សាយថា បានដឹកអ្នកដំណើរចំនួន ៦៨ នាក់ តាមយន្តហោះ Airbus A320 នៃជើងហោះហើរ K6 852 ចេញដំណើរពីអាកាសយានដ្ឋានអន្តរជាតិសៀមរាប ហើយបានចុះចតនៅអាកាសយានដ្ឋានអន្តរជាតិហាណូយ។ ជើងហោះហើរដ៏ដែលនេះ បានត្រឡប់មកកាន់ខេត្តសៀមរាបវិញ ដោយដឹកភ្ញៀវទេសចរចំនួន ៨១ នាក់របស់អង្គការ UNESCO។
ក្រុមហ៊ុនអាកាសចរណ៍នេះ មានគម្រោងប្រតិបត្តិការជើងហោះហើរ Airbus A320/1 ចំនួនបីថ្ងៃ នៅថ្ងៃអង្គារ ថ្ងៃព្រហស្បតិ៍ និងថ្ងៃសៅរ៍រៀងរាល់សប្តាហ៍។ ក្រុមហ៊ុន ក៏មានគម្រោងចាប់ផ្តើមជើងហោះហើរត្រង់ពីខេត្តសៀមរាប ទៅកាន់ទីក្រុងហូជីមិញ និងដាណាងផងដែរ។ ក្រុមហ៊ុនក៏មានជើងហោះហើរពីភ្នំពេញ ទៅហាណូយ និងហូជីមិញ និងក៏មានជើងហោះហើរតភ្ជាប់ពីខេត្តព្រះសីហនុ និងហូជីមិញផងដែរ។
ជាមួយគ្នានេះ ក្រុមហ៊ុនអាកាសចរណ៍ Cambodia Angkor Air ក៏បានបន្តជើងហោះហើររវាងទីក្រុងភ្នំពេញ និងទីក្រុងសៀងហៃផងដែរ។ ជើងហោះហើរ K6 866 ដោយប្រើយន្តហោះ Airbus A320 បានចេញដំណើរពីអាកាសយានដ្ឋានអន្តរជាតិភ្នំពេញ ហើយបានចុះចតនៅអាកាសយានដ្ឋានអន្តរជាតិ Shanghai-Pudong (សាធារណៈរដ្ឋចិន)។ ការហោះហើរឡើងវិញត្រូវបានរំពឹងថា នឹងជំរុញទំនាក់ទំនងសេដ្ឋកិច្ចរវាងប្រទេសទាំងពីរ។
ក្រុមហ៊ុនអាកាសចរណ៍ ខេមបូឌា អង្គរអ៊ែរ គ្រោងនឹងដំណើរការជើងហោះហើរទៀងទាត់រវាងទីក្រុងភ្នំពេញ និងសៀងហៃ រៀងរាល់ថ្ងៃសៅរ៍។ ទិសដៅចិនផ្សេងទៀត របស់ក្រុមហ៊ុន រួមមាន ក្វាងចូវ ចេនចូវ ណាននីង និងណានឆាង បន្ទាប់ពីការគ្រប់គ្រងស្ថានការណ៍ជំងឺរាតត្បាត Covid-19 បានធូស្រាល ទាំងកម្ពុជា និងវៀតណាម ក៏បានដកការរឹតបន្តឹងការធ្វើដំណើរ និងបើកច្រកព្រំដែនឡើងវិញ។
កម្ពុជាគឺជាប្រភពទេសចរបរទេសធំជាងគេទីបីរបស់វៀតណាម បន្ទាប់ពីបើកដំណើរការឡើងវិញ។ ប្រជាជនកម្ពុជាសរុបចំនួន ១៧២,០០០ នាក់បានទៅទស្សនាប្រទេសវៀតណាមក្នុងរយៈពេល ១១ ខែដំបូងនៃឆ្នាំនេះ។
បើយោងតាមការិយាល័យស្ថិតិទូទៅនៃប្រទេសវៀតណាម កម្ពុជាក៏ទទួលបានភ្ញៀវទេសចរណ៍ពីប្រទេសវៀតណាមយ៉ាងច្រើនផងដែរ ដោយមានភ្ញៀវទេសចរវៀតណាមចំនួន ១៨ម៉ឺននាក់ មកទស្សនាព្រះរាជាណាចក្រកម្ពុជាក្នុងរយៈពេល ១១ ខែដំបូងនៃឆ្នាំ ២០២២។ ក្រុមហ៊ុនអាកាសចរណ៍នេះ រំពឹងថា នឹងនាំភ្ញៀវទេសចរពី ៣ ទៅ ៤ លាននាក់មកកម្ពុជាក្នុងមួយឆ្នាំ៕